નેશનલ કોઓપરેટિવ ડેવલપમેન્ટ કોર્પોરેશનનો ૨૦૩૦-૩૧ સુધીમાં રૂ. ૪ લાખ કરોડ જેટલું જંગી ધિરાણ વિતરણનો લક્ષ્યાંક

• અમિત શાહે એનસીડીસીને આગામી 25 વર્ષ માટે એક વ્યાપક રોડમેપ તૈયાર કરવા નિર્દેશ આપ્યો છે. જેમાં સંસ્થાકીય માળખામાં ફેરફાર, મૂડી એકત્રીકરણ-રિસોર્સ મોબિલાઈઝેશન, નાણાકીય સ્વાયત્તતા અને કાર્યપ્રણાલીમાં સુધારાનો સમાવેશ થાય છે. એનસીડીસીનું લક્ષ્ય નાણાકીય વર્ષ 2030-31 સુધીમાં વાર્ષિક વિતરણ વધારીને રૂ. 4 લાખ કરોડ કરવાનું છે. તેમાંય પૂર્વોત્તર રાજ્યોને પશુપાલન, ડેરી અને મત્સ્યઉદ્યોગ ક્ષેત્રે 2030 સુધીમાં આત્મનિર્ભર બનાવવાનો લક્ષ્યાંક રાખવામાં આવ્યો છે. આ વિશેષ પ્રોજેક્ટ્સથી આ પ્રદેશની આવકમાં આશરે ₹32,800 કરોડનો વધારો થઈ શકે છે અને લગભગ 8 લાખ નવી રોજગારીની તકો ઊભી થશે. 

નવી દિલ્હીમાં યોજવામાં આવેલી બેઠકમાં તાજેતરમાં પસાર થયેલા રાષ્ટ્રીય સહકારી વિકાસ નિગમ (સુધારા) કાયદા, 2026 અંગે ચર્ચા કરવામાં આવી હતી, જે ઇક્વિટી અને શેર કેપિટલ દ્વારા સહકારી વિકાસ માટે રોકાણની નવી તકો ખોલે છે. સહકારી ક્ષેત્રમાં ઇનોવેશન  નવસંસ્કરણને પ્રોત્સાહન આપવા માટે રૂ.10 કરોડના ભંડોળ સાથે આ યોજના હેઠળ રૂ. 25 લાખ સુધીની ગ્રાન્ટ સહાય આપવામાં આવશે. ઓપન માર્કેટમાંથી સસ્તા દરે લોન મેળવવા માટે સરકાર દ્વારા એનસીડીસીને રૂ. 2,000 કરોડની ગ્રાન્ટ સહાય મંજૂર કરવામાં આવી છે, જેનાથી NCDC બજારમાંથી ₹20,000 કરોડ એકત્ર કરી શકશે. આ બેઠક વડાપ્રધાન નરેન્દ્ર મોદીના “સહકાર સે સમૃદ્ધિ” (સહકાર દ્વારા સમૃદ્ધિ) ના વિઝનને આગળ ધપાવવા અને ખેડૂતો, પશુપાલકો, માછીમારો અને ગ્રામીણ મહિલાઓને આર્થિક રીતે સશક્ત બનાવવાની દિશામાં અત્યંત મહત્વપૂર્ણ રહી.