ભાડું, પ્રોપર્ટી માટે ટેક્સની કરકપાતનું રિટર્ન ફાઈલ કરવા નવું ફોર્મ 141 બહાર પાડ્યું
TDSનું રિટર્ન ફાઈલ કરવું હવે સરળ કરી દેવાયુંઃ ટીડીએસની ચાર કેટેગરી બનાવીને દરેક કેટેગરીના નાણાંકીય વહેવારો પર કરેલા ટીડીએસની વિગતો અલગથી રજૂ કરવી પડશે
આવકવેરા વિભાગે ટેક્સ ડિડક્શન એટ સોર્સ-TDSના રિપોર્ટિંગ અને ચુકવણીની પ્રક્રિયાને અત્યંત સરળ બનાવવા માટે નવું ફોર્મ નંબર 141 બહાર પાડીને ભાડું, પ્રોપર્ટી અને પ્રોફેશનલ પેમેન્ટની વિગતો રજૂ કરવાની નવી વ્યવસ્થા ઊભી કરી છે.
ટીડીએસ રિટર્ન માટેનું ફોર્મ નંબર 141 એ પરમેનન્ટ એકાઉન્ટ આધારિત આધારિત ચલણ-કમ-સ્ટેટમેન્ટ છે. તેનો ઉપયોગ TDSની કપાતનો રિપોર્ટ આપવા અને સરકારમાં કરકપાતની રકમ જમા કરાવી દેવા માટે બનાવવામાં આવ્યું છે.
આવકવેરા કાયદા 2025ની કલમ 141માં કરવામાં આવેલી જોગવાઈ પ્રમાણે ફોર્મ નંરબ 141ને એક સર્વગ્રાહી ફોર્મ તરીકે રજૂ કરવામાં આવ્યું છે. નવું ફોર્મ નંબર 141 જૂના ફોર્મ નંબર 26QB, 26QC, 26QD અને 26QEને સ્થાને ભરવાનું આવશે. હવે એક જ ફોર્મ નંબર 141માં પરમેનન્ટ એકાઉન્ટ નંબર આધારિત તમામ ટીડીએસ સ્ટેટમેન્ટને એકીકૃત કરીને રજૂ કરવામાં આવશે. તેમ જ કલમ 393(1) હેઠળની ટેક્સ કપાત રિપોર્ટ કરવા માટે ફોર્મ 141 ઉપયોગી બની રહેશે.
ટેક્સ કન્સલ્ટન્ટ પ્રમોદ પોપટનું કહેવું છે કે નવા ફોર્મ નંબર 141માં ચાર અલગ શિડ્યૂલ છે. તેમાં શિડ્યુલ-માં વ્યક્તિગત કરદાતા કે હિન્દુ અવિભક્ત કરદાતાએ ભાડાંની આવકમાંથી કરકપાત કરવાની આવશે. તેમ જ શિડ્યૂલ-બીમાં સ્થાવર મિલકત (પ્રોપર્ટી) ટ્રાન્સફર પર કરકપાત કરી હોય તેની વિગતો આપવાની રહેશે. તેવી જ રીતે શિડ્યૂલ – સીમાં કોન્ટ્રાક્ટર કે પ્રોફેશનલને કરવામાં આવેલી ચુકવણી પર કરેલા કરકપાતની વિગતો આપવાની રહેશે. તદુપરાંત શિડ્યૂલ-ડીમાં વર્ચ્યુઅલ ડિજિટલ એસેટની ટ્રાન્સફર પર કરેલી કરકપાતની વિગતો રજૂ કરવાની અને જમા કરાવવાની રહેશે.
આવકવેરાના નવા કાયદે હેઠળ તૈયાર કરવામાં આવેલા દરેક ફોર્મ નંબર 141માં આપેલી વિગતોને એક પ્રકારનો ટ્રાન્ઝેક્શન રિપોર્ટ ગણી શકાશે. તેમ જ દરેક કેટેગરી માટે અલગ ફોર્મ ફાઇલ કરવું પડશે. ડીટીએસના એક જ ફોર્મમાં એકથી વધુ લોકો સાથે કરેલા નાણાંકીય વહેવારોમાં કરવામાં આવેલી કરકપાતની વિગતો રજૂ કરી શકાશે. એક મહિનામાં થયેલી તમામ કરકપાતની વિગતો સાથે જ આપવાની રહેશે. ફોર્મ 141 માત્ર ભારતીય નાગરિકોને લાગુ પડશે. કરકપાતનું ફોર્મ ફાઈલ કરવા માટે આવકવેરા ખાતાના ઇ-ફાઈલિંગ પોર્ટલ પર પરમેનન્ટ એકાઉન્ટ નંબર નાખીને કરદાતાએ લોગ-ઇન કરવું પડશે.
હા, તેને માટે કેટલીક શરતો મૂકવામાં આવેલી છે. ઈ-ફાઈલિંગના પોર્ટલ પર કરદાતાનું નામ રજિસ્ટર્ડ થયેલું હોવું જરૂરી છે. કરદાતાનો પરમેનન્ટ એકાઉન્ટ નંબર એક્ટિવ હોવો જોઈએ. તેમ જ ખાસ કરીને વ્યક્તિગત કરદાતાનું પાન કાર્ડ આધાર કાર્ડ સાથે લિન્ક થયેલું હોવું પણ જરૂરી છે. ઈ-પોર્ટલ પર લોગ ઇન કર્યા પછી જ ફોર્મ ભરવાનું રહેશે.
કઈ ચાર કેટેગરીમાં ફોર્મ 141 ભરવું પડશે
વ્યક્તિગત કરદાતા કે પછી હિન્દુ અવિભક્ત પરિવાર મહિને રૂ. 50,000 કરતાં વધુ ભાડું ચૂકવતો હોય તો તેણે ફોર્મ 141 ફાઈલ કરી કરકપાતની વિગતો આપવી પડશે. તેમાંથી ટીડીએસ કરીને ફોર્મ 141 ભરીને ટીડીએસની રકમ સરકારમાં જમા કરાવવી પડશે.
શિડ્યુલ બી હેઠળ મિલકતના કરવામાં આવેલા વહેવારમાં ખેતીની જમીન સિવાયની કોઈ મિલકતની ખરીદી કરવામાં આવી હોય તો તેવા કિસ્સાઓમાં ટીડીએસ-કરકપાત કરીને તે રકમ જમા કરાવવી ફરજિયાત છે.
શિડ્યુલ-સી હેઠળ સર્વિસ આપનાર કે પ્રોફેશનલે વર્ષ દરમિયાન રૂ. 50 લાખથી વધુ પેમેન્ટ કરવાના કોન્ટ્રાક્ટ કર્યા હોય કે બ્રોકરેજ સેવા આપી હોય અથવા તો પ્રોફેશનલ ફી વસૂલી હોય તો તેવા સંજોગોમાં તેમણે શિડ્યૂલ-સી હેઠળ કરકપાત 141 ફાઈલ કરવું પડશે.
છેલ્લે વર્ચ્યુઅલ ડિજિટલ એસેટ ટ્રાન્સફર કરવામાં જે નાણાંકીય વહેવાર કરવામાં આવ્યો હોય તેના પર કરવામાં આવેલી કરકપાતની વિગતો ભરીને શિડ્યૂલ-ડી હેઠળ ફોર્મ 141 ફાઈલ કરવાની અને કરકપાતની તે રકમ જમા કરાવવાની જવાબદારી આવશે.
ટીડીએસ રિટર્ન કઈ રીતે ફાઈલ કરી શકાય
પાનકાર્ડ નંબર નાખીને ઇ-ફાઈલિંગ પોર્ટલ પર લોગ ઈન કરો. ત્યારબાદ ઈ-પે ટેક્સ પસંદ કરો. તમારે કરકપાતના ફોર્મ નંબર 141ના જે શિડ્યુલમાં ફોર્મ ભરવું હોય તેની પસંદગી કરો. ત્યારબાદ કરકપાતની વિગતો ભરી દો. તેમાં કરકપાત કરનારના અને કરકપાત જેની રકમમાંથી કરવામાં આવી હોય તેનો પાન નંબર નાખો, સરનામું ભરી દો, ટ્રાન્ઝેક્શનની વિગતો ભરો, ટ્રાન્ઝેક્શનની તારીખ લખી દો અને ટ્રાન્ઝેક્શની રકમ ટાઈપ કરીને અપલોડ કરી દો. તેની સાથે જ કરકપાતની રકમ પણ ઓનલાઈ જ સબમિટ કરી દો. છેલ્લે ચલણ અને સ્ટેટમેન્ટ ડાઉનલૉડ કરી દો. હવે એક જ ફોર્મના અલગ અલગ શિડ્યૂલમાં વિગતો ભરવાની આવે છે. પહેલા અલગ અલગ ફોર્મ ભરવા પડતા હતા. આમ ઓછી મૂઝવણે સરળતાથી અને ઝડપથી ટીડીએસ રિટર્ન ફાઈલ કરી શકાશે.
