ટેલિગ્રામ ચેનલ પરથી શેરબજારના રોકાણ પર ગેરેન્ટેડ રિટર્નની ખાતરી આપતી પાંચ સંસ્થાઓથી ચેતતા રહોઃNSE
ટેલિગ્રામ ચેનલ પરથી શેરબજારના રોકાણ પર ગેરેન્ટેડ રિટર્નની ખાતરી આપતી પાંચ સંસ્થાઓથી ચેતતા રહેવા NSEએ જણાવ્યું
અમદાવાદઃ નેશનલ સ્ટોક એક્સચેન્જ-NSEએ શેરબજારના રોકાણકારોને છેતરપિંડીથી બચાવવા માટે એક મહત્વપૂર્ણ ચેતવણી આપતી નોટિસ જારી કરવામાં આવી છે. ટેલિગ્રામ ચેનલો, ફેસબુક ગ્રુપ્સ અને મોબાઈલ એપ્સ દ્વારા શેરબજારમાં ટ્રેડિંગ ટીપ્સ આપવાના, ગેરંટીડ (ચોક્કસ) વળતરનું આશ્વાસન આપવાના અને ગેરકાયદેસર ‘ડબ્બા ટ્રેડિંગ’ ચલાવવાના નામે રોકાણકારો સાથે થતી છેતરપિંડીને ધ્યાનમાં રાખીને NSE એ આ કાર્યવાહી કરી છે.
NSE એ તાજેતરમાં 12 ઓક્ટોબરથી 14 ઓક્ટોબર 2026 દરમિયાન અલગ-અલગ નોટિસ જારી કરીને 5 મુખ્ય સંસ્થાઓ/પ્લેટફોર્મ્સથી ચેતતા રહેવા રોકાણકારો સૂચના આપી છે. નેશનલ સ્ટોક એક્સચેન્ચે ગર્ગ ટ્રેડર્સ, પ્રોટ્રેડર્સ, એનએસઈ સ્ટોક પ્રો, પ્રોફિટ એવરીડે અને સ્ટોક પ્રો તરફથી રોકાણકારોને ગેરેન્ટેડ રિટર્નની આપવામાં આવતી ખાતરીથી ચેતતા રહેવા જણાવવામાં આવ્યું છે.
ટ્રેડ ટાઇટન, કિંગ ઓફ નિફ્ટી અને એવરીડે ટ્રેડિંગથી પણ ચેતતા રહેવા જણાવવામાં આવ્યું છે.
NSE ની તપાસમાં સામે આવ્યું છે કે આ તમામ સંસ્થાઓ કે વ્યક્તિઓ રોકાણકારોને લલચાવીને ગેરકાયદે પ્રવૃત્તિઓ ચલાવી રહ્યા હતા. તેમની ગેરરીતિઓની વિગતો નીચે મુજબ છે. ગર્ગ ટ્રેડર્સ અને પ્રોટ્રેડર્સના ઓપરેટર્સમાં ઇમરાન, હર્ષ અને વિજય નામના વ્યક્તિઓનો સમાવેશ થાય છે. તેમના સંપર્ક નંબર અનુક્રમે 7090919199, 7505950600 અને 9345958844) છે. તેઓ બુલ આઈઝ ટ્રેડર્સ ગ્રુપ નામની ટેલિગ્રામ ચેનલ ચલાવી રહ્યા છે. તેને માટે gemtrader.live, gargtraders.life, protrader.cloud જેવી વેબસાઇટ્સ અને એપ્લિકેશન્સ ચલાવી રહ્યા છે.
આ પ્લેટફોર્મ્સ દ્વારા શેરબજારની ટીપ્સ, ગેરંટીડ રિટર્નની યોજનાઓ, એકાઉન્ટ હેન્ડલિંગ સર્વિસ અને ગેરકાયદે ‘ડબ્બા ટ્રેડિંગ’ કરાવવામાં આવતું હતું. નેશનલ સ્ટોક એક્સચેન્જે સ્પષ્ટ કર્યું છે કે આ લોકો કે તેમની કંપનીઓ એક્સચેન્જમાં નોંધાયેલા સભ્યો નથી. આ મામલે પોલીસ ફરિયાદ પણ નોંધાવવામાં આવી છે.
NSE સ્ટોક પ્રો – પ્રોફિટ એવરીડે પ્લેટફોર્મના સંચાલકો ‘NSE Stock PRO-Profit Everyday નામની ટેલિગ્રામ ચેનલ ચલાવે છે. આ ટેલિગ્રામ ચેનલ પોતાના નામે ‘NSE’ શબ્દનો ઉપયોગ કરીને રોકાણકારોને ગેરમાર્ગે દોરતી હતી અને ચોક્કસ કે ગેરંટીડ રિટર્નની લાલચ આપીને સ્ટોક ટીપ્સ આપતી હતી. NSE એ સ્પષ્ટતા કરી છે કે આ ચેનલને NSE સાથે કોઈ લેવાદેવા નથી.
ટ્રેડ ટાઇટન (Trade Titan)ના ઓપરેટર: વિકી ધાકડ. (સંપર્ક નંબર: 7000354523) છે. તેઓ trade-titan.com વેબસાઇટ, ‘Online Dabba Traders’ ટેલિગ્રામ ચેનલ, ‘dabba trading’ ફેસબુક ગ્રુપ, ‘Big player Comodity MCX’ યુટ્યુબ ચેનલ અને ‘Trade Titan’ નામની એપ ચલાવી રહ્યા છે.
આ પ્લેટફોર્મ પણ રોકાણકારોને ગેરંટીડ રિટર્ન, સ્ટોક ટીપ્સ, એકાઉન્ટ હેન્ડલિંગ અને બેફામ રીતે ગેરકાયદે ડબ્બા ટ્રેડિંગ ઓફર કરતું હતું. આ પ્લેટફોર્મ સામે પણ પોલીસ ફરિયાદ દાખલ કરવામાં આવી છે.
કિંગ ઓફ નિફ્ટી (King of Nifty)નો ઓપરેટર સુશાંત નામનો વ્યક્તિ છે. તેનો સંપર્ક નંબર: 6375802600 છે. તે ‘DEMATE ACCOUNT HANDLING’ નામની ટેલિગ્રામ ચેનલ ચલાવે છે. રોકાણકારોના ટ્રેડિંગ અને ડીમેટ એકાઉન્ટ પોતે હેન્ડલ કરીને ગેરંટીડ રિટર્ન આપવાનો દાવો આ ચેનલ દ્વારા કરવામાં આવતો હતો. આ વ્યક્તિ કે સંસ્થા NSE માન્ય બ્રોકર નથી.
એવરીડે ટ્રેડિંગ (Everyday Trading)નો ઓપરેટર વિક્રમ રાવત છે. પ્લેટફોર્મ: ‘Zero to Hero Nifty Calls’ નામની ટેલિગ્રામ ચેનલ ચલાવે છે. આ ચેનલના માધ્યમથી શેરબજારમાં ટ્રેડિંગ ટીપ્સ આપવામાં આવતી હતી અને રોકાણકારોના એકાઉન્ટ હેન્ડલ કરવાની ઓફર કરાતી હતી. NSEએ રોકાણકારોને પોતાના આઈડી અને પાસવર્ડ આવા અજાણ્યા લોકો સાથે શેર ન કરવા ખાસ અપીલ કરી છે.
