૮૦-જીની મંજૂરી પૂરી થવાના છ માસ પૂર્વે અરજી કરવાના નિયમ મુજબ અરજી કરવાની તારીખ ચૂકી જનારા ટ્રસ્ટોેને વિલંબ માફ કરી દેવા સીબીડીટીનો આદેશ
મંજૂરીની મુદત પૂરી થવાના છેલ્લા દિવસ સુધીમાં અરજી કરનારાઓની અરજી સ્વીકારી લેવાની કમિશનરને સૂચના આપી
ચેરિટેબલ ટ્રસ્ટની ૮૦-જીની મંજૂરી પૂરી થવાના છ માસ બાકી હો ય તે પહેલા જ રિન્યુઅલ માટેની અરજી કરી દેવાના બહાર પાડેલા નિયમ મુજબ ૩૦મી સપ્ટેમ્બર ૨૦૨૫ સુધીમાં અરજી ન કરી શકેલા તથા ૮૦-જીની મંજૂરી પૂરી થવાના છેલ્લા દિવસ ૩૧મી માર્ચ ૨૦૨૬ પહેલા અરજી કરી દેનારાઓને અરજીઓ સ્વીકારી લઈને તેમને ૮૦-જીની મંજૂરી આપવા માટેની પ્રક્રિયા કરી દેવાનો આદેશ સેન્ટ્રલ બોર્ડ ઓફ ડાયરેક્ટ ટેક્સિસે આજે કર્યો છે.
આમ ૩૧મી માર્ચ ૨૦૨૬ પહેલા અરજી કરી દેનારા ચેરિટેબલ ટ્રસ્ટોની અરજી સ્વીકારીને તેને પ્રોસેસ કરીને યોગ્ય જણાય તો મંજૂરી આપી દેવાની સૂચના આપવામાં આવી છે. ચેરિટેબલ ટ્રસ્ટ આવકવેરાની કલમ ૮૦-જી (૫) હેઠળ ડોનેશનની રકમ વેરામાંથી બાદ આપવા માટે ફોર્મ નંબર ૧૦-એબી ભરીને અરજી કરવાનો નિયમ છે. પહેલા આ મંજૂરી દર ત્રણ વર્ષે દેવામાં આવતી હતી. છેલ્લા નિયમ મુજબ આ મંજૂરી ૫ વર્ષ પૂરા થવાના છ માસ બાકી હોય ત્યારે લઈ લેવાનું નક્કી કરવામાં આવ્યુ ંહતું. તેથી ૩૧મી માર્ચ ૨૦૨૬ના જેમની ૮૦-જીની મંજૂરી પૂરી થતી હોય તે ટ્રસ્ટોએ ૩૦મી સપ્ટેમ્બર ૨૦૨૫ પહેલા અરજી કરી દેવાની આવતી હતી.
પરંતુ આ મુદત હજારો ટ્રસ્ટો ચૂકી ગયા હતા. જોકે ત્યારબાદ તેમણે છ મહિના પહેલા અરજી કરવાનો નિયમ હોવા છતાંય તેમની મુદત ૩૧મી માર્ચ ૨૦૨૬ સુધીમાં પૂરી થાય તે પહેલા અરજી કરી દીધી હતી. આમ પહેલી ઓક્ટોબર ૨૦૨૫થી ૩૧મી માર્ચ ૨૦૨૬ સુધીમાં અરજી કરનારાઓને વિલંબ માફ કરી દેવાનો આદેશ સેન્ટ્રલ બોર્ડ ઓફ ડાયરેક્ટ ટેક્સિસે આપ્યો છે. સીબીડીટીના આ આદેશને પરિણામે લિટીગેશન થવાના પ્રમાણમાં ખાસ્સો ઘટાડો આવી જવાની સંભાવના છે. કારણ કે કમિશનર ચેરિટેબલ ટ્રસ્ટ (એક્ઝમ્પશન-વેરા માફી)ના પગલાં સામે સમગ્ર ગુજરાત અને સમગ્ર દેશમાંથી વિરોધ નોંધાવવામાં આવ્યો હતો. દેશભરના કમિશનર -એક્ઝમ્પશનને આ અંગેની સૂચના પણ આપી દેવામાં આવી છે. કમિશનર એક્ઝમ્પશનના પ્રસ્તુત નિર્ણયને પરિણામે પડનારી તકલીફ હળવી કરવા માટે ફોર્મ ૧૦એબી ભરવામાં થયેલા વિલંબ માટે માફી આપી દેવાનો નિર્ણય લેવામાં આવ્યો છે. આ અરજીઓનો ૩૧મી ડિસેમ્બર સુધીમાં યોગ્ય નિકાલ કરવાની સૂચના આપી દેવામાં આવી છે. આ વિલંબ માફ કરવાની અરજી અંગે કમિશનર ઇન્કમટેક્સ એક્ઝમ્પશનને જણાવી દેવામાં આવ્યું છે.
