લુણાવાડા પીપલ્સ કો-ઓપરેટિવ બેંકને રિઝર્વ બેન્કે રૂ. 2 લાખનો દંડ કર્યો
નિયમોના ઉલ્લંઘન બદલ આરબીઆઈએ ૩ કો-ઓપરેટિવ બેંકો પર ₹૨-૨ લાખનો દંડ ફટકાર્યો
રિઝર્વ બેંક ઓફ ઈન્ડિયા (RBI) એ બેંકિંગ રેગ્યુલેટર દ્વારા જાહેર કરાયેલા વિવિધ નિયમોનું પાલન ન કરવા બદલ ત્રણ કો-ઓપરેટિવ (સહકારી) બેંકો પર કુલ રૂ. ૬ લાખનો દંડ ફટકાર્યો છે. ગુજરાતની લુણાવાડા પીપલ્સ કો-ઓપરેટિવ બેંકના આરબીઆઈએ કરેલા ઇન્સ્પેક્શનમાં સામે આવ્યું કે બેંકે એવા કિસ્સાઓમાં લોન મંજૂર કરી હતી જ્યાં ડિરેક્ટરોના સંબંધીઓ જામીન (ગેરન્ટર) તરીકે ઊભા હતા.
બેંકોને દંડ કરવામાં આવ્યો છે તેમાં ગુજરાતની લુણાવાડા પીપલ્સ કો-ઓપરેટિવ બેંક લિમિટેડ ઉપરાંત મહારાષ્ટ્રની શ્રી લક્ષ્મી કો-ઓપરેટિવ બેંક લિમિટેડ, અને રાજસ્થાનની જાલોર સેન્ટ્રલ કો-ઓપરેટિવ બેંક લિમિટેડનો સમાવેશ થાય છે. દરેક બેંકને રૂ. ૨ લાખનો દંડ કરાયો છે.
શ્રી લક્ષ્મી કો-ઓપરેટિવ બેંક: આ બેંકને કેવાયસી (KYC) નિયમો, ડિપોઝિટ ખાતાઓની જાળવણી અને ઇનઓપરેટિવ (વણવપરાયેલા) ખાતા તેમજ અનક્લેમ્ડ (દાવો ન થયેલી) ડિપોઝિટ અંગેના નિયમોનું પાલન ન કરવા બદલ દંડ થયો છે. આરબીઆઈના ઇન્સ્પેક્શનમાં સામે આવ્યું કે બેંક દર છ મહિને ખાતાઓના રિસ્ક કેટેગરીની સમીક્ષા કરવામાં અને ગ્રાહકોના KYC રેકોર્ડ સેન્ટ્રલ કેવાયસી રજિસ્ટ્રી (CKYCR) પર સમયસર અપલોડ કરવામાં નિષ્ફળ રહી હતી. આ સિવાય ગ્રાહકોને જાણ કર્યા વિના મિનિમમ બેલેન્સ ન રાખવા બદલ પેનલ્ટી વસૂલવામાં આવી હતી.
જાલોર સેન્ટ્રલ કો-ઓપરેટિવ બેંક: નાબાર્ડ (NABARD) દ્વારા કરાયેલા ઇન્સ્પેક્શનમાં જાણવા મળ્યું કે આ બેંક ખાતાઓના રિસ્ક કેટેગરીની સમીક્ષા કરવાની વ્યવસ્થા ઊભી કરવામાં અને ગ્રાહકોના KYC રેકોર્ડ સમયસર અપડેટ કરવામાં નિષ્ફળ રહી હતી.
આરબીઆઈએ સ્પષ્ટ કર્યું છે કે આ દંડ માત્ર નિયમોનું પાલન ન કરવા બદલ લેવાયેલા પગલાં છે, અને તેનો હેતુ બેંકો અને ગ્રાહકો વચ્ચેના વ્યવહારોની માન્યતા પર સવાલ ઉઠાવવાનો નથી.
