ચાંદીના આજે તૂટી રહેલા ભાવના કારણો શું છે? શું ખોટું થયું?
અગાઉ ખરીદેલી ચાંદી પર નફાકીય વેચવાલી કાઢી હોવાથી ચાંદીના બજારમાં ગાબડાં પડ્યા હોવાનું માનવામાં આવે છે
આજે મલ્ટી કમોડિટી એક્સચેન્જ (MCX) પર ચાંદીમાં ઇન્ટ્રા-ડે લગભગ 6 ટકાનો ઘટાડો નોંધાયો છે. ચાંદીનો કિલોદીઠ ભાવ તૂટીને અંદાજે રૂ. 3,75,900 સુધી આવી ગયો છે. બીજીતરફ થોડા દિવસ પહેલા ચાંદીએ પ્રતિ કિલોગ્રામ ₹4,20,048ની આસપાસ ઐતિહાસિક ઊંચાઈ નોંધાવી હતી.
ત્રીસમી જાન્યુઆરી 2026ના શુક્રવારે ચાંદીના ભાવમાં ઘટાડો જોવા મળ્યો હતો અને અઠવાડિયાની શરૂઆતમાં પ્રતિ ઔંસ $121.6ની રેકોર્ડ ઊંચાઈ સ્પર્શ્યા બાદ ભાવ $116 પ્રતિ ઔંસથી નીચે બંધ આવ્યો છે. ચાંદીમાં જોવા મળેલા તીવ્ર ઉછાળા પછી ટ્રેડરોએ અગાઉ ખરીદેલી ચાંદી પર નફાકીય વેચવાલી કાઢી હોવાથી ચાંદીના બજારમાં ગાબડાં પડ્યા હોવાનું માનવામાં આવે છે. મલ્ટી કમોડિટી એક્સચેન્જ (MCX) પર ચાંદીમાં ઇન્ટ્રા-ડે લગભગ 6 ટકાનો ઘટાડો થયો હતો અને ભાવ પ્રતિ કિલોગ્રામ અંદાજે ₹3,75,900 સુધી પહોંચ્યો, જ્યારે થોડા સમય અગાઉ જ ભાવ ₹4,20,048ની નજીક રેકોર્ડ લેવલ પર હતા.
આ ઘટાડો એવા સમયે આવ્યો છે જ્યારે માત્ર જાન્યુઆરી મહિનામાં જ ચાંદીના ભાવમાં 60 ટકાથી વધુનો ઉછાળો આવ્યો હતો, જેના કારણે મોમેન્ટમ ઈન્ડિકેટર્સ અત્યંત ઓવરબોટ ઝોનમાં પહોંચી ગયા હતા. VT Marketsના સિનિયર માર્કેટ એનાલિસ્ટ જસ્ટિન ખૂએ જણાવ્યું હતું કે, “ચાંદીમાં તાજેતરમાં થયેલો ઘટાડો મૂળભૂત પરિબળો બગડવાના કારણે નહીં, પરંતુ ટેક્નિકલ અને પોઝિશનિંગ આધારિત ફેરફાર છે.” તેમણે ઉમેર્યું હતું કે ચાંદીમાં ઊંચી અસ્થિરતા અને ઉદ્યોગિક માંગ પર અંશતઃ આધાર હોવાના કારણે, સોનાની તુલનામાં તેમાં તેજ ઘટાડા વધુ જોવા મળે છે.
ભાવમાં આવેલા ઘટાડા છતાં, જિયોપોલિટિકલ તણાવ યથાવત રહે ત્યાં સુધી ચાંદી માટે ટૂંકા ગાળાનો ટ્રેન્ડ હજી પણ હકારાત્મક છે. Enrich Moneyના CEO પોનમુદીને જણાવ્યું હતું કે COMEX પર ચાંદી $108થી $111ની રેન્જમાં કોન્સોલિડેશન કરી રહી છે અને મુખ્ય મૂવિંગ એવરેજીસની ઉપર જ ટકી છે, જે દર્શાવે છે કે આ વિરામ ટ્રેન્ડની સમાપ્તિ નહીં પરંતુ સ્વસ્થ કોન્સોલિડેશન છે. તેમણે $106-$108ને સપોર્ટ તરીકે ઓળખાવ્યો હતો, જ્યારે $118-$121ની ઉપર મજબૂત બ્રેકઆઉટ મળવાથી ભાવ $125થી $140 સુધી જઈ શકે છે.
Mehta Equitiesના VP (કોમોડિટીઝ) રાહુલ કલાંત્રીએ જણાવ્યું હતું કે કિંમતી ધાતુઓ 1980ના દાયકાથી અત્યાર સુધીની શ્રેષ્ઠ માસિક કામગીરી તરફ આગળ વધી રહી છે. અમેરિકાના રાષ્ટ્રપતિએ વ્યાજદરોમાં ઘટાડો ન કરવાના મુદ્દે ફેડ ચેરમેનની ટીકા કર્યા બાદ બજારમાં અસ્થિરતા વધી હતી. કલાંત્રીએ ચાંદી માટે $109.10-$104.75ને સપોર્ટ અને $115.15-$117.80ને રેઝિસ્ટન્સ તરીકે દર્શાવ્યા હતા.
MCX પર ₹3,55,000થી ₹3,60,000ની રેન્જ મહત્વપૂર્ણ સપોર્ટ ઝોન તરીકે યથાવત છે, જ્યારે તરતનું રેઝિસ્ટન્સ ₹4,15,000થી ₹4,20,000ની આસપાસ છે. વિશ્લેષકોનું માનવું છે કે પુરવઠાની માળખાકીય અછત તેમજ સોલર, ઇલેક્ટ્રિક વાહનો અને AI સેક્ટરમાંથી આવતી ઉદ્યોગિક માંગ ચાંદી માટે લાંબા ગાળાની તેજીનું મજબૂત આધાર પૂરો પાડે છે.
