PNG ઉપલબ્ધ હોય ત્યાં LPG ગેસ સપ્લાય બંધ કરવા સરકારનો આદેશ
હાઉસિંગ સોસાયટી PNG કનેક્શન લેવા માટેની પરવાનગી નહીં આપે તો 3 મહિનામાં LPG-રાંધણગેસના બાટલાનો સપ્લાય બંધ થઈ જશે
પાઈપ દ્વારા નેચરલ ગેસ (PNG) જે ઘરોમાં ગેસ સપ્લાય ઉપલબ્ધ હોય ત્યાં ઘરેલુ ગ્રાહકો LPG એટલે કે રાંધણગેસના બાટલાનો ગેસનો ઉપયોગ ચાલુ રાખી શકશે નહીં. આ વિસ્તારમાં રહેતા ગ્રાહકો ત્રણ મહિનામાં PNG કનેક્શન પર સ્વિચ નહીં કરે તો તેમની LPG સપ્લાય બંધ કરી દેવામાં આવશે. આ નિર્ણય ગેસ પાઈપલાઈન નેટવર્કનો ઉપયોગ ઝડપી બનાવવાના અને એક જ ઇંધણ પર નિર્ભરતા ઘટાડવાના હેતુથી લેવામાં આવ્યો છે.
આમ PNG ઉપલબ્ધ હોય ત્યાં LPG સપ્લાય બંધ થશે. બીજું, ત્રણ મહિનામાં PNG પર સ્વિચ કરવું ફરજિયાત કરી દેવામાં આવ્યું છે. તેમ જ ગેસ પાઈપલાઈન ઇન્ફ્રાસ્ટ્રક્ચર વધારવા પર ભાર મૂકવાનો નિર્ણય લેવામાં આવ્યો છે. અત્યારે વૈશ્વિક પરિસ્થિતિ એટલે કે અમેરિકા અને ઇઝરાયેલા સાથે મળીને ઇરાન પર કરેલા આક્રમણને કારણે LPG સપ્લાયમાં તંગી ઊભી થઈ છે.
ભારત હાલમાં પશ્ચિમ એશિયામાં ચાલી રહેલા યુદ્ધના કારણે LPG સપ્લાયમાં મુશ્કેલીનો સામનો કરી રહ્યું છે. ગલ્ફ દેશોમાં ગેસ પ્રોસેસિંગ સુવિધાઓને નુકસાન અને હોર્મુઝની ખાડીમાં અવરોધ જેવી પરિસ્થિતિઓને કારણે સપ્લાય અસરગ્રસ્ત થયો છે. તેથી ભારત સરકાર હવે ઘરેલુ અને વ્યાવસાયિક બંને ગ્રાહકોને PNG તરફ વળવા પ્રોત્સાહિત કરી રહી છે, કારણ કે PNG સતત પાઈપ દ્વારા મળે છે અને સિલિન્ડર બુકિંગ કરવાની જરૂર રહેતી નથી.
નવો નિયમ અને અમલીકરણ
પેટ્રોલિયમ અને નેચરલ ગેસ મંત્રાલયે 2026નો નવો ઓર્ડર જાહેર કર્યો છે, જે પાઈપલાઈન બાંધકામ, ઓપરેશન અને વિસ્તરણને ઝડપી બનાવશે. PNG ઉપલબ્ધ હોવા છતાં સ્વિચ ન કરનાર ગ્રાહકોની LPG સપ્લાય 3 મહિનામાં બંધ થઈ જશે. ટેકનિકલી શક્ય ન હોય તો તેવા કનેક્શન ધારકોએ NOC લેવી પડશે. એનઓસીને આધારે જ LPG ચાલુ રાખી શકાશે
અમલી પ્રક્રિયા સરળ બનાવાઈ
પીએનજીના જોડાણ માટે હાઉસિંગ સોસાયટીમાં 3 દિવસમાં પરમિશન આપવી પડશે. તેમ જ PNG કનેક્શન 48 કલાકમાં આપવાનું રહેશે. મંજૂરીમાં વિલંબ થાય તો મંજૂરી આપમેળે માન્યતા મળી ગઈ હોવાનું ગણી લેવાશે. પેટ્રોલિયમ અને નેચરલ ગેસ રેગ્યુલેટરી બોર્ડ (PNGRB) આ પ્રક્રિયાની દેખરેખ કરશે. કનેક્શનને મંજૂરી આપવાની, કનેક્શનની અરજીને રિજેક્ટ કરવાના નિર્ણય પર નજર રાખશે. તેમ જ અમલીકરણ પર નજર રાખશે વિવાદો માટે સત્તાધિકારીઓને કોર્ટ જેવી શક્તિ આપવામાં આવશે.
મહત્વપૂર્ણ જોગવાઈ
જો હાઉસિંગ સોસાયટી PNG કનેક્શન માટે પરવાનગી નહીં આપે તો 3 મહિનામાં LPG-રાંધણગેસના બાટલાનો સપ્લાય બંધ થઈ જશે. આમ સંપૂર્ણ સોસાયટીઓને પીએનજી જોડાણ લેવાની ફરજ પડશે. પરંતુ જો ટેકનિકલ કારણોસર PNG શક્ય ન હોય LPG સપ્લાય ચાલુ રહેશે. હા તેને માટે NOC લેવું પડશે. આ નિર્ણય લેવામાં આવ્યો હોવાથી ગેસ નેટવર્કનું વિસ્તરણ થશે. તેમ જ દેશની ઊર્જા સુરક્ષા મજબૂત બનશે. રાંધણગેસના બાટલા-LPG પરનો ભાર ઓછો થશે
