ન્યૂ ક્લોથ માર્કેટના કાપડ વેપારીઓને હવે આંગણે જ મળશે પૂર્વ GST કમિશનરોનું નિષ્ણાત માર્ગદર્શન

મસ્કતી કાપડ મહાજન અને ન્યૂ ક્લોથ માર્કેટ એસોસિએશનના સહયોગથી ‘GSTMEN ASSOCIATES’ ની નવી ઓફિસનું ભવ્ય ઉદ્ઘાટન: વેપારીઓની GST નોટિસો, અપીલ અને ટેક્સ વિવાદો ઉકેલવામાં મોટી રાહત મળશે

અમદાવાદ: દેશના અગ્રણી અને ઐતિહાસિક ટેક્સટાઇલ હબ ગણાતા ન્યૂ ક્લોથ માર્કેટના કાપડ વેપારીઓ અને ઉદ્યોગકારોને GST અને પરોક્ષ કરવેરાને લગતા જટિલ પ્રશ્નોનું સરળ, પ્રમાણભૂત અને સમયસર નિવારણ મળી રહે તે હેતુથી, મસ્કતી કાપડ મહાજન અને ન્યૂ ક્લોથ માર્કેટ એસોસિએશનના વિશેષ સહયોગથી જાણીતી કરવેરા સલાહકાર સંસ્થા ‘GSTMEN ASSOCIATES’ની નવી બ્રાન્ચ ઓફિસનું ન્યૂ ક્લોથ માર્કેટ ખાતે શુભારંભ કરવામાં આવ્યું છે.

આ નવી ઓફિસનું ઉદઘાટન મસ્કતી કાપડ મહાજનના પ્રમુખ શ્રી ગૌરાંગભાઈ ભગતના વરદ હસ્તે ‘GSTMEN ASSOCIATES’ ના ભાગીદારો અને ટેક્સટાઇલ ક્ષેત્રના અગ્રણી વેપારીઓની ઉપસ્થિતિમાં કરવામાં આવ્યું હતું.

૪૦ વર્ષથી વધુ અનુભવી પૂર્વ કમિશનરોની ટીમોનો મળશે સીધો લાભ

‘GSTMEN ASSOCIATES’ ની સૌથી મોટી વિશેષતા એ છે કે આ સંસ્થામાં GST વિભાગના પૂર્વ કમિશનરો અને વરિષ્ઠ કર અધિકારીઓ સામેલ છે, જેમની પાસે ચાર દાયકા (૪૦ વર્ષ) કરતાં પણ વધુ સમયનો બહોળો અનુભવ છે. સંસ્થા દ્વારા દેશભરની વિવિધ હાઈકોર્ટ, સુપ્રીમ કોર્ટ તેમજ GST સત્તાધિકારીઓ સમક્ષ અનેક જટિલ કરવેરા કેસોમાં સફળ પ્રતિનિધિત્વ કરવામાં આવ્યું છે.

વેપારીઓને માર્કેટ સ્તરે જ કઈ-કઈ નવી સેવાઓ અને સુવિધાઓ મળશે?

નોટિસ અને ટેક્સ વિવાદોનું નિવારણ (Litigation & Appeals): GST તરફથી આવતી કારણ દર્શાવો નોટિસો, દંડ અથવા ટેક્સ તફાવત સંબંધિત વિવાદો અને અપીલોમાં નિષ્ણાત કાનૂની માર્ગદર્શન મળી રહેશે.

એડવાન્સ રુલિંગ અને લીગલ ઓપિનિયન: વેપારી પોતાના વ્યવસાયિક સોદાઓ કે પ્રોડક્ટ ટેક્સ રેટ અંગે સત્તાવાર કાનૂની અભિપ્રાય મેળવી શકશે.

જટિલ કાયદાકીય પાલન (Compliance Management): GST ના અટપટા કાયદાઓનું યોગ્ય અને સમયસર પાલન થાય તે માટેનું માર્ગદર્શન આપવામાં આવશે..

ઔદ્યોગિક પ્રોત્સાહનો (Industrial Incentives) અને NCLT: સરકાર તરફથી મળતી વિવિધ સબસીડી, ઇન્સેન્ટિવ્સ અને NCLT ને લગતા વિષયોમાં સેવાઓ પણ આપવામાં આવશે.

સમય અને નાણાંની બચત: વેપારીઓએ હવે ટેક્સ કન્સલ્ટન્ટ્સ કે કચેરીઓના ધક્કા ખાવા નહીં પડે; માર્કેટના કેન્દ્રસ્થાને જ તમામ ઉકેલ ઉપલબ્ધ થશે.

વેપારી આલમમાં હર્ષની લાગણી

મસ્કતી કાપડ મહાજન અને ન્યૂ ક્લોથ માર્કેટ એસોસિએશનના હોદ્દેદારોએ વિશ્વાસ વ્યક્ત કર્યો હતો કે, વેપારીઓના પોતાના વેપાર ધામમાં જ આ પ્રકારની અનુભવી સંસ્થા કાર્યરત થવાથી કાપડ બજારના વેપારીઓનો કિંમતી સમય બચશે. આ સાથે કાયદાકીય ગૂંચવણો દુર થશે અને વેપારીઓ ભયમુક્ત બનીને પોતાના બિઝનેસ ગ્રોથ પર વધુ ધ્યાન આપી શકશે.