અમેરિકી ડોલર સામે રૂપિયો ઘટીને 92.92ની સપાટીએ
ભારતીય રૂપિયો 92.00થી 93.00 રેન્જમાં રહે તેવી શક્યતા હાલ તુરંત તો જોવા મળી રહી છે.
અમેરિકી ડૉલર સામે ભારતીય રૂપિયો સતત નબળો પડી રહ્યો છે. હવે ભારતીય રૂપિયો ગગડીને ડોલર સામે રૂ. 93ના સ્તર નજીક પહોંચી ગયો છે. તાજેતરમાં તે 92.92 પ્રતિ ડોલર સુધી પહોંચી ગયો છે, જે અત્યાર સુધીનું સૌથી નીચામાં નીચું સ્તર છે. પશ્ચિમ એશિયામાં ચાલતા સંકટ અને વૈશ્વિક પરિસ્થિતિઓને કારણે રૂપિયા પર ભારે દબાણ જોવા મળી રહ્યું છે.
રૂપિયો તૂટવાના કારણોમાં ઊંડા ઉતરીએ તો ક્રૂડ તેલના ઊંચા ભાવ જવાબદાર છે. ક્રૂડના ભાવ વિશ્વ બજારમાં તેલના ભાવ હજુ પણ ઊંચા છે. બ્રેન્ટ ક્રૂડના ભાવ પ્રતિબેરલ 105 ડૉલરની સપાટીને વળોટી ગયા છે. તાજેતરમાં જ ક્રૂડના ભાવ 119 અમેરિકી ડૉલરને સ્પર્શી ગયા હતા. ભારત પોતાની જરૂરિયાતના લગભગ 90 ટકા ક્રૂડતેલ આયાત કરે છે. તેથી ક્રૂડતેલ મોંઘું થાય તો ભારતે કમાયેલા વધુ ડોલર દેશની બહાર જાય છે. પરિણામે રૂપિયા પર દબાણ વધે છે.
બીજું વિદેશી રોકાણકારોએ ભારે વેચવાલી શરૂ કરી છે. વિદેશી સંસ્થાગત રોકાણકારો (FIIs) ભારતીય શેરબજારમાંથી નાણાં બહાર ખેંચી રહ્યા છે. ગઈકાલે 19 માર્ચે લગભગ ₹7,207 કરોડની વેચવાલી કરી હતી. માર્ચ 2026ના પહેલા 19 દિવસમાં જ અંદાજે રૂ. 80,000 કરોડથી વધુની વેચવાલી થઈ હતી. પરિણામે ડૉલરની માગ વધી રહી છે. ડૉલરની ડિમાન્ડ વધતા રૂપિયો નબળો પડે છે. બીજીતરફ અમેરિકી ડૉલર મજબૂત હોવાથી રૂપિયા પર દબાણ વધી રહ્યું છે. તેમ જ ડોલર ઈન્ડેક્સ 99-100 વચ્ચે છે. અમેરિકાની ફેડરલ રિઝર્વ બેન્કે મજબૂત-ચુસ્ત-કડક નીતિઓને અનુસરવાનું પસંદ કર્યું છે. તેથી ડૉલર મજબૂત થઈ રહ્યો છે અને ભારતીય રૂપિયો નબળો પડી રહ્યો છે.
પશ્ચિમ એશિયામાં તણાવ એટલે કે ઈરાન-ઇઝરાયેલ સંઘર્ષ પણ ભારતીય રૂપિયો નબળો પડવા માટે જવાબદાર છે. આ તણાવને કારણે વૈશ્વિક બજારમાં વધેલી અનિશ્ચિતતા પર ભારતીય રૂપિયાના મૂલ્ય પર અસર કરી રહી છે. તેથી જ વિશ્લેષકો માને છે કે ડૉલર સામે રૂપિયાના મૂલ્યના બજારમાં ઉપરની તરફ 93.00 – 93.20ની સપાટીએ પ્રતિકાર જોવા મળી રહ્યો છે. તેમ જ નીચેની તરફ રૂ. 92.00 અને 92.20ની સપાટીએ મજબૂત ટેકો ધરાવે છે. આમ ભારતીય રૂપિયો 92.00થી 93.00 રેન્જમાં રહે તેવી શક્યતા હાલ તુરંત તો જોવા મળી રહી છે.
