એસએજીનું ટેન્ડર કૌભાંડઃ જૂડોની મેટમાં કટ મારતા અંદર પ્લાયવૂડ જોવા મળ્યું, મેટ આંતરરાષ્ટ્રીય સ્ટાન્ડર્ડની નથી
જૂડોની મેટ આંતરરાષ્ટ્રીય સ્ટાન્ડર્ડની હોવાનું પ્રમાણપત્ર હોવું જરૂરી, છતાં સર્ટિફિકેટ બતાવતા નથી
જૂડોના ઉપકરણોની ખરીદીમાં લોલેલોલ ચાલતું હોવાનો પુરાવો બહાર આવ્યો, સત્તાવાળાઓનું રહસ્યમય મૌન
સ્પોર્ટ્સ ઓથોરિટી ઓફ ઇન્ડિયાએ ઇન્ટરનેશનલ જૂડો ફેડરેશન માન્ય જૂડોની મેટ ખરીદી હોવાનો દાવો તો કર્યો છે, પરંતુ વાસ્તવમાં જૂડોની મેટ પર ખેલાડીઓને ઈજા થતી હોવાથી મેટ પર કટ મૂકીને જોતાં મેટમાં ખરેખર પ્લાયવૂડની શીટ હોવાનું બહાર આવ્યું છે. જૂડોની મેટ અને અન્ય સામગ્રી ખરીદવા માટે રૂ. 1.40થી રૂ. 1.75 કરોડનું ટેન્ડર બહાર પાડીને આ મેટની ખરીદી કરવામાં આવી હતી. મેટની સાથે અન્ય સામગ્રીમાં પણ ગરબડ હોવાની શંકા વ્યક્ત કરવામાં આવી રહી છે.
સૌથી આઘાતજનક વાત તો એ છે કે આ મેટ ઇન્ટરનેશનલ જૂડો ફેડરેશનના ધોરણ પ્રમાણેની હોવાનો દાવો તો કરવામાં આવે છે, પરંતુ તેને માટે જરૂરી ઇન્ટરનેશનલ જૂડો ફેડરેશનનું પ્રમાણપત્ર જ નથી. ઇન્ટરનેશનલ જૂડો ફેડરેશન અને જૂડો ફેડરેશન ઓફ ઇન્ડિયાનું એપ્રુવલ સર્ટિફિકેટ પણ તેમની પાસે ન હોવાનું જાણવા મળી રહ્યું છે.
જૂડોની મેટમાં પ્લાયવૂડ હોવાથી તેના પર પ્રેક્ટિશ કરી રહેલા સ્ટેટ લેવલના ખેલાડીઓને વાગી રહ્યું હોવા છતાંય તેઓ બોલી શકતા નથી. તેથી જ ટેન્ડરમાં નક્કી કરવામાં આવેલા સ્પેસિફિકેશન મુજબની જ મેટ કે સાધનો છે કે નહિ તે અંગે આશંકા વ્યક્ત કરવામાં આવી રહી છે. આ મેટનો ગેરન્ટી પિરિયડ બે વર્ષનો હોવાનું જાણવા મળી રહ્યું છે. આ મેટ 15 વર્ષની લાઈફ ધરાવતી હોવા છતાંય આજે બે વર્ષ પણ નથી થયા ત્યાં તે વચ્ચેથી વળવા માંડી છે.
પરંતુ સ્પોર્ટ્સ ઓથોરિટી ઓફ ગુજરાતના સત્તાવાળા તેની ગુણવત્તા અંગેનું પ્રમાણપત્ર જ આપતા નથી. તેથી પણ મેટની ક્વોલિટી કંગાળ હોવાની શંકા બળવત્તર બની રહી છે. ટેન્ડરની શરતોમાં પણ મેટનું સર્ટિફિકેટ આપવું ફરજિયાત હોવાનું જણાવવામાં આવ્યું હોવા છતાં તે સર્ટિફિકેટ આપવામાં આવતું નથી. ઓરિજિનલ ઇક્વિપમેન્ટ હોવાનું પ્રમાણપત્ર આપવું પણ ફરજિયાત છે.
જૂડોની મેટ અને અન્ય સાધનોનું કેટલોગ પણ આપવામાં આવતું ન હોવાથી મેટ અને અન્ય સાધોનોની ગુણવત્તા અંગેની આશંકા મજબૂત બની રહી છે.
