લેન્સકાર્ટ સોલ્યુશન્સનો આઈપીઓઃ લાંબા ગાળાના રોકાણકારો લિસ્ટિંગ પછીની ચાલ પર નજર રાખે

લેન્સકાર્ટ સોલ્યુશન્સનો આઈપીઓઃ લાંબા ગાળાના રોકાણકારો લિસ્ટિંગ પછીની ચાલ પર નજર રાખે

લેન્સકાર્ટ સોલ્યુશન્સના મજબૂત ફંડામેન્ટલ્સઃ વિદેશમાં વિસ્તરણ પર ફોકસ કરશે

લિસ્ટિંગનો લાભ લેવા ઇચ્છનારાઓ પણ ચેતીને રોકાણ કરે, ટૂંકા ગાળામાં નુકસાન થવાની પણ સંભાવનાઃ લિસ્ટિંગ ઊંચું થયા પછી ગગડી જવાની દહેશત

અમદાવાદઃ લેન્સકાર્ટ સોલ્યુશન્સ 2010માં અસ્તિત્વમાં આવેલી ચશ્માના ઉત્પાદન અને વેચાણના ક્ષેત્રની મજબૂત કંપની છે. કંપનીના સ્થાપક પિયૂષ બંસલ, અમિત ચૌધરી અને સુમીત કાપાહી છે. ઓનલાઈન રિટેઈલર તરીકે કંપની ચાલુ કર્યા પછી કંપની સતત વિસ્તરણ કરતી આવી છે. કંપનીની વેબસાઈટ અને મોબાઈલ એપ્લિકેશન પણ બિઝનેસ વધારવામાં ફાળો આપી રહી છે. આજે લેન્સકાર્ટ ચશ્માના ક્ષેત્રની દેશની અગ્રણી બ્રાન્ડ છે. કંપની સતત વિસ્તરણ કરવાની સાથે તેના કામકાજમાં વધારો કરી રહી છે. કામકાજની વૃદ્ધિ સાથે કંપનીનો નફો પણ વધી રહ્યો છે. લેન્સકાર્ટ એક ટેકનોલોજી આધારિત આઈવેર કંપની છે, જે ચશ્માં, સનગ્લાસ, કોન્ટેક્ટ લેન્સ અને એક્સેસરીઝનું ડિઝાઇન, મેન્યુફેક્ચરિંગ, બ્રાન્ડિંગ અને રિટેલિંગ કરે છે.

લેન્સકાર્ટ સોલ્યુશન્સ ડાયરેક્ટ-ટુ-કન્સ્યુમર (D2C) મોડલ હેઠળ કામ કરે છે અને પોતાની વિવિધ બ્રાન્ડ્સ દ્વારા તમામ ઉંમર અને ભાવ વર્ગના ગ્રાહકોને સેવા આપે છે. માર્ચ 2025 સુધીમાં કંપની પાસે કુલ 2,723 સ્ટોર હતા, તેમાંથી 2,067 ભારતમાં અને 656 વિદેશમાં છે. ભારતમાં 1,757 કંપનીના પોતાના સ્ટોર છે. 310 ફ્રેન્ચાઈઝી આધારિત સ્ટોર છે. આઈપીઓના નાણાંમાંથી રૂ. 272 કરોડ મૂડી ખર્ચ તરીકે વાપરશે. લીઝ, ભાડું અને લાઈસન્સના નાણાંની ચૂકવણી માટે રૂ.591 કરોડ ખર્ચશે. ટેક્નોલોજીમાં રૂ. 213 કરોડનો ઉપયોગ કરશે. તેમ જ માર્કેટિંગ અને પ્રમોશન માટે રૂ. 320 કરોડનો ખર્ચ કરશે. કંપની વિદેશમાં મોટે પાયે વિસ્તરણ કરવા માગે છે.

છ નવેમ્બરે એલોટમેન્ટ અને 10 નવેમ્બરે લિસ્ટિંગ

લેન્સકાર્ટને પબ્લિક ઇશ્યૂ 31મી ઓક્ટોબરે એટલે આજથી ખૂલી ગયો છે અને ચોથી નવેમ્બરે બંધ થશે. કંપનીના વૈશ્વિક સ્તરે વિસ્તરણ કરવાના હેતુથી આ પબ્લિક ઇશ્યૂ લાવી રહી છે. લેન્સકાર્ટ સોલ્યુશન્સ IPO માટેની અલોટમેન્ટ તારીખ 6 નવેમ્બર, 2025 છે. ઈશ્યુનું લિસ્ટિંગ BSE અને NSE પર 10 નવેમ્બરના રોજ થવાની સંભાવના છે.

ઓફર પ્રાઈસ

લેન્સકાર્ટ રોકાણકારોને રૂ. 382થી 402ના ભાવથી શેર્સ ઓફર કરી રહી છે. અપર પ્રાઈસ બેન્ડને આધારે ગણતરી માંડવામાં આવે તો કંપની બુક બિલ્ડિંગ ઇશ્યૂના માધ્યમથી રૂ. 7278.02 કરોડ આઈપીઓના માધ્યમથી એકત્રિત કરવા માગે છે. આ પબ્લિક ઇશ્યૂમાં લેન્સકાર્ટ રૂ. 2150 કરોડના નવા શેર્સ એલોટ કરવા જઈ રહી છે. અત્યારના ઇન્વેસ્ટર્સ અને પ્રમોટર્સના 5128.02 કરોડના શેર્સ ઓફર કરવા જઈ રહ છે. લેન્સકાર્ટ સોલ્યુશન્સ 5.35 કરોડ ફ્રેશ શેર્સ ઓફર કરી રહ્યું છે. તેમ જ 12.76 કરોડ શેર્સ પ્રમોટર્સ અને ઇન્વેસ્ટર્સના ઓફર કરી રહી છે.

અરજી કેટલાની કરશો

લેન્સકાર્ટના પબ્લિક  ઇશ્યૂમાં રોકાણ કરવા ઇચ્છતા કરદાતાઓએ રૂ.402ના અપર પ્રાઈસ બેન્ડને આધારે 37 શેર્સના એક લોટ માટે મિનિમમ રૂ. 14,874ની અરજી કરવી પડશે.  નાના એચએનઆઈ 518 શેર્સ એટલે કે 14 લોટ માટે અરજી કરીને રૂ. 2,08,236નો ચેક ઇશ્યૂ કરીને અરજી કરી શકે છે. તેમ જ મોટા એચએનઆઈ-હાઈ નેટવર્થ ઇન્ડિવિડ્યુઅલ 68 લોટ માટે એટલે કે 2516 શેર્સ માટે અરજી કરી શકશે. તેમણેરૂ. 10,11, 432નો ચેક જમા આપવો પડશે.

કંપનીની નાણાંકીય સ્થિતિ

2024-25ના વર્ષમાં કંપનીનો ચોખ્ખો નફો 297.3 કરોડનો રહ્યો છે. જોકે 2023-24ના વર્ષમાં કંપનીએ રૂ. 10.1 કરોડનું નુકસાન કર્યું હતું. 2023-24ના વર્ષમાં કંપનીની કુલ આવક રૂ. 5418 કરોડની હતી. 2024-25ના વર્ષમાં કંપનીની ચોખ્ખી આવક વધીને રૂ. 7009 કરોડ  થઈ ગઈ છે. 2024-25ના વર્ષમાં કંપનીએ નોંધપાત્ર વિસ્તરણ કર્યું છે. તેમ જ તેને માટે મોટું મૂડીરોકાણ પણ કર્યું છે. 2024-25ના નાણાંકીય વર્ષમાં કંપનીનું નફાનું માર્જિન વધીને એકદમ 68. ટકા થઈ ગયું છે, કારણ કે કંપનીઓ ચશ્માના મેન્યુફેક્ચરિંગની વ્યવસ્થા પોતે જ ઊભી કરી છે.

2024-25નું મજબૂત પરફોર્મન્સ

લેન્સ કાર્ટની આવકમાં 2024-25ના વર્ષમાં 2023-24ની તુલનામાં 25 ટકાનો વધારો થયો છે. 2024-25ના વર્ષમાં ઓનલાઈન અને  ઓફલાઈન વેચાણમાં ખાસ્સો વધારો થતાં કંપનીની આવકમાં તગડો વધારો થયો છે. લેન્સકાર્ટે તેની કાર્યક્ષમતામાં સુધારો કરતાં તેના માર્જિન અને નફાકારકતામાં વધારો થયો છે. કંપનીની નફાકારકતા વધારનારા પરિબળની વાત કરવામાં આવે તો કંપનીએ ઓનડેઝ નામની કંપની હસ્તગત કરી તે પછી તેના નફાકારકતામાં વધારો થયો છે. લેન્સકાર્ટે તમામ ખર્ચ એડજસ્ટ કર્યા પછી તેના નફામાં તગડો વધારો જોવા મળ્યો છે.

લેન્સકાર્ટનું નાણાંકીય પરફોર્મન્સ

વિષય                        2023-24             2024-25

કુલ આવક                    રૂ. 5428 કરોડ        રૂ. 7009 કરોડ

વેરા પછીનો ચોખ્ખો નફો      રૂ.10.1 કરોડ           રૂ. 297.2 કરોડ

વેરા પહેલાની આવક         લાગુ પડતું નથી              રૂ. 971.06 કરોડ

ગ્રે માર્કેટ પ્રીમિયમ-Grey market primium

બેસ્ટ નાણાંકીય પરફોર્મન્સ પછી આજથી પબ્લિક ઇશ્યૂ લાવેલી લેન્સકાર્ટના ગ્ર માર્કેટ પ્રીમિયમમાં ઘટાડો જોવા મળી રહ્યો છે. લેન્સકાર્ટનો પબ્લિક ઇશ્યૂ નજીક આવ્યો ત્યારે એટલે કે 26મી ઓક્ટોબરે લેન્સકાર્ટના શેર્સનું ગ્રે માર્કેટ પ્રીમિયમ રૂ. 120નું બોલાતું હતું. આજે એટલે કે 31મી ઓક્ટોબરે તેનો પબ્લિક ઇશ્યૂ ખૂલી રહ્યો છે ત્યારે તેનું ગ્રે માર્કેટ પ્રીમિયમ 60 ટકાથી વધુ ઘટીને રૂ. 48 પર આવી ગયું છે. શેર્સના મૂલ્ય અંગેની શંકા સંભવિત રોકાણકારોમાં વધી જતાં તેનું ગ્રે માર્કેટ પ્રીમિયમ ઘટી ગયું છે.

ગ્રે માર્કેટ પ્રીમિયમ દર્શાવે છે કે રોકાણકારો આઈપીઓના ભાવ ઉપર લાગી રહેલા પ્રીમિયમ પણ ચૂકવવા તૈયાર હોવાનો નિર્દેશ આપે છે. ટૂંકમાં રોકાણકારોને લાગે છે કે કંપનીએ-લેન્સકાર્ટે તેનો ઓફર ભાવ વાજબી રાખ્યો છે. તેથી જ ગ્રે માર્કેટમાં પ્રીમિયમ બોલાય છે. પરંતુ આ ભ્રમ આઈપીઓ આવે તે પહેલા જ ભાંગવા માંડ્યો છે. તેથી જ ગ્રે માર્કેટનું પ્રીમિયમ ઘટવા માંડ્યું છે (Lensecart grey market premium). તેથી નિષ્ણાતોના મતાનુસાર લેન્સકાર્ટ સોલ્યુસન્સમાં ઓફર પ્રાઈસથી અરજી કરીને લાંબા ગાળા માટે રોકાણ પકડી રાખનારાઓએ જ કરવું જોઈએ. લાંબા ગાળે વિસ્તરણને કારણે લેન્સકાર્ટની આવક અને નફો વધી શકે છે. હા, લિસ્ટિંગન લાભ મળે તો તે લઈને નીકળી જનારાઓ પણ વિકલ્પનો આશરો લઈ શકે છે. પરંતુ ગ્રેમાર્કેટના પ્રીમિયમ ગગડવા માંડ્યા છે તે જોતાં લિસ્ટિંગ લાભ લેવા માટે વિચારીને પછી જ અરજી કરવી જોઈએ.

રોકાણ કરવા અંગે નિષ્ણાતો શું કહે છે?

લેન્સકાર્ટ સોલ્યુશન્સના ફંડામેન્ટલ્સ મજબૂત છે. તે છતાંય વેલ્યુએશનમાં તમે વધુ નાણાં ન ચૂકવી દો તે માટે તમારા લિસ્ટિંગ થયા પછી તેમાં રોકાણ કરવાનો નિર્ણય લેવો જોઈએ. અલબત્ત લાંબા ગાળાના રોકાણકારોએ આ બાબતને ખાસ ધ્યાનમાં રાખવા જેવી છે. લિસ્ટિંગ પછીના પરફોર્મન્સને જોઈને રોકાણ કરવાનો નિર્ણય લેવો જોઈએ. ટૂંકમાં રોકાણ કરતાં પહેલા દોઢ બે મહિના રોકાઈ જવું જોઈએ, કારણ કે લેન્સકાર્ટે પબ્લિક ઇશ્યૂમાં ઓફર કરેલા શેર્સના મૂલ્ય અંગે આ અગાઉ જ વિવાદ થઈ ચૂક્યો છે. પ્રમોટર્સ બહુ જ ઓછા મૂલ્યના શેર્સને બહુ જ ઊંચા મૂલ્યથી ઓફર કરી રહ્યા છે તેમ જણાવવામાં આવી રહ્યું છે. લેન્સકાર્ટનું બિઝનેસ મોડેલ સારું છે. પરંતુ વેલ્યુએશનને મુદ્દે સવાલ ઊઠી રહ્યા છે. ઓફર પ્રાઈસ બહુ જ ઈંચી જણાય છે. કંપનીની શેરદીઠ કમાણીની તુલનાએ પણ શેરની ઓફર પ્રાઈસ ખાસ્સી ઊંચી છે. શોર્ટટર્મ ગેઈન માટે રોકાણ કરનારાઓ ગ્રે માર્કેટના પ્રીમિયમ જોતાં અરજી કરી શકે છે. છતાં તેમને માટે જોખમ તો છે જ છે. ઓફર પ્રાઈસ કરતાં નીચું લિસ્ટિંગ થાય તો ફટકો પડી શકે છે.