કોમર્શિયલ ગેસના ભાવમાં કરેલા વધારાનો બોજ પ્રજાને માથે જ આવશે
હોટેલ રેસ્ટોરાંની આઈટેમ્સ મોંઘી થશે, કીટલી પર વેચાતી ચાના ભાવમાં રૂ. 2થી 5નો વધારો કરી દેવામાં આવશે.
પેટ્રોલ-ડીઝલના ભાવ વધારશે તો શાકભાજી સહિતની ઘરવપરાશની ચીજવસ્તુઓના ભાવ પર પણ તેની અસર જોવા મળશે
અમદાવાદઃ ભારતમાં 1 મે 2026થી 19 કિગ્રા કોમર્શિયલ LPG સિલિન્ડરની કિંમતમાં ₹993નો ભારે વધારો કરવામાં આવ્યો તેની અસર દરેક રેસ્ટોરાંમાં વપરાતી ખાદ્ય સામગ્રીના ભાવમાં વધારા રૂપે પ્રજાને માથે જ આવી જશે. કોમર્શિયલ ગેસ સિલિન્ડરના ભાવમાં કરવામાં આવેલા અત્યાર સુધીના સૌથી મોટા વધારાને પરિણામે કીટલી પર ચા વેચનારાઓ પણ ચાના ભાવમાં રૂ. 2થી 5નો વધારો કરી દે તેવી સંભાવના છે. રેસ્ટોરાં માલિકોએ અગાઉ પણ થાળીના ભાવમાં રૂ. 30નો વધઆરો કરી દીધો હતો. હવે હજી મોટો વધારો કરી દેશે. તેમ નહિ કરે તો થાળીમાં પીરસવામાં આવતી વસ્તુઓની સંખ્યામાં ઘટાડો કરી દેવામાં આવે તેવી સંભાવના છે.
ત્યારબાદ સંભવતઃ પેટ્રોલ અને ડીઝલના ભાવમાં વધારો કરવામાં આવે તેવી સંભાવના છે. વિધાનસભાની ચૂંટણી પતી ગયા પછી પણ પશ્ચિમ બંગાળમાં કેટલાક વિસ્તારોમાં ફેર મતદાન કરવાની નોબત આવી હોવાથી પેટ્રોલ-ડીઝલમાં ભાવ વધારો કરવાનું ટૂંકા ગાળા માટે મુલતવી રાખવામાં આવ્યં હોવાનું માનવામાં આવે છે. આંતરરાષ્ટ્રીય બજારમાં ક્રૂડ ઓઈલના બેરલદીઠ ભાવ 115 અમેરિકી ડૉલરથી ઉપર પહોંચી ગયા હોવાથી આ ભાવ વધારો આવવાની શક્યતા વધારે છે. ઇરાન-અમેરિકા વચ્ચે યુદ્ધ શરૂ થયું તે વખતે ક્રૂડ ઓઈલના બેરલદીઠ ભાવ 60 ડૉલરની આસપાસના હતા. આજે લગભગ બમણા થઈ ગયા છે. ક્રૂડના ભાવ વધી ગયા હોવા છતાં પેટ્રોલ ડીઝલના ભાવ ન વધાર્યા હોવાથી ઓઈલ માર્કેટિંગ કંપનીઓની ખોટ સતત વધી રહી છે.
બીજું, ભાવ ઊંચા હોવા છતાંય પશ્ચિમ એશિયામાં ચાલી રહેલા યુએસ-ઇઝરાઇલ-ઇરાન યુદ્ધના કારણે વૈશ્વિક ઊર્જા સપ્લાય ચેઇનમાં વિક્ષેપ થયો છે. શોર્ટ સપ્લાય પણ ભાવમાં વધારા માટે જવાબદાર છે. ભારતનો નવો સપ્લાય ન આવે તો 30થી 45 દિવસ પછી તીવ્ર અછત ઊભી થવાની સંભાવના છે.
ભાવ વધારા પછી દિલ્હીમાં 19 કિગ્રા સિલિન્ડરની કિંમત હવે રૂ.3,071.50 થઈ ગઈ છે. એપ્રિલ 2026માં તેની કિંમત રૂ. 2,078.50 હતી. મુંબઈમાં રૂ.3,024, ચેન્નાઈમાં રૂ. 3,259.50 અને કોલકાતામાં રૂ. 3,355 સુધી પહોંચી ગયા છે. બેંગલુરુમાં ભાવ રૂ. 3,152 સુધી પહોંચ્યા છે. આ ભાવ કોમર્સિયલ સિલિન્ડરના ભાવની તવારીખમાં સૌથી ઊંચો છે. ભારતના ઈતિહાસમાં પહેલીવાર 19 કિગ્રા રાંધણગેસના સિલિન્ડરની કિંમત રૂ. 3,000ને પાર ગઈ છે. 5 કિગ્રા નાના સિલિન્ડરની કિંમતમાં પણ રૂ. 261નો વધારો કરવામાં આવ્યો છે.
જોકે સરકારએ ઘરેલું 14.2 કિગ્રાના રાંધણગેસના સિલિન્ડરના ભાવમાં હાલ કોઈ ફેરફાર કર્યો નથી. દિલ્હીમાં ઘરેલું સિલિન્ડર હજુ રૂ. 913માં ઉપલબ્ધ છે. ઈન્ડિયન ઓઈલ કોર્પોરેશનના જણાવ્યા મુજબ લગભગ 80 ટકા પેટ્રોલિયમ ઉત્પાદનોના ભાવમાં કોઈ ફેરફાર કરવામાં આવ્યો નથી. પરિણામે સામાન્ય ગ્રાહકો પર અસર ઓછી રહેશે. આ વધારો ઈરાન યુદ્ધ શરૂ થયા બાદ ચોથી વખત કરવામાં આવ્યો છે. યુદ્ધને કારણે વિશ્વભરમાં ક્રૂડ ઓઈલના સપ્લાય પર ભારે અસર પડી છે અને ક્રૂડ ઓઈલના ભાવ $120 પ્રતિ બેરલ ઉપર પહોંચી ગયા છે.
સરકારએ ડીઝલ અને એવિયેશન ટર્બાઈન ફ્યુઅલની નિકાસ પર ટેક્સમાં ફેરફાર કર્યો છે, પરંતુ દેશના પેટ્રોલ અને ડીઝલના ભાવ યથાવત્ રાખ્યા છે. કોમર્શિયલ રાંધણગેસના વધેલા ભાવને કારણે હોટેલ, રેસ્ટોરન્ટ અને ફૂડ બિઝનેસના ખર્ચમાં વધારો થશે અને મેનુના ભાવ પણ વધી શકે છે.
