સેલિબ્રિટી મેનેજર દિશા સાલિયાને આત્મહત્યા નથી કરી, તેની હત્યા કરવામાં આવી છેઃ પિતા-સતીશ સાલિયન

પિતાના આક્ષેપો અને કેસ ફરી ખોલવાની માગણી કરી

મુંબઈઃ દિશા સાલિયનના પિતા સતીશ સાલિયને તેમની પુત્રીના મૃત્યુની  ઘટનાને માત્ર અકસ્માત કે આત્મહત્યા માનવાનો ઇનકાર કર્યો છે. તેમણે બીબીસી સાથે વાત કરતાં પાંચ દિવસ પહેલા આરોપ લગાવ્યો છે કે તેમની પુત્રીના મોત પાછળ ઊંડું ષડયંત્ર હોઈ શકે છે. દિશા સાલિયનના મૃત્યુની રાત્રે ફ્લેટમાં હાજર લોકોની ભૂમિકા શંકાસ્પદ છે. પિતાના આક્ષેપો, નવી અરજીઓ અને રાજકીય દબાણ બાદ મહારાષ્ટ્ર સરકાર દ્વારા આ કેસની ફરીથી ઉંડાણપૂર્વક તપાસ કરવા માટે સ્પેશિયલ ઇન્વેસ્ટિગેશન ટીમ (SIT) ની રચના કરવામાં આવી છે. પાંચ દિવસ પહેલા દિશા સાલિયનના પિતાએ નવેસરથી આક્ષેપ કર્યા હોવાનું બહાર આવ્યું છે. તાજેતરમાં બીબીસી પર આપવામાં આવેલા અહેવાલમાં આ આક્ષેપ મૂકાયા હોવાનું જણાવવામાં આવ્યું હતું.

(બીબીસીની લિન્કઃ https://www.bbc.com/news/articles/cpwl1ejlgw9o)

મૃત્યુ પાછળના મુખ્ય વિવાદો અને તપાસ

સુશાંત સિંઘ રાજપૂતનું મોત અને જોડાયેલો વિવાદ

દિશા સાલિયનના મોતના ગણતરીના દિવસો બાદ, ૧૪ જૂન ૨૦૨૦ના રોજ બોલિવૂડના પ્રખ્યાત અભિનેતા સુશાંત સિંઘ રાજપૂતે મુંબઈના બાંદ્રા સ્થિત પોતાના ફ્લેટમાં આત્મહત્યા કરી લીધી હતી. દિશા સાલિયન સુશાંતની પૂર્વ મેનેજર રહી ચૂકી હોવાથી સોશિયલ મીડિયા પર બંનેના મોત વચ્ચે સીધો સંબંધ હોવાની અટકળો વહેતી થઈ હતી. સુશાંતના મોત બાદ બોલિવૂડમાં સગાંવાધ અને ઈન્ડસ્ટ્રીના દબાણ અંગે દેશભરમાં મોટો વિવાદ થયો હતો. 

કેન્દ્રીય એજન્સીઓની તપાસ: સુશાંત કેસની તપાસ સીબીઆઈ (CBI), એન્ફોર્સમેન્ટ ડિરેક્ટોરેટ (ED) અને નારકોટિક્સ કંટ્રોલ બ્યુરો (NCB) દ્વારા કરવામાં આવી હતી, જેમાં ડ્રગ્સ એંગલ પણ સામે આવ્યો હતો. જોકે, તપાસ એજન્સીઓને દિશા અને સુશાંતના મોત વચ્ચે કોઈ સીધો ગુનાહિત સંબંધ મળ્યો નહોતો, પરંતુ જાહેર જનતા અને મીડિયામાં આ બંને કેસ લાંબા સમય સુધી ચર્ચાના કેન્દ્રમાં રહ્યા હતા.