PM મોદીએ નવી મુંબઈ આંતરરાષ્ટ્રીય એરપોર્ટનું ઉદ્ઘાટન કર્યું, વિશ્વ કક્ષાની સુવિધાઓથી છે સજ્જ
વડાપ્રધાન નરેન્દ્ર મોદીએ આજે (8 ઓક્ટોબર) નવી મુંબઈ આંતરરાષ્ટ્રીય એરપોર્ટ (NMIA) ના પ્રથમ તબક્કાનું ઉદ્ઘાટન કર્યું. આશરે 19,650 કરોડના ખર્ચે બનેલ, NMIA ભારતનું સૌથી મોટું ગ્રીનફિલ્ડ એરપોર્ટ છે, જે જાહેર-ખાનગી ભાગીદારી હેઠળ બનાવવામાં આવ્યું છે. તે મુંબઈ મેટ્રોપોલિટન રિજન (MMR)નું બીજું આંતરરાષ્ટ્રીય એરપોર્ટ છે, જે મુંબઈના છત્રપતિ શિવાજી મહારાજ આંતરરાષ્ટ્રીય એરપોર્ટ (CSMIA) કરતા બમણું છે.
19,450 કરોડના ખર્ચે બનેલ, તે લાખો મુસાફરોને હેન્ડલ કરવાની ક્ષમતા ધરાવે છે.
1,160 હેક્ટરમાં ફેલાયેલું આ અત્યાધુનિક એરપોર્ટ વિશ્વના સૌથી કાર્યક્ષમ એરપોર્ટમાંનું એક બનવા માટે ડિઝાઇન કરવામાં આવ્યું છે. છત્રપતિ શિવાજી મહારાજ આંતરરાષ્ટ્રીય એરપોર્ટ સાથે જોડાણમાં કાર્ય કરશે. NMIA અનેક તબક્કામાં બનાવવામાં આવી રહ્યું છે. એકવાર સંપૂર્ણ રીતે કાર્યરત થયા પછી, NMIA 9 કરોડ મુસાફરોને સેવા આપી શકશે અને વાર્ષિક 3.2 મિલિયન મેટ્રિક ટન (MMT) થી વધુ કાર્ગોનું સંચાલન કરી શકશે.
નવી મુંબઈ આંતરરાષ્ટ્રીય વિમાનમથક સ્થાનિક અને આંતરરાષ્ટ્રીય બંને પ્રકારના પ્રવાસીઓ માટે અત્યાધુનિક સુવિધાઓથી સજ્જ છે. આમાં 3,700 મીટર લાંબો રનવે, આધુનિક પેસેન્જર ટર્મિનલ અને મોટા વાણિજ્યિક વિમાનોને હેન્ડલ કરવા માટે એક અદ્યતન એર ટ્રાફિક કંટ્રોલ સિસ્ટમનો સમાવેશ થાય છે.
એરપોર્ટની ડિઝાઇન ભારતના રાષ્ટ્રીય ફૂલ, કમળથી પ્રેરિત છે. ટર્મિનલની છત કમળની પાંખડીઓ જેવી ડિઝાઇન કરવામાં આવી છે, જે 12 સુંદર સ્તંભો દ્વારા સપોર્ટેડ છે.
એરપોર્ટની સૌથી મહત્વપૂર્ણ વિશેષતા ઓટોમેટેડ પીપલ મૂવર (APM) સિસ્ટમ છે, જે ચારેય ટર્મિનલને સીમલેસ મુસાફરોની અવરજવર માટે જોડે છે. તેમાં 47 મેગાવોટ સૌર ઉર્જા ઉત્પાદન, ટકાઉ ઉડ્ડયન બળતણ (SAF) સંગ્રહ અને EV બસ કનેક્ટિવિટી પણ હશે. NMIA દેશનું પ્રથમ એરપોર્ટ પણ હશે જે વોટર ટેક્સી દ્વારા જોડાયેલ હશે.
એર ઇન્ડિયા એક્સપ્રેસ, ઇન્ડિગો અને અકાસા એર જેવી એરલાઇન્સે નવી મુંબઈ આંતરરાષ્ટ્રીય વિમાનમથકથી વિવિધ સ્થાનિક શહેરો માટે ફ્લાઇટ્સ શરૂ કરવાની યોજના જાહેર કરી છે.
અદાણી એરપોર્ટ્સ હોલ્ડિંગ્સ લિમિટેડની પેટાકંપની મુંબઈ ઇન્ટરનેશનલ એરપોર્ટ લિમિટેડ, NMIAમાં 74 ટકા હિસ્સો ધરાવે છે અને CIDCO 26 ટકા હિસ્સો ધરાવે છે.
