હાલ પૂરતું ક્રૂડ ઓઈલના ભાવ શેરબજારની ચાલ નક્કી કરનારું મુખ્ય પરિબળ બનશે: નિલેશ શાહ

ઓઈલનો પુરવઠો ખોરવાઈ શકે છે. ઓઈલના પુરવઠા પર લાગનારા અંકુશોની માત્ર શક્યતા પણ ઓઈલ માર્કેટ અને શેરબજારના સેન્ટિમેન્ટને પ્રભાવિત કરે છે.

ઓઈલ માર્કેટ એવા સંકેતો આપી રહ્યું છે કે પુરવઠો ફરીથી ખોરવાઈ શકે છે, જેના કારણે ભાવમાં ફરી વધારો થઈ શકે છે. આ તમામ બાબતોની અસર શેરબજાર પર જોવા મળશે. પશ્ચિમ એશિયા (મિડલ ઈસ્ટ) માં તાજેતરમાં વધેલા તણાવને કારણે આ સપ્તાહની શરૂઆતમાં વૈશ્વિક નાણાકીય બજારોમાં ગભરાટ જોવા મળ્યો હતો. કોટક મહિન્દ્રા એએમસીના મેનેજિંગ ડિરેક્ટર નિલેશ શાહનું કહેવું છે કે, તાજેતરના ભૌગોલિક-રાજકીય (જીઓપોલિટિકલ) પ્રવાહો વચ્ચે શેરબજારના રોકાણકારોએ આગામી સમયમાં વળતર (રિટર્ન) ની અપેક્ષાઓ મર્યાદિત રાખવાની જરૂર છે. ઈન્ટરવ્યૂના મુખ્ય અંશો નીચે મુજબ છે:

નિલેશ શાહનું કહેવું છે કે હું આને વધુ પડતી પ્રતિક્રિયા નહીં કહું. જ્યારે પણ શાંતિ કે સમાધાનના સંકેતો દેખાય છે ત્યારે બજારમાં તેજી આવે છે, અને જ્યારે પરિસ્થિતિ બગડવાનો ડર ફરી સપાટી પર આવે છે ત્યારે બજાર ઘટે છે. આ પ્રકારની વધ-ઘટ કુદરતી છે. આપણે બજારમાં આવા ગતિરોધની અપેક્ષા રાખવી જ જોઈએ, કારણ કે ઘણો ખરો આધાર અમેરિકાના પ્રમુખ ડોનાલ્ડ ટ્રમ્પના પગલાં અને નિવેદનો પર રહેલો છે. પશ્ચિમ એશિયામાં તણાવ વધવાથી બજારમાં ચિંતા રહેશે. અત્યારે બજાર માટે કોઈ ચોક્કસ રેન્જ નક્કી કરવી મુશ્કેલ છે. હાલ પૂરતું, ક્રૂડ ઓઈલનું બજાર અને તેના ભાવ જ ઈક્વિટી (શેરબજાર) ની ચાલ નક્કી કરનારું મુખ્ય પરિબળ રહેશે.

ક્રૂડ ઓઈલના ભાવ

વાત માત્ર ઓઈલના ભાવની નથી, પરંતુ તેના પુરવઠા (સપ્લાય) ની પણ છે. જે ક્ષણે બજારને ડર લાગે છે કે ઓઈલનો પુરવઠો ખોરવાઈ શકે છે (જેમ કે હોર્મુઝની સામુદ્રધુનીમાં અવરોધ), બજાર તરત જ પ્રતિક્રિયા આપે છે. પુરવઠા પર લાગનારા અંકુશોની માત્ર શક્યતા પણ ઓઈલ માર્કેટ અને શેરબજારના સેન્ટિમેન્ટને પ્રભાવિત કરે છે. ઓઈલ માર્કેટ સંકેત આપી રહ્યું છે કે પુરવઠો ફરી મર્યાદિત થઈ શકે છે, જેના કારણે ભાવમાં ફરીથી વધારો થઈ શકે છે. આ બધી બાબતો શેરબજારોના પ્રદર્શન પર અસર કરશે. પુરવઠો ખોરવાશે તો ભાવ વધશે, જે આખરે માંગને નબળી પાડશે અને તેનાથી કંપનીઓની કમાણી પર પણ અસર થશે. ક્રૂડ ઓઈલના ભાવની ભાવિ ચાલ અંગે વર્તમાન સંજોગોમાં કઈ જ કહેવું મુશ્કેલ છે કારણ કે બધું જ જમીની પરિસ્થિતિ પર નિર્ભર કરે છે. પુરવઠામાં કેટલો વિક્ષેપ પડે છે તેના પર ભાવનો આધાર રહેશે. આ સાથે જ, બજારે હવે એ પણ સ્વીકારવાનું શરૂ કર્યું છે કે પ્રમુખ ટ્રમ્પના નિવેદનો હંમેશા વાસ્તવિક પગલાંમાં બદલાતા નથી. આ કારણે બજારની પ્રતિક્રિયાઓ હવે વધુ સંયમિત બની છે. એટલે જ બજારમાં હવે ઘટાડો નાનો અને રિકવરી ઝડપી થઈ રહી છે.

નાણાકીય વર્ષ ૨૦૨૭ ના પ્રથમ ક્વાર્ટરના પરિણામો

પરિણામોમાં પશ્ચિમ એશિયાના સંઘર્ષની સંપૂર્ણ અસર જોવા મળશે. ઓઈલ માર્કેટિંગ કંપનીઓ (OMCs) ખોટ નોંધાવે તેવી શક્યતા છે; એકંદરે કોર્પોરેટ કમાણીની વૃદ્ધિ સિંગલ ડિજિટમાં (ખૂબ ઓછી) રહી શકે છે અથવા નકારાત્મક પણ થઈ શકે છે. જો ઓઈલ કંપનીઓને બાકાત રાખીએ તો પણ પેટ્રોકેમિકલ્સ, પેટ્રોલીયમ પ્રોડક્ટ્સ, પોલિમર્સ અને કેમિકલ્સ જેવા આખી સપ્લાય ચેઈન સાથે જોડાયેલા ઉદ્યોગો પ્રભાવિત થયા છે. લાર્જ-કેપ કંપનીઓ માટે સિંગલ-ડિજિટ અને સ્મોલ તેમજ મિડ-કેપ કંપનીઓ માટે કમાણી વૃદ્ધિ લો-ડબલ ડિજિટમાં રહેવાની ધારણા છે.

કોર્પોરેટ કમાણીમાં રિકવરી 

ચોક્કસપણે, કોર્પોરેટ કમાણીની રિકવરીમાં હવે વિલંબની અપેક્ષા છે. પહેલાં ડિસેમ્બર ક્વાર્ટરમાં લેબર કોડ (શ્રમ કાયદા) ના ફેરફારોની અસર હતી, ત્યારબાદ મિડલ ઈસ્ટ સંઘર્ષે માર્ચ અને જૂન ક્વાર્ટરને પ્રભાવિત કર્યા. હવે સપ્ટેમ્બર ક્વાર્ટર ચોમાસા (મોન્સૂન) થી પ્રભાવિત થઈ શકે છે. આમ, સતત ચાર ક્વાર્ટર અલગ-અલગ અસ્થાયી કારણોથી પ્રભાવિત થયા છે, જેનાથી રિકવરી પાછી ઠેલાઈ છે. બજારમાં અસ્થિરતા (વોલેટિલિટી) ચાલુ રહેશે. ઓઈલ માર્કેટ ટૂંકા ગાળા માટે મુખ્ય પરિબળ રહેશે. રોકાણકારોએ રિટર્નની અપેક્ષાઓ મર્યાદિત રાખીને સિંગલ-ડિજિટથી લઈને લો-ડબલ ડિજિટ (૮% થી ૧૨%) ની આસપાસ રાખવી જોઈએ.

રોકાણકારોએ શું કરવું જોઈએ?

બજારનું વેલ્યુએશન અત્યારે વ્યાજબી છે, બહુ મોંઘું નથી. રોકાણકારોએ પોતાનું એલોકેશન ન્યુટ્રલ (તટસ્થ) રાખવું જોઈએ. બજારમાં બધાય નાણાં એકસાથે રોકવાને બદલે, ધીમે-ધીમે હપ્તાવાર (સ્ટૅગર્ડ એપ્રોચ) રોકાણ કરવું એ શ્રેષ્ઠ વ્યુહરચના છે કારણ કે બજારમાં અસ્થિરતા ચાલુ રહેવાની સંભાવના છે.