ટાન નંબરની અરજીમાં કંપનીએ ડેઝિગ્નેટેડ વ્યક્તિનું નામ અને ફોન નંબર આપવો પડશે

ટેક્સ ડીડક્શન એન્ડ કલેક્શન એકાઉન્ટ નંબર-ટાન માટેના નવા નિયમો જાહેર કરવામાં આવ્યા

ટેક્સ ડિડક્શન એન્ડ કલેક્શન એકાઉન્ટ નંબર મેળવવા માટેના નવા નિયમો હેઠળ દરેક કંપનીએ હવે ડેઝિગ્નેટેડ વ્યક્તિનું નામ, સરનામું અને તેનો મોબાઈલ નંબર આપવો ફરજિયાત કરવામાં આવ્યો છે. ટેક્સ ડિડક્શન એન્ડ કલેક્શન એકાઉન્ટ નંબરના નવા નિયમો હેઠળ આ જોગવાઈ કરવામાં આવી હોવાની જાહેરાત સીબીડીટીએ કરી છે. પહેલા ફોર્મ નંબર ૪૯-બી આ વ્યવસ્થા કરવાની હતી, હવે ફોર્મ નંબર ૧૩૪ અને ફોર્મ નંબર ૧૩૫ તેને માટે દાખલ કરવામાં આવ્યા છે.

આવકવેરાના નિષ્ણાત પ્રમોદ પોપટનું કહેવું છે કે ફોર્મ નંબર ૧૩૪ સરકારી કંપનીઓ માટે છે. કંપનીઓએ ટાન નંબર મેળવવા માટે હવે પ્રુફ ઓફ ઇન્કોર્પોરેશન એટલે કે તેમનું મેમોરેન્ડમ ઓફ અન્ડરસ્ટેન્ડિંગ મૂકવું પડશે. ટાન-ટેક્સ ડીડક્શન એન્ડ કલેક્શન એકાઉન્ટ નંબર મેળવવા માટે એલએલપી-લિમિટેડ લાયેબિલિટી કંપનીઓએ પણ એમ.ઓ.યુ. રજૂ કરવું પડશે. જ્યારે વ્યક્તિગત કરદાતાઓએ ટાન-ડેક્સ ડીડક્શન એન્ડ કલેક્શન એકાઉન્ટ નંબર લેવા માટે આધારકાર્ડ જેવું ઓળખ કાર્ડ રજૂ કરવું ડશે. ઓડિટને પાત્ર કંપનીઓને આ વ્યવસ્થા હેઠળ આવરી લેવામાં આવી છે.

પ્રમોદ પોપટનું કહેવું છે કે સરકારી કંપનીઓ કેટલો ટીડીએસ અને ટીસીએસ કરે છે તે અને ખાનગી વ્યક્તિઓ કે કંપનીઓ ટીડીએસ અને ટીસીએસ કેટલું કરીને જમા આપે છે તે માટે જ અલગ અલગ ફોર્મ નક્કી કરવામાં આવ્યા છે. સીબીડીટીના સૂત્રોનું કહેવું છે કે ડિજિટાઈઝેશન વધી રહ્યું હોવાથી અને આવકવેરા કચેરી દ્વારા વધુ ચુસ્તપણે સ્ક્રૂટિની કરવામાં આવતી હોવાથી અને ટીડીએસના નિયમોનું પાલન કરવાનું વધુ કડક બનાવી દેવામાં આવ્યું છે. તેને માટે બે નવા ફોર્મ ૧૩૪ અને ૧૩૫ બહાર પાડવામાં આવ્યા છે.

ઉપરોક્ત બે ફોર્મ ભરવામાં કરવામાં આવેલી નાનામાં નાની ભૂલને કારણે ટાન નંબર મળવામાં વિલંબ થઈ શકે છે. ટાન નંબર ન હોય તો કરકપાતની રકમ સરકારમાં જમા કરાવી જ શકાતી નથી. નવા સુધારાઓને પરિણામે કોઈપણ જાતની ભૂલ વિના જ ટીડીએસના રિટર્ન ફાઈલ કરી શકાશે. ટેક્સના વહીવટમાં વધુ પારદર્શકતા આવી જશે.

નવા નિયમોનું પાલન કરવાને પરિણામે ટીડીએસના રિફંડ લેવાની તેમની અરજીઓ રદ થઈ જવાની સંભાવના સીમિત થઈ જશે. ટીડીએસ કે ટીસીએ-ટેક્સ કલેક્શન એટ સોર્સ કરતાં પહેલા ટાન-ટેક્સ ડિડક્શન એન્ડ કલેક્શન એકાઉન્ટ નંબર માટેની અરજી કરી દેવાની રહેશે. પાન કાર્ડ અને ટેક્સના અન્ય રેકોર્ડ સાથે સુસંગત રહીને ટીડીએસ કે ટીસીએસની વિગતો મળી શકશે. જોકે ફોર્મ નંબર ૧૩૪ કે ૧૩૫માં કોઈ ક્ષતિ થાય તો ટેક્સ ડિડક્શન એન્ટ કલેક્શન એકાઉન્ટ નંબર-ટાન મળવામાં ખાસ્સો વિલંબ થઈ શકે છે. ટીડીએસ કર્યા પછી તે જમા કરાવવાને લગતી જોગવાઈનો ભંગ કરવામાં આવ તો જે તે કરદાતાને મોટી રકમનો દંડ થઈ શકે છે

ટેક્સ ડિડક્શન એન્ડ કલેક્શન એકાઉન્ટ નંબરના નવા નિયમોને કારણે કરકપાતના આંકડાંઓમાં ચોકસાઈ જોવા મળશે. તેનું એક નિશ્ચિત ધોરણ ઊબું થઈ જશે. કરકપાતના સંદર્ભમાં અરજીઓ ફાઈલ કરવી સરળ બની જશે. તેમ જ કરકપાતની વિગતોને સમર્થન આપવું કે માન્ય ઠેરવવાની પ્રક્રિયા વધુ સંગીન બની જશે. ડિજિટલ કોમ્પ્લાયન્સ સિસ્ટમના સુમેળમાં જ કરકપાતની સિસ્ટમ કાર્ય કરતી થઈ જશે.