પેટ્રોલથી ચાલતા જૂના વાહનોના 56 ટકા માલિકોએ E20 પેટ્રોલ રોલઆઉટ પછી ઓછી માઇલેજની ફરિયાદ કરી
ઈ-20ના પેટ્રોલથી પિકઅપ ઓછો થવો, એન્જિન નોકિંગ અથવા રફ આઇડલિંગ (એન્જિન ધ્રૂજવું) જેવી સમસ્યાઓ
ઈ-20 પેટ્રોલ લોન્ચ કરતાં પહેલા જ ઓટોમોબાઈલ એક્સપર્ટ્સે ચેતવણી આપી હતી કે 18 ટકાથી વધુ ઇથેનોલ ભેળવવાથી વાહનોની એવરેજ ઘટી જશે
વર્ષ ૨૦૨૩ પહેલા બનેલા પેટ્રોલ વાહનોના અડધાથી વધુ માલિકોએ ૨૦૨૫ની શરૂઆતથી ઇંધણની કાર્યક્ષમતામાં (એવરેજમાં) ઘટાડો થયો હોવાની રજૂઆત કરી છે. દેશભરમાં E20 પેટ્રોલના અમલીકરણ બા ઘણા વાહનચાલકોએ એન્જિનના પર્ફોર્મન્સની સમસ્યાઓ, ઊંચો મેન્ટેનન્સ (નિભાવ) ખર્ચ અને ફ્યુઅલ-સિસ્ટમને લગતી મુશ્કેલીઓનો પણ સામનો કરવો પડ્યો છે. આ સર્વે ભારતમાં E20 પેટ્રોલ લાગુ થયાના એક વર્ષ કરતાં વધુ સમય પછી અને એપ્રિલ ૨૦૨૬ના તે આદેશ પછી આવ્યો છે, જેમાં દેશભરમાં E20 ઇંધણ માટે લઘુત્તમ રિસર્ચ ઓક્ટેન નંબર (RON) ૯૫ હોવો અનિવાર્ય કરાયો હતો. જોકે ઈ-20 પેટ્રોલ લોન્ચ કરતાં પહેલા જ ઓટોમોબાઈલ એક્સપર્ટ્સે ચેતવણી આપી હતી કે 18 ટકાથી વધુ ઇથેનોલ ભેળવવાથી વાહનોની એવરેજ ઘટી જશે
લોકલસર્કલના માધ્યમથી કરવામાં આવેલા એક સર્વેક્ષણમાં જાણવા મળ્યું છે કે જૂના પેટ્રોલ વાહનોના માલિકોની મોટી સંખ્યા એવું માને છે કે વાહનના પર્ફોર્મન્સ અને ઓપરેટિંગ ખર્ચ પર E20 પેટ્રોલની વાસ્તવિક અસર સત્તાવાર અંદાજો કરતાં નોંધપાત્ર રીતે વધારે છે. એન્જિનના પર્ફોર્મન્સ સંબંધિત સમસ્યાઓ બીજા ક્રમની સૌથી વધુ નોંધાયેલી ચિંતા હતી, જેમાં ૪૩ ટકા ઉત્તરદાતાઓએ પાવર લોસ (પિકઅપ ઓછો થવો), એન્જિન નોકિંગ અથવા રફ આઇડલિંગ (એન્જિન ધ્રૂજવું) જેવી સમસ્યાઓનો ઉલ્લેખ કર્યો હતો. આ ઉપરાંત, ૩૪% લોકોએ જણાવ્યું હતું કે તેઓએ ઊંચા રિપેરિંગ અને મેન્ટેનન્સ ખર્ચનો સામનો કરવો પડ્યો છે, જ્યારે ૨૦% લોકોએ ફ્યુઅલ-સિસ્ટમને લગતી સમસ્યાઓ નોંધાવી હતી.
સર્વેમાં એ પણ બહાર આવ્યું છે કે ૧૯% ઉત્તરદાતાઓએ એન્જિન વધુ ગરમ થવાની (હીટિંગની) સમસ્યા અનુભવી હતી અને ૧૬% લોકોએ વાહન સ્ટાર્ટ થવામાં મુશ્કેલી થતી હોવાનું જણાવ્યું હતું. અન્ય ૧૯ ટકા વાહન વપરાશકારોએ કહ્યું કે તેઓએ એકસાથે અનેક સમસ્યાઓનો સામનો કરવો પડ્યો હતો. ઉત્તરદાતાઓને એક કરતાં વધુ વિકલ્પ પસંદ કરવાની મંજૂરી હોવાને કારણે કુલ ટકાવારી ૧૦૦ ટકા કરતાં વધી ગઈ હતી. માત્ર ૨૬ ટકા ઉત્તરદાતાઓએ જણાવ્યું હતું કે તેઓએ ૨૦૨૫ની શરૂઆતથી તેમના વાહનોમાં કોઈ સમસ્યા અનુભવી નથી.
અગાઉના સર્વેનું ફોલો-અપ આ નવીનતમ સર્વે ૫ જૂન ૨૦૨૬ના રોજ બહાર પાડવામાં આવેલા અગાઉના લોકલસર્કલના અભ્યાસ પર આધારિત છે, જે E20 પેટ્રોલ તરફ સ્થળાંતર કર્યા પછી ઓછી માઇલેજના કારણે થતી નાણાકીય અસર પર કેન્દ્રિત હતો. સર્વેમાં૨૦૨૩ પહેલાના પેટ્રોલ વાહનોના ૪૨,૦૦૦ થી વધુ માલિકો સામેલ હતા. 42000 વાહન માલિકોમાંથી 22000થી વધુ જૂના વાહનમાલિકોએ તેમના જવાબમાં જણાવ્યું હતું કે તેમની કારની એવરેજ ઓછી થઈ ગઈ છે. તેમાં ધ્રુજારી અનુભવાઈ રહી છે.
અગાઉના સર્વેમાં એ પણ જાણવા મળ્યું હતું કે ૫૫ ટકા ઉત્તરદાતાઓ ઇથેનોલ-મુક્ત E0 પેટ્રોલ અથવા ઓછા બ્લેન્ડ વાળા E10 પેટ્રોલ પર પાછા જવાનો વિકલ્પ ઇચ્છતા હતા, કાં તો તાત્કાલિક અથવા જો આવા ઇંધણ E20 ની સમકક્ષ કિંમતે ઉપલબ્ધ હોય તો. માત્ર ૧૨ ટકા લોકોએ કહ્યું કે તેઓ E20 પેટ્રોલ ચાલુ રાખવાનું પસંદ કરે છે. લોકલસર્કલના જણાવ્યા અનુસાર, આ તારણો સૂચવે છે કે જૂના વાહનોના માલિકો દ્વારા ભોગવવામાં આવતો આર્થિક બોજ ઓટોમોટિવ રિસર્ચ એસોસિએશન ઓફ ઇન્ડિયા (ARAI) દ્વારા અંદાજવામાં આવેલા ઇંધણ કાર્યક્ષમતામાં ૧ ટકાથી ૬ ટકાના ઘટાડા કરતાં ઘણો વધારે હતો.
ઇથેનોલ બ્લેન્ડિંગ વધતાં ચિંતા વધી ક્રૂડ ઓઇલની આયાત ઘટાડવા, સ્થાનિક કૃષિને ટેકો આપવા અને કાર્બન ઉત્સર્જન ઘટાડવાના પ્રયાસોના ભાગરૂપે ભારતે તેના ઇથેનોલ-બ્લેન્ડિંગ (મિશ્રણ) કાર્યક્રમનો વિસ્તાર કરવાનું ચાલુ રાખ્યું છે. સરકારી નીતિ ઇથેનોલ બ્લેન્ડિંગને સમર્થન આપતી રહી છે અને E20 કરતાં ઊંચા ઇંધણ મિશ્રણો અંગે ચર્ચાઓ ચાલી રહી છે. તે એ પણ દર્શાવે છે કે સુપ્રિમ કોર્ટે, ૨૦૨૫ માં, કેટલાક વાહન માલિકો અને હિતધારકો દ્વારા ઇથેનોલ-મુક્ત વિકલ્પોની વિનંતીઓ છતાં E20 ના અમલીકરણને યથાવત રાખ્યું હતું.
આ પૃષ્ઠભૂમિમાં, લોકલસર્કલ એ જણાવ્યું હતું કે નવીનતમ તારણો સૂચવે છે કે જૂના પેટ્રોલ વાહનોના માલિકોની ચિંતાઓ માત્ર માઇલેજના નુકસાન પૂરતી મર્યાદિત નથી પરંતુ તેમાં મિકેનિકલ અને ઓપરેશનલ પડકારોની વ્યાપક શ્રેણી સામેલ છે. સરવેનો રિપોર્ટ જણાવે છે કે ભારત જેમ-જેમ તેના ઇથેનોલ-બ્લેન્ડિંગ રોડમેપ પર આગળ વધી રહ્યું છે, તેમ-તેમ નીતિનિર્માતાઓ, ઓટોમોબાઇલ ઉત્પાદકો અને ઇંધણ સપ્લાયર્સે જૂના (લેગસી) વાહનોના માલિકોના અનુભવો પર વધુ ધ્યાન આપવાની જરૂર પડી શકે છે. લોકલસર્કલના જણાવ્યા અનુસાર, જૂના વાહનોના માલિકો દ્વારા ઉઠાવવામાં આવેલી ચિંતાઓને દૂર કરવા માટે વધારાના સેફગાર્ડ્સ (સુરક્ષાત્મક પગલાં), ગ્રાહક જાગૃતિના પગલાં, ટેકનિકલ સપોર્ટ સિસ્ટમ અને ઇંધણના વિકલ્પોની સમીક્ષાની જરૂર પડી શકે છે.
