દીપના ફાર્મા કેમની રૂ. 20.68 કરોડની બોગસ ઇનપુટ ટેક્સ ક્રેડિટના કૌભાંડમાં દીપેન શાહ, રોમિલ બાફનાની ધરપકડ
- એમ.કે.એસ. આલ્કલિઝ એન્ડ કેમિકલ પ્રાઈવેટ લિમિટેડ તથા જે.કે. ઇન્ટરનેશનલની પણ આ કૌભાંડમાં સંડોવણી
અમદાવાદઃ ગુડ્સ એન્ડ સર્વિસ ટેક્સની ગુજરાતની કચેરીના અધિકારીઓએ આજે દીપના ફાર્મા કેમની રૂ. 20.68 કરોડની બોગસ ઇનપુટ ટેક્સ ક્રેડિટ રૂ. 20. 68 કરોડની બોગસ ઇનપુટ ટેક્સ ક્રેડિટ લેવાના કૌભાંડને પકડી પાડવા ઉપરાંત રૂ. 5 કરોડની ગુડ્સ એન્ડ સર્વિસ ટેક્સની ચોરી પણ પકડી પાડવામાં સફળતા મેળવી છે. ફાર્મા કંપની સાથે સંકળાયેલી અન્ય 11 પેઢીઓને પણ દરોડાની કાર્યવાહી હેઠળ આવરી લેવામાં આવી હતી.
અમદાવાદની ફાર્માસ્યૂટિકલ કંપની દીપના ફાર્મકેમના કેયૂર દીપક શાહ અને રોમલ વિનોદકુમાર બાફનાની ગુજરાતની ગુડ્સ એન્ડ સર્વિસ ટેક્સ કચેરીના અધિકારીઓએ ધરપકડ કરવામાં આવી છે. બંનેને જ્યૂડિશિયલ મેજિસ્ટ્રેટ સમક્ષ મોકલી આપવામાં આવતા તમને જ્યુડિશિયલ કસ્ટડીમાં મોકલી આપવામાં આવ્યા છે. તદુપરાંત એમ.કે.એસ. આલ્કલિઝ એન્ડ કેમિકલ પ્રાઈવેટ લિમિટેડ તથા જે.કે. ઇન્ટરનેશનલની પણ આ કૌભાંડમાં સંડોવણી છે. જે.કે. ઇન્ટરનેશનલ ટ્રેડ લિન્ક પણ આ કૌભાંડમાં સંડોવાયેલી હોવાનું બહાર આવ્યું છે.
દીપના ફાર્મા સાથે સંકળાયેલી અન્ય 11 પેઢીઓમાં પણ તપાસ કરતાં જાણવા મળ્યુ હતું કે તેમાંની કેટલીક ફાર્મા કંપનીઓએ તેમના રજિસ્ટ્રેશનમાં ફેરફાર કરીને તેમનો ધંધો આયર્ન એન્ડ સ્ટીલ તથા ઇન્ગોટ્સના ટ્રેડિંગમાં પડ્યા હોવાનું દર્શાવવામાં આવ્યું હતું. વાસ્તવમાં આ પેઢીઓ માલની વાસ્તવિક ફેરફાર કર્યા વિના જ ઈ-વે બિલ બનાવતી હતી. તેને આધારે જ ખોટી ઇનપુટ ટેક્સ ક્રેડિટ મેળવી લેતા હતા.
આ કંપનીઓ રેડિયો ફ્રિક્વન્સી આઈડેન્ટિફિકેશન, ઈ-વે બિલ તથા ટોલ પ્લાઝા પરના ડેટાની ચકાસણી કરવામાં આવતા તેમણે બોગસ બિલો જ બનાવ્યા હતા અને માલની ડિલીવરી કરી જ નહોતી. આમ સમગ્ર વહેવાર કાગળ પર જ હોવાનું ધ્યાનમાં આવી ગયું હતું. માત્ર પેપર પર જ ધંધાના ટ્રાન્ઝેક્શન બતાવનાર આ કંપની સાથે કામ કરતી કેટલીક કંપનીઓએ ધંધાના જે સ્થળ બતાવ્યા હતા તે સ્થળમાંથી ઘણાં સ્થળોએ તેમના ધંધાના એકમો જ ન હોવાનું બહાર આવ્યું છે.
જીએસટીના અધિકારીઓએ રેકોર્ડને આધારે કરેલી ચકાસણીમાં જાણવા મળ્યુ હતું કે દીપના ફાર્માસ્યૂટિકલ્સે રૂ. 114.89 કરોડના નાણાંકીય વહેવારો કરીને રૂ. 20.68 કરોડની બોગસ ઇનપુટ ટેક્સક્રેડિટ મેળવી લીધી હતી. તેમ જ રૂ. 5 કરોડથી વધુ રકમની જીએસટીની ચોરી કરી હોવાથી સીજીએસટી અધિનિયમની કલમ 132 હેઠળ ગુનો નોંધ્યો હતો. તેમનો આ ગુનો બિનજામીન પાત્ર હોવાથી તેમને એડિશન ચીફ જ્યુડિશિયલ મેજિસ્ટ્રેટ સમક્ષ રજૂ કરવામાં આવતા તેમને જ્યૂડિશિયલ કસ્ટડીમાં મોકલી આપવામાં આવ્યા હતા.
જીએસટીના દરોડા દરમિયાન હાથ લાગેલા દસ્તાવેજો, ડિજિટલ પુરાવાઓ, નાણાંકીય વહેવારોની વિગતો હાથ લાગી છે. આ કંપનીઓએ બીજા રાજ્યોમાં પણ વહેવારો કરેલા હોવાનું જાણવા મળી રહ્યું છે.
