RBI એ ભારતીય ઇક્વિટી અને ડેટ માર્કેટમાં વિદેશી રોકાણ વધારવા માટે નિયમો હળવા કર્યા
છેલ્લા કેટલાક સમયથી વિદેશી સંસ્થાકીય રોકાણકારો સતત વેચવાલ રહી હોવાથી ભારતીય શેરબજારમાં તોફાની વધઘટ જોવા મળી રહી છે. બજારમાં સ્થિરતા જોવા મળી રહી નથી.
ભારતીય નાણાકીય બજારોમાં વિદેશી રોકાણને આકર્ષવા માટે ભારતીય રિઝર્વ બેંક (RBI) એ શુક્રવારે મહત્વના ફેરફારોની જાહેરાત કરી છે. આ પગલાંનો ઉદ્દેશ્ય ભારતીય શેરબજાર અને સરકારી બોન્ડ માર્કેટમાં વિદેશી મૂડીનો પ્રવાહ વધારવાનો અને બજારમાં લિક્વિડિટી સુધારવાનો છે. આગામી અઠવાડિયાઓમાં શેરબજારની ચાલમાં સુધારો જોવા મળી શકે છે. છેલ્લા કેટલાક સમયથી વિદેશી સંસ્થાકીય રોકાણકારો સતત વેચવાલ રહી હોવાથી ભારતીય શેરબજારમાં તોફાની વધઘટ જોવા મળી રહી છે. બજારમાં સ્થિરતા જોવા મળી રહી નથી. પરિણામે ટ્રેડર્સ અને ઇન્વેસ્ટર્સ પણ વળતર મળવાને બદલ નુકસાન થવાની ભીતિથી બજારથી થોડા દૂર રહેવાનું પસંદ કરી રહ્યા છે. હા, માત્ર સિસ્ટેમેટિક ઇન્વેસ્ટમેન્ટ પ્લાનને વળગી રહેનારાઓ થકી બજારમાં રોકાણ આવી રહ્યું છે. તેમ જ સ્થાનિક સંસ્થાકીય રોકાણકારો બજારમાં લેણ કરીને વિદીશી સંસ્થાકીય રોકાણકારોની વેચવાલીની અસરને નિયંત્રિત કરવાની કામગીરી કરી રહી છે.
ઇક્વિટી માર્કેટ: NRIs અને Overseas Citizens of India (OCIs) માટે લિસ્ટેડ શેરોમાં રોકાણની મર્યાદા વધારી દેવામાં આવી છે. હવે તેમને SEBI માં નોંધણી કરાવ્યા વગર રોકાણ કરવાની સુવિધા મળશે. આ સુવિધા તમામ ‘Persons Resident Outside India’ (PROIs) માટે લાગુ કરવામાં આવી છે.
ડેટ માર્કેટ (બોન્ડ): સરકારના ૧૫, ૩૦ અને ૪૦ વર્ષના તમામ નવા બોન્ડ્સને ‘Fully Accessible Route’ (FAR) હેઠળ લાવવામાં આવ્યા છે. આનો અર્થ એ છે કે વિદેશી રોકાણકારો હવે આ બોન્ડ્સમાં કોઈપણ રોકાણ મર્યાદા વગર રોકાણ કરી શકશે.
ટૂંકા ગાળાના રોકાણ: FPIs માટે ટૂંકા ગાળાના રોકાણ અંગેની મર્યાદાઓ પાછી ખેંચી લેવામાં આવી છે, જે સરકારી બોન્ડ માર્કેટમાં વધુ સુગમતા લાવશે.
ટેક્સમાં રાહત: વિદેશી સંસ્થાકીય રોકાણકારો (FIIs) ને સરકારી સિક્યોરિટીઝમાંથી થતી આવક પર કેપિટલ ગેઇન્સ ટેક્સમાંથી મુક્તિ આપવામાં આવી છે, જે ભારતીય ડેટ માર્કેટને વધુ આકર્ષક બનાવશે.
નિષ્ણાતો શું કહે છે
બજારના નિષ્ણાતો માને છે કે આ નિર્ણયથી ભારતીય રૂપિયામાં સ્થિરતા આવશે અને લાંબા ગાળે વિદેશી મૂડીનો પ્રવાહ વધશે. આ પગલાં ભારતને ‘ગ્લોબલ ફાઇનાન્શિયલ હબ’ બનાવવાની દિશામાં એક મહત્વનું ડગલું છે. આનાથી સરકારી દેવાં (Government Borrowing) ના કાર્યક્રમોને પણ મોટું સમર્થન મળશે.
