બહેરામપુરા-નારોલના ગેરકાયદે બાંધકામને પોલીસનું જ પ્રોટેક્શન

બહેરામપુરા-દાણીલીમડા અને નારોલના ગેરકાયદે બાંધકામને પોલીસનું જ પ્રોટેક્શન

ધી બોમ્બે પ્રોવિન્શિયલ કોર્પોરેશન એક્ટ 1949ની કલમ 267 હેઠળ રકાયદે બાંધકામ તોડી પાડવાની જોગવાઈ હોવા છતાં અમ્યુકોના અધિકારીઓને પોલીસ પ્રોટેક્શન આપતી જ નથી

પોલીસને બંદોબસ્ત આપવા માટે 20-20 અમ્યુકોના એસ્ટેટ વિભાગે રિક્વેસ્ટ કરી હોવા છતાંય પ્રોટેક્શન આપવામાં આવતું જ નથી

અમદાવાદઃ અમદાવાદના દાણી લીમડા, બહેરામપુરા અને નારોલ નરોડામાં સદંતર ગેરકાયદે ચાલી રહેલા બાંધકામને તોડવા માટેની અમ્યુકોના અધિકારીઓએ પોલીસ પ્રોટેક્શનની 20-20 વાર માગણી કરી હોવા છતાંય તેમને પોલીસ બંદોબસ્ત ન આપીને અમદાવાદની પોલીસ જ ગેરકાયદેસર બાંધકામને પ્રોટેક્શન પૂરું પાડી રહી હોવાના આક્ષેપો થવા માંડ્યા છે. દક્ષિણ ઝોનમાં બહેરામપુરામાં બેરલ માર્કેટ પાસે અલીશા એપાર્ટમેન્ટના નામથી ગેરકાયદે ફ્લેટ બની ગયા છે. આ ફ્લેટ ગેરકાયદે હોવાથી તોડી પાડવાની નોટિસ પહેલી ઓગસ્ટ 2026ના આપી દેવામાં આવી છે. આ ફ્લેટ તોડી પાડવા માટે અમ્યુકોના આધિકારીઓએ 20-20 વાર પોલીસ પ્રોટેક્શનની માગણી કરી છે. છતાંય પોલીસના પેટનું પાણીય હાલતું નથી. સંભવતઃ પોલીસ ગેરકાયદે બાંધકામ કરનારાઓ સાથે સેટિંગમાં ચાલી રહી હોવાની ચર્ચા થઈ રહી છે. 

અમદાવાદના દાણીલીમડા વિસ્તારમાં અલ મિનાર રૉ હાઉસ સામે બાંધવામાં આવેલા  ગેરકાયદે ફ્લેટ બાંધી દેવામાં આવ્યા છે. આ બાંધકામ તોડવા માટે પોલીસમાં પાંચપાંચ વાર બંદોબસ્તની માગણી કરવામાં આવી છે. પરંતુ પોલીસ બંદોબસ્ત આપતી જ ન હોવાથી ગેરકાયદેસર ફ્લેટ તોડી શકાતા જ નથી. જોકે અમ્યુકોના અધિકારીઓ પણ ઓછા નથી. તેઓ ફ્લેટની સ્કીમનું વ્યવસ્થિત નામ અને એડ્રેસ તેમની નોટિસમાં ન લખીને તેમને આડકતરી રીતે બચાવી રહ્યા છે. દક્ષિણ ઝોનના એસ્ટેટ વિભાગના અધિકારીઓ માત્ર નોટિસ આપીને બેસી ગયા છે. પોલીસ બંદોબસ્ત આપતી નથી તેવું રટણ કર્યા કરે છે. 

બહેરામપુરા સુએઝ ફાર્મ પાસે અરવિન્દભાઈ અને એમ.ડી. ફ્લાવરના પ્રમોટરોએ મનીષ-2ની બાજુમાં ગેરકાયદે પાર્ટિ પ્લોટ બનાવી દીધો છે. આ પાર્ટિ પ્લોટને તોડવાનું કામ કરવા માટે ચાર ચાર વાર પોલીસ બંદોબસ્ત માગવામાં આવ્યો હોવા છતાંય પોલીસ બંદોબસ્ત ન આપીને પાર્ટી પ્લોટના પ્રમોટરોને છાવરવામાં આવી રહ્યા છે. ફ્લેટ કે રૉ હાઉસ જ નહિ આખીને આખી ફેક્ટરી  બહેરામપુરામાં શાહવાડી નજીક ફાઈનલ પ્લોટ નંબર 45 અને એક વત્તા 45 પર ગેરકાયદેસર બની ગઈ હોવા છતાં અમ્યુકોના અધિકારીઓ નોટિસ આપીને પછી પોલીસ બંદોબસ્ત ન મળતો હોવાનું જણાવીને મૌન સેવી લીધું છે. આ જ પ્રકારની બીજી એક ફેક્ટરી શાહવાડી-બહેરામપુરામાં ફાઈનલ પ્લોટ નંબર 126, એક વત્તા 127 અને એક વત્તા 127(2) પર બની ગઈછે. ઝેડ ફાર્મની સામે સુએઝ ફાર્મ પાસે આ ફેક્ટરી બનાવી દેવામાં આવી છે. બહેરામપુરા-શાહવાડીમાં જ ફાઈનલ પ્લોટ નંબર 19, એક વત્તા 19, બે વત્તા 19, 3 વત્તા 19-4 પૈકીની જગ્યામાં ત્રીજી ફેક્ટરી ઊભી કરી દેવામાં આવલી છે. બહેરામપુરામાં જ સુએઝ ફાર્મ પાસે ઝીબ્રાઈલ એસ્ટેટમાં ગેરકાયદે ફેક્ટરી ઊભી કરી દેવામાં આવી છે.  નારોલની સરદાર પટેલ એસ્ટેટમાં ચૈતર દળવીએ ગેરકાયદે ફેક્ટરી બનાવી દીધી છે.

આ જ રીતે બહેરામપુરામાં રોબસન રબર પાસે સિકંદર માર્કેટ રોડ પર ગેરકાયદે ફેક્ટરી, બહેરામપુરામાં જ મુખર્જી ભવન પાસે ફાઈનલ પ્લોટ નંબર 18-એ પીમાં ગેરકાયદે ફ્લેટ બની ગયા છે. બહેરામપુરામાંજ નવરંગ સ્કૂલની ગલીમાં  ટીપીએસ નંબર 88-2 પર 10થી 15 ગેરકાયદે રૉ હાઉસ બનાવી દેવામાં આવ્યા છે. નારોલમાં  ફાઈનલ પ્લોટ નંબર 69-1 પર ગેરકાયદે શૉ રૂમ ઊભો કરી દેવામાં આવ્યો છે. નારોલમાં જ ફાઈનલ પ્લોટ 82 પર ગેરકાયદેસર ફેક્ટરી ઊભી કરી દેવામાં આવી છે. નારોલમાં જ ફાઈનલ પ્લોટ નંબર 11-પી પર ગેરકાયદે ગોદામ બાંધી દેવામાં આવ્યું છે. દાણીલીમડા પોલીસ સ્ટેશન હેઠળની ચંડોળા ચોકી પર બેસીને કેટલાક સ્થાપિત હિતો ગેરકાયદેસર બાંધકામને પ્રોટેક્ટ કરવામાં પોલીસનો સાથ લઈ રહ્યા હોવાનું જાણવા મળી રહ્યું છે.  .