સ્કાઈવેઝ એર સર્વિસીસ IPO: રૂ. 582.80 કરોડનો ઈશ્યૂમાં લિસ્ટિંગનો લાભ લેવા રોકાણ કરાય કે નહીં?

લોજિસ્ટિક્સ ક્ષેત્રની હાલમાં જ લિસ્ટ થયેલી અન્ય કંપનીઓ એટલે કે ઓમ ફ્રેઈટ,  માઈનસ ૩૬ ટકા અને શેડોફેક્સ માઈનસ 11 ટકા નેગેટિવ લિસ્ટિંગ સાથે તેમનું પ્રદર્શન નબળું રહ્યું હોવાથી ગ્રે માર્કેટમાં આ આઈપીઓ માટે અત્યારે બહુ મોટો ઉત્સાહ નથી.

લોજિસ્ટિક્સ અને ફ્રેટ ફોરવર્ડિંગ ક્ષેત્રની અગ્રણી કંપની સ્કાઈવેઝ એર સર્વિસીસ લિમિટેડ પબ્લિક ઇશ્યૂ-આઈપીઓ લઈને આવી રહી છે. આ આઈપીઓ ૨૪ ઓગસ્ટ ૨૦૨૬ના રોજ સબ્સ્ક્રિપ્શન માટે ખૂલશે અને ૨૭ ઓગસ્ટ ૨૦૨૬ના રોજ બંધ થશે. આ કંપનીના પબ્લિક ઇશ્યૂમાં રોકાણ કરવું કે ન કરવું તે અંગે રોકાણકારો અવઢવમાં છે.

પબ્લિક ઇશ્યૂની મુખ્ય વિગતો

ઈશ્યૂ ખુલવાની તારીખ: ૨૪ ઓગસ્ટ, ૨૦૨૬

ઈશ્યૂ બંધ થવાની તારીખ: ૨૭ ઓગસ્ટ, ૨૦૨૬

પ્રાઈસ બેન્ડ: રૂ. ૧૩૧ થી રૂ. ૧૩૮ પ્રતિ શેર

લોટ સાઈઝ: ૧૦૦ શેર અને ન્યૂનતમ રોકાણ રૂ. ૧૩,૮૦૦

કુલ ઈશ્યૂ સાઈઝ: રૂ. ૫૮૨.૮૦ કરોડ, કુલ શેર્સ ૪,૨૨,૩૧,૬૦૦.

ફ્રેશ ઈશ્યૂ: ₹૩૯૮.૮૦ કરોડ (૨,૮૮,૯૮,૩૦૦ શેર)

ઓફર ફોર સેલ (OFS): ₹૧૮૪.૦૦ કરોડ (૧,૩૩,૩૩,૩૦૦ શેર)

લિસ્ટિંગ તારીખ (સંભવિત): ૧ સપ્ટેમ્બર, ૨૦૨૬ (BSE અને NSE પર)

લીડ મેનેજર: હોલાની કન્સલ્ટન્ટ્સ, શાલોન એડવાઈઝર્સ, દોલત ફિનસર્વ

કંપની વિશે ટૂંકમાં

૧૯૮૪માં સ્થાપવામાં આવેલી કંપની સ્કાઈવેઝ એર સર્વિસીસ છેલ્લા ચાર દાયકાથી એર ફ્રેટ ફોરવર્ડિંગ અને લોજિસ્ટિક્સ ક્ષેત્રે કાર્યરત છે. કંપની એર-ઓશન ફ્રેટ ફોરવર્ડિંગ, વેરહાઉસિંગ, કસ્ટમ બ્રોકિંગ અને ડ્રોન-એક્સપ્રેસ ડિલિવરી જેવી સેવાઓ પૂરી પાડે છે. વર્ષ ૨૦૨૨ થી ૨૦૨૫ સુધી સતત ૪ વર્ષ કંપની નંબર ૧ એર ફ્રેટ ફોરવર્ડર તરીકે ક્રમાંકિત થઈ છે. એર ઇન્ડિયા, એમિરાત, લુફ્થાન્સા અને સાઉદી કાર્ગો જેવી અગ્રણી એરલાઈન્સ સાથે કંપનીના વ્યાપારી જોડાણો આ કંપની ધરાવે છે.

કંપનીની નાણાકીય સ્થિતિ

વિગત (₹ કરોડમાં)	FY24	FY25	FY26
કુલ આવક	૧,૩૧૬.૮૧	૨,૨૭૦.૯૯	૨,૮૩૯.૬૭
કર પછીનો નફો (PAT)	૩૪.૪૯	૪૮.૧૪	૬૩.૫૨
EBITDA	૪૮.૩૪	૮૬.૪૯	૧૨૫.૬૫
કુલ દેવું (Borrowings)	૩૫૭.૩૪	૫૫૮.૪૩	૬૨૪.૦૬

(નોંધ: નાણાકીય વર્ષ ૨૦૨૫થી ૨૦૨૬ વચ્ચે કંપનીની આવકમાં ૨૫ ટકાઅને ચોખ્ખા નફામાં ૩૨ ટકાનો ઉત્સાહજનક વધારો થયો છે.)

ગ્રે માર્કેટ પ્રીમિયમ અને લિસ્ટિંગ ગેઈન સંકેત

ગ્રે માર્કેટના વલણ અનુસાર, હાલમાં આ સ્ટોકમાં ખૂબ જ મર્યાદિત અથવા ફ્લેટ પ્રીમિયમ જોવા મળી રહ્યું છે. લોજિસ્ટિક્સ ક્ષેત્રની હાલમાં જ લિસ્ટ થયેલી અન્ય કંપનીઓ એટલે કે ઓમ ફ્રેઈટ,  માઈનસ ૩૬ ટકા અને શેડોફેક્સ માઈનસ 11 ટકા નેગેટિવ લિસ્ટિંગ સાથે તેમનું પ્રદર્શન નબળું રહ્યું હોવાથી ગ્રે માર્કેટમાં આ આઈપીઓ માટે અત્યારે બહુ મોટો ઉત્સાહ નથી. તેથી માત્ર લિસ્ટિંગ ગેઈન મેળવવા માટે જઈ રહ્યા હોવ, તો હાલનો ટ્રેન્ડ બહુ આકર્ષક લાગતો નથી.

શા માટે અરજી કરવી?

કંપની મજબૂત બિઝનેસ મોડેલ ધરાવે છે. કંપની દેશની નંબર ૧ એર ફ્રેટ ફોરવર્ડર કંપની છે અને ચાર દાયકાનો અનુભવ ધરાવે છે. બીજુ, પબ્લિક ઇશ્યૂના નાણાંનો ઉપયોગ કંપની દેવું ચૂકવી દેવા માટે કરવાની યોજના ધરાવે છે. કંપનીના ફ્રેશ ઈશ્યૂમાંથી મળનારા રૂ. ૩૯૮.૮૦ કરોડમાંથી રૂ. ૨૧૬.૭૯ કરોડનો ઉપયોગ બાકી દેવું ચૂકવવા માટે થશે. તેનાથી કંપનીના વ્યાજ ખર્ચમાં ઘટાડો થશે અને ભવિષ્યમાં માર્જિન સુધરશે. ત્રીજું, કંપનીનો ગ્રોથ ટ્રેક રેકોર્ડ ઘણો જ સારો છે. છેલ્લા ૩ વર્ષમાં કંપનીની આવક અને નફામાં સતત બે આંકડામાં વૃદ્ધિ જોવા મળી છે. ચોથું, કંપની ટેક્નોલોજીનો ઉપયોગ સારી રીતે કરી રહી છે. કંપની એસએલએસ હાઈક અને કાર્ગો ડેશ જેવા પોતાના ડિજિટલ પ્લેટફોર્મ દ્વારા કંપની તેના કામકાજને વધુ ઝડપી અને કાર્યક્ષમ બનાવી રહી છે.

શા માટે અરજી ન કરવી?

કંપનીના પબ્લિક ઇશ્યૂમાં અરજી ન કરવાના પણ કારણો મોજૂદ છે. કંપનીના નફાનો ગાળો ઓછો છે. કંપનીનો વેરા પછીના નફાનું માર્જિન માત્ર ૨.૨૬ ટકા અને વેરા પહેલાનું માર્જિન ૪.૪૭ ટકા જ છે. આ દર્શાવે છે કે લોજિસ્ટિક્સ સેક્ટરના વધુ પડતા સ્પર્ધાત્મક વાતાવરણમાં કંપનીએ પ્રગતિ કરવાની છે. બીજું, ઓફર ફોર સેલ પણ અરજી ન કરવા માટેનું એક કારણ ગણી શકાય તેમ છે. આ પબ્લિક ઈશ્યૂમાં રૂ. ૧૮૪ કરોડનો હિસ્સો પ્રમોટર્સ અને અન્ય શેરધારકોનો છે. તેઓ પોતાનો હિસ્સો વેચી રહ્યા છે. ઓફર ફોર સેલથી થનારી આવકની રકમ કંપનીના વિકાસમાં વપરાશે નહીં.

ત્રીજું, સેક્ટરનું નબળું લિસ્ટિંગ થયું હોવાનું જોવા મળી રહ્યું છે. તાજેતરમાં લોજિસ્ટિક્સ ક્ષેત્રની લિસ્ટ થયેલી શિપરોકેટ સિવાયની મોટાભાગની કંપનીઓએ નેગેટિવ લિસ્ટિંગ આપ્યું છે. ચોથું, કંપનીને માથે દેવું વધી રહ્યું ચે. માર્ચ ૨૦૨૬ સુધીમાં કંપનીનું કુલ દેવું રૂ. ૬૨૪.૦૬ કરોડ પહોંચી ગયું છે, જે તેની નેટવર્થ રૂ.૩૩૨.૬૪ કરોડ કરતાં પણ વધુ છે.

કંપનીના આઈપીઓ અંગે અવલોકન

જો તમારો હેતુ માત્ર લિસ્ટિંગના દિવસે ૫-૧૦ ટકાનો નફો કમાવાનો હોય, તો આ આઈપીઓથી દૂર રહેવું અથવા છેલ્લે સુધી સબ્સ્ક્રિપ્શન ટ્રેન્ડ જોઈને નિર્ણય લેવો હિતાવહ છે. ગ્રે માર્કેટમાં કોઈ ખાસ ચાર્મ નથી. બીજું, લાંબા ગાળા માટે રોકાણ કરવા માગતા રોકાણકારો જાણી લે કે કંપની પોતાનું દેવું ચૂકવવા માટે આઈપીઓ ફંડનો ઉપયોગ કરી રહી છે, જે લાંબા ગાળે તેની બેલેન્સ શીટ મજબૂત કરશે. જો તમે લોજિસ્ટિક્સ સેક્ટરમાં રોકાણ કરવા માંગતા હોવ અને ૨ થી ૩ વર્ષનો દ્રષ્ટિકોણ ધરાવતા હોવ, તો આ આઈપીઓ સરેરાશથી સારો વિકલ્પ બની શકે છે.

આગામી ૩ થી ૫ વર્ષમાં સ્કાઈવેઝ એર સર્વિસીસની આવકમાં ૧૫ ટકાથી લઈને ૨૫ ટકા વાર્ષિક સર્વગ્રાહી વિકાસ દરે વધવાની સંભાવના છે. આ અંદાજ પાછળના મુખ્ય નાણાકીય અને વ્યૂહાત્મક કારણો નીચે મુજબ છે:

કંપનીનો અત્યાર સુધીનો ગ્રોથનો ટ્રેક રેકોર્ડ ઘણો જ સારો છે. નાણાકીય વર્ષ ૨૦૨૪ માં કંપનીની આવક રૂ. ૧,૩૧૬.૮૧ કરોડ હતી, જે ૨૦૨૬ માં વધીને રૂ. ૨,૮૩૯.૬૭ કરોડ થઈ છે. છેલ્લા ૨ વર્ષમાં આવકમાં ૧૧૫ ટકાથી વધુનો ઉછાળો આવ્યો છે. આ પબ્લિક હિસ્ટ્રી દર્શાવે છે કે કંપની પાસે વોલ્યુમ વધારવાની અને માર્કેટ શેર કેપ્ચર કરવાની ક્ષમતા છે.

તદુપરાંત કંપનીના વ્યાજ ખર્ચમાં ઘટાડો થવાનો છે. તેમ જ કંપની તેની ક્ષમતાનું વિસ્તરણ કરવાનું આયોજન કરી રહી છે. IPO ના ફ્રેશ ઈશ્યૂમાંથી મળનારા રૂ. ૩૯૮.૮૦ કરોડમાંથી રૂ. ૨૧૬.૭૯ કરોડનું દેવું ચૂકવવા માટે વાપરવામાં આવશે. વર્કિંગ કેપિટલ (કાર્યકારી મૂડી) માટે રૂ. ૧૩૦ કરોડ ફાળવવામાં આવ્યા છે. વ્યાજનો બોજ ઘટવાથી અને વર્કિંગ કેપિટલ મળવાથી કંપની મોટા ઓર્ડર અને ક્લાયન્ટ્સ મેળવી શકશે, જે સીધી આવક વધારવામાં મદદ કરશે.

એર ફ્રેટ ક્ષેત્રે નંબર-૧ પોઝિશન ધરાવતી કંપની છે. World ACD ના રિપોર્ટ મુજબ, ૨૦૨૨ થી ૨૦૨૫ સુધી સતત ૪ વર્ષ કંપની એરવેઝ બિલ્સની સંખ્યામાં ભારતની નંબર-૧ એર ફ્રેટ ફોરવર્ડર કંપની રહી છે. ગ્લોબલ એરલાઈન્સ સાથેના ટાઈ-અપ કંપનીને ઈન્ટરનેશનલ ટ્રેડ વધવાની સાથે સીધો ફાયદો કરાવશે.

ઈ-કોમર્સ અને ડિજિટલ પ્લેટફોર્મનો કંપનીને ફાયદો મળી રહ્યો છે. કંપની તેના પ્રોપરાઈટરી y ડિજિટલ પ્લેટફોર્મ્સ એસએલએસ 100 એક્સ અને કાર્ગો ડેશ તથા એસ-ગેટ ટેકના માધ્યમથી ઓટોમેશન તરફ આગળ વધી રહી છે. ભારતમાં ઈ-કોમર્સ અને એક્સપ્રેસ કાર્ગો લોજિસ્ટિક્સ ક્ષેત્રે વાર્ષિક ૧૫-૧૮ ટકાનો ગ્રોથ જોવા મળી રહ્યો છે, જેનો લાભ કંપનીને પણ મળી શકશે.

અવલોકન અને જોખમ

લોજિસ્ટિક્સ બિઝનેસમાં આવકનો આધાર વૈશ્વિક વેપાર અને ઇંધણના ભાવ પર નિર્ભર રહેલો છે. જો ગ્લોબલ મંદી કે જીઓપોલિટિકલ તણાવ વધે, તો ગ્રોથ રેટ ઘટીને ૧૦-૧૨ ટકા પર આવી શકે છે. પરંતુ વર્તમાન પરિસ્થિતિ અને દેવું ઘટાડવાની યોજના જોતાં કંપની ૧૫ ટકાથી વધુનો સરેરાશ આવક ગ્રોથ જાળવી રાખે તેવી પૂરી શક્યતા છે. સ્કાઈવેઝ એર સર્વિસીસ લિમિટેડના નાણાકીય આંકડા, ગ્રોથ પ્રોજેક્શન અને લોજિસ્ટિક્સ ક્ષેત્રની વર્તમાન સ્થિતિના આધારે ટૂંકા, મધ્યમ અને લાંબા ગાળામાં કંપની અને તેના શેરનું સંભવિત પરફોર્મન્સ નીચે મુજબ રહી શકે છે:

ટૂંકો ગાળોમાં અપેક્ષિત પરફોર્મન્સની વાત કરીએ તો મધ્યમથી સુસ્ત કે રેન્જ બાઉન્ડ અથવા તો સામાન્ય રહેવાની ધારણા છે. કંપનીનો આઈપીઓ માટેના ગ્રે માર્કેટ પ્રીમિયમમાં હાલમાં કોઈ મોટો ઉછાળો કે ચાર્મ જોવા મળી રહ્યો નથી. તેમ જ લોજિસ્ટિકના સેક્ટરની સ્થિતિ પણ અપેક્ષા પ્રમાણે બહુ સારી જણાતી નથી. તાજેતરમાં લિસ્ટ થયેલી લોજિસ્ટિક્સ કંપનીઓ એટલે કે ઓમ ફ્રેઈટ અને શેડોફેક્સનું શેરબજારનું પરફોર્મન્સ નબળું રહ્યું હતું. બંને શેર ઓફર પ્રાઈસ કરતાં નીચા ભાવે લિસ્ટ થયા હતા. તેના કારણે ટૂંકા ગાળાના રોકાણકારોનો ઉત્સાહ ઓછો છે.

કંપનીના પબ્લિક ઈશ્યૂમાં રૂ. ૧૮૪ કરોડનો હિસ્સો ઓફર ફોર સેલનો છે, જેથી શરૂઆતમાં સપ્લાય પ્રેશર રહી શકે છે. કા ગાળામાં કોઈ મોટા લિસ્ટિંગ ગેઈનની શક્યતા ઓછી છે. શેર લિસ્ટિંગ પ્રાઈસની આસપાસ જ ટ્રેડ કરે તેવી સંભાવના વધારે છે.

મધ્યમ ગાળાના એટલે કે છ માસથી માંડીને દોઢ વર્ષ સુધીના સમયગાળાના પરફોર્મન્સની વાત કરીએ તો કંપનીનુમ પરફોર્મન્સ સકારાત્મક અને સુધારાતરફી જોવા મળી શકે છે. નાણાકીય કારણોમાં ઊંડા ઉતરીએ તો વ્યાજ ખર્ચમાં ઘટાડો થશે. કંપનીને પબ્લિક ઇશ્યૂમાંથી મળનારા રૂ. ૨૧૬.૭૯ કરોડનો ઉપયોગ દેવું ચૂકવવા માટે જ કરવામાં આવશે. તેનાથી કંપનીના માસિક વ્યાજ ખર્ચમાં સીધો ઘટાડો થશે, જેની સકારાત્મક અસર આગામી ૨-૩ ક્વાર્ટર-ત્રિમાસિક પરિણામોના ચોખ્ખા નફા પર જોવા મળશે.

કંપનીને વર્કિંગ કેપિટલનો લાભ મળશે. પબ્લિક ઇશ્યૂ પછી રૂ. ૧૩૦ કરોડની વધારાની કાર્યકારી મૂડી મળવાથી કંપની તેના ઓપરેશન્સ અને બિઝનેસ વોલ્યુમ ઝડપથી વધારી શકશે. જેમ જેમ કંપની દેવું ઘટાડીને તેના નફાકારકતાના આંકડા સુધારશે, તેમ તેમ મધ્યમ ગાળામાં શેરમાં ધીમો પણ સ્થિર સુધારો જોવા મળશે. ત્રણથી પાંચ વર્ષના લાંબા ગાળાના પરફોર્મન્સની વાત કરવામાં આવે તો પરફોર્મન્સ મજબૂત અને આકર્ષક રહી શકે છે. બીજીતરફ લોજિસ્ટિકના સેક્ટરની આ કંપની માર્કેટ લીડર છે. કંપની દેશની નંબર-૧ એર ફ્રેટ ફોરવર્ડર છે અને ગ્લોબલ એરલાઈન્સ એર ઇન્ડિયા, અમિરાત અને લુફ્થાન્સા સાથે મજબૂત જોડાણ, ટાઈ-અપ ધરાવે છે.

કંપનીનો આવક ગ્રોથ પણ સારો રહેવાની ધારણા છે. છેલ્લા બે વર્ષમાં આવકમાં ૧૧૫ ટકાનો વધારો થયો છે. ભારત સરકારના મેન્યુફેક્ચરિંગ, નેશનલ લોજિસ્ટિક્સ પોલિસી અને ઈ-કોમર્સના વિકાસનો સીધો લાભ કંપનીને મળશે. બીજીતરફ કંપની ટેક્નોલોજીનો ઉપયોગ કરીને કાર્યક્ષમતામાં વધારો કરશે અને ખર્ચમાં ઘટાડો કરશે. કંપનીના પ્લેટફોર્મ્સ એસએલએસ 100 એક્સ, કાર્ગો ડેશના ઉપયોગથી કામકાજનો ખર્ચ ઘટશે અને લાંબા ગાળે વેરા પહેલાના માર્જિન ૫ ટકાને પાર કરી શકે છે. આમ લાંબા ગાળા માટે આ કંપનીનું ફંડામેન્ટલ સ્ટ્રક્ચર મજબૂત છે. જો રોકાણકાર ૩ થી ૫ વર્ષનો દ્રષ્ટિકોણ રાખે, તો આ શેર ઉત્તમ વળતર આપી શકે છે.

એક નજરે સમરી

સમયગાળો	અપેક્ષિત આઉટલુક	મુખ્ય ચાલક પરિબળ (Key Driver)
ટૂંકા ગાળો (Short Term)	ફ્લેટ / સીમિત નફો	સુસ્ત GMP અને સેક્ટરનું નબળું લિસ્ટિંગ ટ્રેન્ડ
મધ્યમ ગાળો (Medium Term)	સકારાત્મક (Positive)	દેવું ઘટવાથી વ્યાજનો બોજ ઓછો થવો અને નફો વધવો
લાંબો ગાળો (Long Term)	મજબૂત (Bullish)	એર ફ્રેટ ક્ષેત્રે નંબર-૧ પોઝિશન અને ૧૫%+ CAGR ગ્રોથ