શેરબજારમાં ગેરકાયદે ટીપ્સ અને ડબ્બા ટ્રેડિંગનું મોટું કૌભાં
શેરબજારમાં ગેરકાયદે ટીપ્સ અને ડબ્બા ટ્રેડિંગનું મોટું કૌભાંડ
નેશનલ સ્ટોક એક્સચેન્જે ગોકુલ પટેલ અને ગણેશ નાગરસેકર સહિત ‘સ્ટોક દોસ્ત’ ગ્રૂપ સાથી ડીલ કરવા સામે ચેતવણી આપી
અમદાવાદ: નેશનલ સ્ટોક એક્સચેન્જે શેરબજારના રોકાણકારોને ચેતવણી આપી બજારમાં ગેરકાયદેસર રીતે સ્ટોક ટીપ્સ આપવા, રોકાણ પર ચોક્કસ અથવા ગેરંટીડ વળતરની લાલચ આપવા અને ગેરકાયદેસર ‘ડબ્બા ટ્રેડિંગ’ ચલાવવા બદલ ગોકુલ પટેલ, ગણેશ નાગરસેકર અને ‘સ્ટોક દોસ્ત’ નામની સંસ્થા સાથે જોડાયેલા વ્યક્તિઓ સાથે ડીલ કરતાં પહેલા ચેતતા રહેવા જણાવ્યું છે. નેશનલ સ્ટોક એક્સચેન્જે સ્પષ્ટપણે જણાવ્યું છે કે આ તમામ ઓપરેટરો કે સંસ્થાઓ એક્સચેન્જ પાસે નોંધાયેલા નથી કે તેઓ કોઈ રજિસ્ટર્ડ સભ્યો દ્વારા અધિકૃત કરવામાં આવ્યા નથી. આવા ગેરકાયદેસર યોજનાઓ ચલાવતા ગુનેગારો અને ઓપરેટરો સામે એક્સચેન્જે સખત પગલાં લેવાની સાથે રોકાણકારોને તેમની જાળમાં ન ફસાવવા માટે તાકીદ કરી છે.
ગોકુલ પટેલ અને ગણેશ નાગરસેકરની મોડસ ઓપરેન્ડી
એક્સચેન્જે જારી કરાયેલી સત્તાવાર માહિતી અનુસાર ગોકુલ પટેલ નામનો વ્યક્તિ એક ચોક્કસ મોબાઈલ નંબર (9696683892) થકી રોકાણકારોનો સંપર્ક કરીને શેરબજારની ટીપ્સ આપતો હતો. તે બજારમાં નક્કી અથવા અપેક્ષિત વળતર આપવાનું વચન આપીને લોકોને ફસાવતો હતો. કાયદા અનુસાર શેરબજારમાં કોઈ પણ પ્રકારના ગેરંટીડ વળતરની ઓફર આપવી એ ગેરકાયદેસર અને ગુનો છે.
બીજા ઓપરેટર ગણેશ નાગરસેકર સામેની તપાસમાં સામે આવ્યું છે કે તે ટેલિગ્રામ એપ્લિકેશન પર ‘ઇન્ટ્રાડે હિરો ઝીરો ટ્રેડિંગ’, ‘ટ્રેડ વિથ લોજિક’ જેવા ગ્રૂપ અને ‘પેઇડ ગ્રૂપ એડવાઇઝર’ નામની આઈડી બનાવીને સક્રિય હતો. તે ટેલિગ્રામ ચેનલો દ્વારા લોકોને સ્ટોક ટીપ્સ આપી શેરબજારમાં રોકાણ પર ગેરંટીડ વળતરની લાલચ આપતો હતો. એક્સચેન્જે સ્પષ્ટ કર્યું છે કે નાગરસેકર એક્સચેન્જનો સભ્ય કે અધિકૃત વ્યક્તિ નથી. રોકાણકારોને સૂચના આપવામાં આવી છે કે તેઓ પોતાની યુઝર આઈડી કે પાસવર્ડ જેવા ગુપ્ત ક્રેડિશિયલ્સ કોઈની સાથે શેર કરવો નહિ.
‘સ્ટોક દોસ્ત’ દ્વારા ગેરકાયદેસર ડબ્બા ટ્રેડિંગનો ગોટાળો
ઉપરાંત, ‘સ્ટોક દોસ્ત’ નામના એન્ટિટી સાથે જોડાયેલા કેટલાક વ્યક્તિઓ ફેસબુક અને ઓનલાઈન એપ્લિકેશન દ્વારા મોટું કૌભાંડ ચલાવી રહ્યા હોવાનું બહાર આવ્યું છે. આ ઓપરેટરો ‘ઓનલાઈન ડબ્બા ટ્રેડિંગ’, ‘ઇન્ડિયાઝ બેસ્ટ ડબ્બા ટ્રેડિંગ પ્લેટફોર્મ’ અને ‘ઓનલાઈન ડબ્બા ટ્રેડિંગ મુંબઈ’ જેવા ફેસબુક ગ્રૂપ તેમ જ ચોક્કસ વેબસાઈટ (stockdost.cloud) અને એપ્લિકેશન લિંક્સ દ્વારા બજારની બહાર ગેરકાયદેસર રીતે ડબ્બા ટ્રેડિંગ ચલાવી રહ્યા હતા. તેઓ રોકાણકારોને વળતરની ગેરંટી આપીને ગેરકાયદેસર સેટલમેન્ટ સેવાઓ પૂરી પાડતા હતા. નેશનલ સ્ટોક એક્સચેન્જે આ અંગે પોલીસ ફરિયાદ પણ નોંધાવી છે. ડબ્બા ટ્રેડિંગ એ શેરબજારના સત્તાવાર પ્લેટફોર્મની બહાર થતો ગેરકાયદેસર વ્યવહાર છે, જે ભારતમાં સખત ગુનો ગણાય છે.
૧૦ વર્ષની જેલ અને રૂ. ૨૫ કરોડ સુધીનો દંડ થઈ શકે
ડબ્બા ટ્રેડિંગના ગંભીર કાનૂની પરિણામો અંગે ચેતવણી આપતા નેશનલ સ્ટોક એક્સચેન્જે જણાવ્યું છે કે સિક્યોરિટીઝ કોન્ટ્રાક્ટ્સ (રેગ્યુલેશન) એક્ટ, ૧૯૫૬ (SCRA)ની કલમ ૨૩(૧) હેઠળ આવા ગેરકાયદે વ્યવહારો કરવા બદલ દોષિત ઠરનાર વ્યક્તિને ૧૦ વર્ષ સુધીની કેદની સજા, રૂ. ૨૫ કરોડ સુધીનો દંડ અથવા બંને થઈ શકે છે. આ પ્રકારના ગુના દખલપાત્ર છે અને ભારતીય ન્યાય સંહિતા, ૨૦૨૩ની વિવિધ કલમો હેઠળ પણ તેમની સામે સખત કાર્યવાહી પણ થઈ શકે છે.
રોકાણકારો માટે મહત્વની સલાહ
નેશનલ સ્ટોક એક્સચેન્જે રોકાણકારોને વિનંતી કરી છે કે તેઓ આવી કોઈ પણ યોજનામાં રોકાણ કરતા પહેલાં સેવા આપનાર વ્યક્તિ કે સંસ્થાની નોંધણીની ચકાસણી એક્સચેન્જની સત્તાવાર વેબસાઈટ પરથી ચોક્કસ કરી લે. આવા ગેરકાયદેસર પ્લેટફોર્મ પર રોકાણ કરવાથી રોકાણકારોને એક્સચેન્જ તરફથી મળતા ગ્રાહક સુરક્ષા, વિવાદ નિવારણ અને ફરિયાદોના નિવારણ જેવા કાનૂની અધિકારો અને રક્ષણનો લાભ મળશે નહીં. આથી આવી અજાણી અને લાલચુ ઓફરોથી દૂર રહેવું જ હિતાવહ છે.
