કેન્દ્ર સરકારે ચાર્જરના ભાગો અને બેટરી મશીનરી પરની કસ્ટમ્સ ડ્યુટી નાબૂદ કરી દીધી
ઓટોમોટિવ, મેડિકલ અને ઔદ્યોગિક સાધનોમાં વપરાતી ડિસ્પ્લે એસેમ્બલીના ભાગો, મોબાઇલ ફોનના વાયરલેસ ચાર્જિંગ મોડ્યુલમાં વપરાતા ભાગો અને લિથિયમ-આયન સેલ બનાવવા માટે વપરાતી મશીનરી પરની કસ્ટમ્સ ડ્યુટી (આયાત વેરો) માંથી સંપૂર્ણ મુક્તિ આપી
દેશમાં ઉત્પાદન (મેન્યુફેક્ચરિંગ) ને વેગ આપવા માટે, કેન્દ્ર સરકારે ત્રણ સત્તાવાર આદેશો દ્વારા ઓટોમોટિવ, મેડિકલ અને ઔદ્યોગિક સાધનોમાં વપરાતી ડિસ્પ્લે એસેમ્બલીના ભાગો, મોબાઇલ ફોનના વાયરલેસ ચાર્જિંગ મોડ્યુલમાં વપરાતા ભાગો અને લિથિયમ-આયન સેલ બનાવવા માટે વપરાતી મશીનરી પરની કસ્ટમ્સ ડ્યુટી (આયાત વેરો) માંથી સંપૂર્ણ મુક્તિ આપી છે. બુધવારે મોડી રાત્રે જારી કરાયેલા આ આદેશોનો હેતુ સ્થાનિક ઇલેક્ટ્રોનિક્સ ઉદ્યોગને ઉત્પાદન ખર્ચ ઘટાડીને ટેકો આપવાનો છે, ખાસ કરીને એવા સમયે જ્યારે પશ્ચિમ એશિયાની કટોકટીએ વૈશ્વિક સપ્લાય ચેનને ખોરવી નાખી છે અને શિપિંગ ખર્ચમાં વધારો કર્યો છે.
લિથિયમ-આયન સેલ ઉત્પાદનમાં વપરાતી મશીનરીની એક મોટી યાદીને હવે કોઈપણ અંતિમ-ઉપયોગના પ્રતિબંધો વિના ડ્યુટી મુક્તિ માટે પાત્ર બનાવવામાં આવી છે, જેણે પ્રતિબંધોવાળી અગાઉની ટૂંકી યાદીનું સ્થાન લીધું છે. આ ડ્યુટી મુક્તિનો લાભ 31 માર્ચ, 2029 સુધી મળશે. અગાઉ આ ઉત્પાદનો પર 7.5 થી 15 ટકા સુધીની ડ્યુટી લાગતી હતી. આ પગલાથી ઓટોમોટિવ, ઇલેક્ટ્રિક વાહનો (EV), તબીબી ઉપકરણો અને હેલ્થકેર સાધનો, ઔદ્યોગિક ઇલેક્ટ્રોનિક્સ, મોબાઇલ ફોન અને સ્માર્ટફોન ઉત્પાદન, કન્ઝ્યુમર ઇલેક્ટ્રોનિક્સ, બેટરી ઉત્પાદન અને એનર્જી સ્ટોરેજ સિસ્ટમ્સ સહિતના વ્યાપક ક્ષેત્રોને ફાયદો થશે.
ડિસ્પ્લેના ભાગો અને લિથિયમ-આયન સેલ મશીનરી પરની ડ્યુટી રાહતથી સંરક્ષણ ક્ષેત્રને પણ ટેકો મળવાની અપેક્ષા છે, ખાસ કરીને ડ્રોન, રોબોટ્સ, અનમેન્ડ (માનવરહિત) સિસ્ટમ્સ અને અન્ય અદ્યતન સાધનોના ઉત્પાદનમાં જે ઉચ્ચ ગુણવત્તાવાળા ડિસ્પ્લે અને બેટરી પર આધાર રાખે છે. એક જાહેરનામા દ્વારા ઓટોમોટિવ, મેડિકલ અને ઔદ્યોગિક ઉપયોગ માટે ડિસ્પ્લે એસેમ્બલી બનાવવા માટે વપરાતા પાંચ ઘટકોને 31 માર્ચ, 2029 સુધી બેઝિક કસ્ટમ્સ ડ્યુટી (BCD) માંથી મુક્તિ આપવામાં આવી છે. આમાં સેલ, ફ્લેક્સિબલ પ્રિન્ટેડ સર્કિટ એસેમ્બલી, બેકલાઇટ યુનિટ, ફ્રેમ અને એનઆઈસોટ્રોપિક કંડક્ટિવ ફિલ્મ (ACF) નો સમાવેશ થાય છે. આ પગલાનો હેતુ આ ક્ષેત્રોમાં વપરાતી ડિસ્પ્લે એસેમ્બલીના ઉત્પાદનને પ્રોત્સાહન આપવાનો છે.
આ મામલાથી વાકેફ એક વ્યક્તિએ નામ ન આપવાની શરતે જણાવ્યું હતું કે, સેલ્યુલર મોબાઇલ ફોન, વેરેબલ ડિવાઇસ (પહેરી શકાય તેવા સાધનો), ટેલિવિઝન અને ઇન્ટરેક્ટિવ ફ્લેટ પેનલ ડિસ્પ્લે માટેના આવા જ સમાન ભાગો પહેલેથી જ તેમના સંબંધિત માળખા હેઠળ કસ્ટમ્સ ડ્યુટીના રાહત દરનો લાભ મેળવી રહ્યા છે. ઇલેક્ટ્રોનિક્સ અને ઇન્ફોર્મેશન ટેક્નોલોજી સચિવ એસ. ક્રિષ્નને ગુરુવારે જણાવ્યું હતું કે, ડિસ્પ્લે એસેમ્બલી, લિથિયમ-આયન સેલ અને ઇન્ડક્ટર કોઈલ મોડ્યુલના ઉત્પાદનમાં વપરાતી વસ્તુઓ પરની BCD મુક્તિ સ્થાનિક ઉત્પાદન ઇકોસિસ્ટમની વેલ્યુ ચેનને વધુ મજબૂત બનાવવામાં મદદ કરશે. ઉદ્યોગજગતોની રજૂઆતોના આધારે અમે આ મુદ્દો નાણા મંત્રાલય સમક્ષ ઉઠાવ્યો હતો. અમે ખૂબ જ ખુશ છીએ કે આ જાહેરનામા બહાર પાડવામાં આવ્યા છે. આનાથી દેશમાં ઇલેક્ટ્રોનિક્સ ઉદ્યોગ, ખાસ કરીને ઇલેક્ટ્રોનિક ઘટકોના ઉદ્યોગને ખરેખર મોટું પ્રોત્સાહન મળશે, તેમ ક્રિષ્નને CII GCC બિઝનેસ સમિટ દરમિયાન જણાવ્યું હતું.
એક અલગ આદેશમાં, સરકારે સેલ્યુલર મોબાઇલ ફોનમાં વાયરલેસ ચાર્જિંગ માટે ઇન્ડક્ટર કોઈલ મોડ્યુલ બનાવવા માટે વપરાતા છ ઘટકો પર 31 માર્ચ, 2029 સુધી શૂન્ય કસ્ટમ્સ ડ્યુટી લંબાવી છે. ઉપર ટાંકેલી વ્યક્તિએ ઉમેર્યું હતું કે આનાથી મોબાઇલ ફોન ઉત્પાદનમાં વેલ્યુ એડિશન વધુ મજબૂત બનશે. ત્રીજા આદેશ દ્વારા લિથિયમ-આયન સેલ ઉત્પાદન માટે કસ્ટમ્સ ડ્યુટી રાહત માટે પાત્ર મશીનરીની હાલની યાદીને બદલીને 85 કેપિટલ ગુડ્સની વિસ્તૃત યાદી મૂકવામાં આવી છે. સુધારેલી યાદીમાં કોટિંગ મશીન, વાઇન્ડિંગ મશીન, વેલ્ડિંગ સિસ્ટમ, ટેસ્ટિંગ ઇક્વિપમેન્ટ, ફોર્મેશન મશીન, ડ્રાયિંગ સિસ્ટમ અને લિથિયમ-આયન સેલ ઉત્પાદન પ્રક્રિયામાં વપરાતા અન્ય વિશિષ્ટ ઉત્પાદન સાધનોનો સમાવેશ થાય છે.
| કેટેગરી | કવર થયેલી વસ્તુઓ | જૂનો દર (%) | નવો દર (31 માર્ચ, 2029 સુધી) |
| ડિસ્પ્લે એસેમ્બલી (ઓટોમોટિવ, મેડિકલ અને ઇન્ડસ્ટ્રિયલ) | સેલ, ફ્લેક્સિબલ પ્રિન્ટેડ સર્કિટ એસેમ્બલી, બેકલાઇટ યુનિટ, ફ્રેમ, એનઆઈસોટ્રોપિક કંડક્ટિવ ફિલ્મ (ACF) | 7.5% – 15% | 0% (શૂન્ય) |
| વાયરલેસ ચાર્જિંગ ઇન્ડક્ટર કોઈલ | નેનો-ક્રિસ્ટલાઇન એસેમ્બલી, ઇ-શીલ્ડ, PET લાઇનર, PC શિમ (Z-લાઇનર સાથે), મેઇન સ્ટ્રેન્ડેડ ઇન્ડક્ટર કોઈલ અને NFC કોઈલ, NdFeB મેગ્નેટ્સ | 7.5% – 15% | 0% (શૂન્ય) |
| લિથિયમ-આયન સેલ ઉત્પાદન મશીનરી | પાવડર ડ્રાયર્સ, કોટિંગ મશીન, વાઇન્ડિંગ મશીન, ફિલિંગ અને સીલિંગ મશીન, ટેસ્ટિંગ ઇક્વિપમેન્ટ, વેલ્ડિંગ મશીન, ફોર્મેશન મશીન સહિત 85 કેપિટલ ગુડ્સ | 7.5% – 15% |
