અદાણી પોર્ટ્સના વિઝિનઝમ પોર્ટ સાથેના મોટા સોદા બાદ કંપનીનો શેર રૂ. ૨,૦૦૦ના મથાળાને આંબી જશે

વૈશ્વિક શિપિંગ જાયન્ટ MSC સાથે રૂ. ૧૩,૨૫૦ કરોડથી વધુનો સોદો: બ્રોકરેજ ફર્મ ‘એમકે રિસર્ચ’ દ્વારા શેર ખરીદવા ‘BUY’ રેટિંગ સાથે ટાર્ગેટ પ્રાઇસ વધારીને રૂ. ૨,૦૦૦ કરાઈ

અમદાવાદઃ ભારતના અગ્રણી પોર્ટ ઓપરેટર અદાણી પોર્ટ્સ એન્ડ સ્પેશિયલ ઇકોનોમિક ઝોન (APSEZ) એ વૈશ્વિક શિપિંગ ક્ષેત્રે એક બહુમોટો વ્યૂહાત્મક સોદો પાર પાડ્યો છે. કંપનીની પેટાકંપની અદાણી વિઝિનઝમ પોર્ટ પ્રાઇવેટ લિમિટેડ (AVPPL)માં મેડિટેરેનિયન શિપિંગ કંપની (MSC)ના ટર્મિનલ આર્મ ટર્મિનલ ઇન્વેસ્ટમેન્ટ (TiL)એ ૪૯ ટકા હિસ્સો ખરીદવા માટે આખરી કરાર કર્યા છે. આ સોદો અંદાજે ૧.૪ અબજ ડોલર (રૂ. ૧૩,૨૫૦ કરોડથી વધુ)માં થયો છે. તેનાથી વિઝિનઝમ પોર્ટનું એન્ટરપ્રાઇઝ મૂલ્ય (EV) અંદાજે ૨.૮૫ અબજ ડોલર આંકવામાં આવી રહ્યું છે.

આ મજબૂત ફંડામેન્ટલ બદલાવને પગલે પ્રખ્યાત ઇન્સ્ટિટ્યુશનલ બ્રોકરેજ હાઉસ ‘એમકે રિસર્ચ’ (Emkay Research) એ અદાણી પોર્ટ્સના શેર પર પોતાનું ‘BUY’ (ખરીદવા માટેનું) રેટિંગ યથાવત રાખ્યું છે અને આગામી ૧૨ મહિના માટેની ટાર્ગેટ પ્રાઇસ (Target Price) અગાઉના રૂ. ૧,૯૦૦થી વધારીને રૂ. ૨,૦૦૦ કરી દીધો છે. કરારના સમયગાળા દરમિયાન શેરબજારના રોકાણકારો માટે આ શેરમાં કમાણીની શ્રેષ્ઠ તકો દેખાઈ રહી છે.

કંપનીના શેરમાં રોકાણ કરવું કે નહીં?

શેરબજારના લાંબા ગાળાના ઇન્વેસ્ટર્સ અને શોર્ટ-ટર્મ ટ્રેડર્સ બંને માટે અદાણી પોર્ટ્સ (APSEZ) હાલના સ્તરે રોકાણ કરવા યોગ્ય મજબૂત શેર છે. એમકે રિસર્ચના એનાલિસ્ટ્સ અંશુલ અગ્રવાલ અને વિવેક સેઠિયાના મતે, આ સોદો કંપની માટે માત્ર નાણાકીય લાભ નથી લાવ્યો, પરંતુ તેના લાંબા ગાળાના ગ્રોથ મોડલને અતિ સુરક્ષિત બનાવી દીધો છે.

વર્તમાન બજાર કિંમત અને ફંડામેન્ટલ્સ જોતાં આ શેરમાં ૧૦.૫ ટકાથી વધુનો સ્પષ્ટ અપસાઇડ-વધારો જોવા મળી શકે છે. રોકાણકારો માટે આ શેરમાં પોઝિશન લેવાના મુખ્ય અને તાર્કિક કારણો નીચે મુજબ છે:

કંપનીને થનારા મોટા ફાયદા અને રોકાણના કારણો

પોર્ટ કેપેસિટીમાં ૩.૫ ગણો ધરખમ વધારો થઈ જશે. APSEZ વિઝિનઝમ પોર્ટની વર્તમાન ક્ષમતા ૧.૬ MTEU (મિલિયન ટ્વેન્ટી-ફૂટ ઇક્વિવેલેન્ટ યુનિટ્સ)થી વધારીને ડિસેમ્બર ૨૦૨૮ સુધીમાં ૫.૭ MTEU કરવા જઈ રહી છે. આ ક્ષમતામાં ૩.૫ ગણો વધારો દર્શાવે છે અને MSC જેવી મોટી કંપની ભાગીદાર હોવાથી આ પોર્ટની ઓપરેટિંગ આવક ખાસ્સી વધી જવાની ગણતરી છે. 

એક્ઝિક્યુશનનું કોઈ જોખમ નથી 

અદાણી અને MSC વચ્ચે મુંદ્રા અને એન્નોર પોર્ટ પર ઓલરેડી જોઈન્ટ વેન્ચર (JV) સફળતાપૂર્વક કાર્યરત છે. વિઝિનઝમ પોર્ટ શરૂ થયાના માત્ર ૧૮ મહિનાની અંદર જ ૨ MTEU નું ટ્રાફિક હેન્ડલિંગ થઈ ચૂક્યું છે, જેમાં મોટાભાગના કન્ટેનર્સ MSC ના જ હતા. આ ભૂતકાળના ટ્રેક રેકોર્ડના કારણે કામગીરી ઝડપથી વિસ્તારવામાં કોઈ અવરોધ નહીં આવે.

રોકડ પ્રવાહમાં વધારો અને દેવામાં ઘટાડો

કરાર મુજબ, અદાણી પોર્ટ્સને પ્રથમ તબક્કામાં ૫૩૯ મિલિયન ડોલર રોકડા મળશે, જે કંપનીની ટૂંકા ગાળાની લિક્વિડિટી (નાણાકીય સુવિધા) વધારશે. બીજા તબક્કાના અંતે (ડિસેમ્બર ૨૦૨૮) બાકીના ૮૫૮ મિલિયન ડોલર મળશે. આ જંગી રોકડ આવવાના કારણે ફેઝ-૨ ના વિસ્તરણ માટે અદાણીએ બહારથી નવું દેવું (Debt) લેવું પડશે નહીં, જેથી કંપનીની બેલેન્સ શીટ વધુ ક્લીન બનશે.

વિઝિનઝમ પોર્ટની ભૌગોલિક સ્થિતિ: ટ્રાન્સશિપમેન્ટની વિરાટ તકો

એમકે રિસર્ચના અહેવાલ મુજબ એશિયા-મિડલ ઈસ્ટ કોરિડોરમાં વાર્ષિક ૮૦ MTEU થી વધુ કન્ટેનર વ્યાપાર થાય છે. ભારતનો મોટાભાગનો સ્થાનિક માલ અત્યાર સુધી કોલંબો કે સિંગાપોર પોર્ટ મારફતે રૂટ થતો હતો, કારણ કે ભારતમાં ઊંડા પાણીનું સ્તર ધરાવતું કોઈ મોટું પોર્ટ નહોતું. વિઝિનઝમ પોર્ટ આ ગેપને પૂરશે, કારણ કે: તે આંતરરાષ્ટ્રીય પૂર્વ-પશ્ચિમ શિપિંગ રૂટથી માત્ર ૧૦ નોટિકલ માઈલ જ દૂર છે. બીજું, તેની કુદરતી ડ્રાફ્ટ ક્ષમતા (ઊંડાઈ) ૧૮-૨૦ મીટર છે, જે વિશ્વના સૌથી વિશાળ જહાજો (ULCVs) ને સરળતાથી બર્થિંગ સ્પેસ આપી શકે છે. ત્રીજું, આ પોર્ટ દ્વારા ભારત હવે બાંગ્લાદેશના કાર્ગો પર પકડ જમાવશે, જે હાલમાં સાઉથ-ઈસ્ટ એશિયન હબ પર નિર્ભર છે.

અદાણી પોર્ટ્સનું નાણાકીય ચિત્ર 

એમકે રિસર્ચના અંદાજ (Estimates) મુજબ, નાણાકીય વર્ષ ૨૦૨૬ થી ૨૦૨૮ દરમિયાન કંપનીની આવકમાં ૧૫ ટકાનો અને ઓપરેટિંગ નફા (EBITDA) માં ૧૬ ટકાનો સંયુક્ત વાર્ષિક વૃદ્ધિ દર (CAGR) જોવા મળશે.

કંપનીના નાણાકીય આંકડાઓ પર એક નજર (કરોડ રૂ. માં):

આવક : નાણાકીય વર્ષ ૨૦૨૫ માં રૂ. ૩૦,૪૭૫ કરોડની સામે નાણાકીય વર્ષ ૨૦૨૭E માં રૂ. ૪૩,૫૨૬ કરોડ અને FY28E માં રૂ. ૫૧,૬૦૭ કરોડ થવાનો અંદાજ છે.

વેરા પૂર્વેનો નફો (EBITDA): FY25 માં રૂ. ૧૮,૪૨૧ કરોડની સામે FY28E માં તે વધીને રૂ. ૩૦,૭૭૭ કરોડ પર પહોંચશે.

ચોખ્ખો નફો: FY25 માં રૂ. ૧૧,૩૭૬ કરોડની સરખામણીએ FY28E માં નફો કૂદકો મારીને રૂ. ૧૮,૫૯૨ કરોડ થવાની ધારણા છે.

શેર દીઠ કમાણી (EPS): કંપનીની પ્રતિ શેર કમાણી જે FY25 માં રૂ. ૫૨.૭ હતી, તે FY28E સુધીમાં વધીને રૂ. ૮૦.૭ થઈ જશે.

શેરબજારના ટ્રેડર્સ અને ઇન્વેસ્ટર્સ માટે મહત્વના સ્ટોક ડેટા

બાવન સપ્તાહની ઊંચી/નીચી સપાટી: રૂ. ૧,૮૫૮ / રૂ. ૧,૨૯૧

માર્કેટ કેપિટલાઇઝેશન: રૂ. ૪,૧૭,૧૦૦ કરોડ (૪૪,૦૫૭ મિલિયન ડોલર)

પ્રમોટર્સ હોલ્ડિંગ: ૬૮ ટકા (મજબૂત પ્રમોટર પકડ)

FPIs અને મ્યુચ્યુઅલ ફંડ્સ હિસ્સો: અનુક્રમે ૧૩.૩ ટકા અને ૧૩.૯ ટકા

વેલ્યુએશન મલ્ટિપલ: નાણાકીય વર્ષ ૨૦૨૮ ના અંદાજિત કમાણીના આધારે શેર ૧૫.૧-x ગણો EV/EBITDA ના આકર્ષક વેલ્યુએશન પર ટ્રેડ થઈ રહ્યો છે.

રોકાણકારો માટે અંતિમ તારણ

અદાણી પોર્ટ્સ (APSEZ) તેના સ્થાનિક પોર્ટ કેપેસિટીને નાણાકીય વર્ષ ૨૦૩૧ સુધીમાં ૧ અબજ ટન (1bntpa) સુધી લઈ જવાનું મજબૂત વિઝન ધરાવે છે. કંપનીના આંતરિક રોકડ સ્ત્રોતો જ એટલા મજબૂત છે કે તે પોતાના વિસ્તરણ પ્લાનને પહોંચી વળવા સક્ષમ છે, જેનાથી ભવિષ્યમાં રોકાણકારોને ડિવિડન્ડ અને કેપિટલ ગેઈન બંનેનો બમણો લાભ મળશે. શેરબજારના નિષ્ણાતોના મતે, આ શેરમાં કોઈપણ ઘટાડે લાંબા ગાળા માટે એસઆઈપી (SIP) કે એકસાથે રોકાણ કરવું એ નફાકારક સોદો સાબિત થઈ શકે છે.

(ડિસ્ક્લેમર: શેરબજારમાં રોકાણ બજારના જોખમોને આધીન છે. રોકાણ કરતા પહેલાં તમારા નાણાકીય સલાહકારની મદદ લેવી આવશ્યક છે.)