બાયબેકના શેર્સની આવકના ટેક્સના દરો બદલીને 12.5થી 30 ટકા સુધી કરી દીધા
- મેટ ટેક્સનો દર 15 ટકાથી ઘટાડી 14 ટકા કરવામાં આવ્યો અને મેટ ટેક્સની પછીન વર્ષના ર રિટર્નમાં મળતી ક્રેડિટ આપવાનું બંધ કર્યો
(પ્રતિનિધિ તરફથી) અમદાવાદ,રવિવાર
નાણાં મંત્રી નિર્મલા સીતારમણે આજના બજેટમાં નવી જોગવાઈ કરીને શેર બાયબેકની આવકને કેપિટલ ગેઈન તરીકે ગણવાનો નિર્ણય લીધો છે. તેથી કંપનીના પ્રમોટર સિવાયના તમામ કરદાતાઓને લોન્ગ ટર્મ કેપિટલ ગેઈન હેઠળ 12.5 ટકા, ઇન્વેસ્ટમેન્ટ કંપની એટલે કોર્પોરેટ કરદાતાને 22 ટકા તથા પ્રમોટરને 30 ટકા ટેક્સ ભરવાની જવાબદારી આવશે.
હાલની જોગવાઈ મુજબ કોઈપણ કંપની તેના શેર્સ બાયબેકના કરે તો શેરહોલ્ડરને બાયબેક પેટે મળેલી તમામ રકમના આવક ગણવામાં આવતી હતી. તેમાંથી ખરીદ કિંમતને બાદ ન કરતાં હોવાથી ઇન્વેસ્ટમેન્ટની રકમ કેપિટલ લૉસ ગણાતો હતો. તેને કારણે ટેક્સની મોટી જવાબદારી કરદાતાઓને માથે આવતી હતી.
મિનિમમ ઓલ્ટરનેટ ટેક્સમાં પણ ફેરફાર કરવામાં આવ્યો છે. મેટની જવાબદારી જે કંપનીઓ પર આવતી હતી તેમણે 15 ટકાના દરે બુક પ્રોફિટ પર ટેક્સ ભરવો પડતો હતો. આ મેટ ટેક્સની ક્રેડિટ ત્યારબાદના વરસોમાં સામાન્ય આવકવેરા સામે મજરે મળતી હતી. ચાર્ટડ એકાઉન્ટન્ટ હેત્વી રૂપેશ શાહનું કહેવું છે કે બજેટમાં આ જોગવાઈમાં ફેરફાર કરીને મેટનો દર 15 ટકાથી ઘટાડીને 14 ટકા કરવામાં આવ્યો છે. તેમ જ મેટ ટેક્સની ક્રેડિટ ન આપવનો નિર્ણય લેવામાં આવ્યો છે.
શેરબજારમાં ફ્યુચર એન્ડ ઓપ્શન અને કોમોડિટી માર્કેટમાં કોમોડિટીના કરવામાં આવતા સોદાની રકમ પર 0.002 ટકા સિક્યોરિટી ટ્રાન્ઝેક્સન ટેક્સ લેવાતો હતો તે વધારીને 0.005 ટકા કરી દેવામાં આવ્યો છે.
