ડૉક્ટર્સ-ડેન્ટિસ્ટ અને મેડિકલ પ્રોફેશનલ્સની કરચોરી રોકવા સરકારે ગાળીયો કસ્યો

ડૉક્ટર્સ, ડેન્ટિસ્ટ અને મેડિકલ પ્રોફેશનલ્સની કરચોરી રોકરવા સરકારે નવું ફોર્મ નંબર 25 બહાર પાડ્યું

ફોર્મ નંબર 25માં દરદીનું નામ, સરનામું, દરદીએ લીધેલા સારવાર, કન્સલ્ટેશન અને તેના થકી મેળવેલી વાસ્તવિક ફીનો રેકોર્ડ દર મહિને તૈયાર કરવો પડશે, તેનું મેળવણું કરવું પડશે

ડૉક્ટર્સ-ડેન્ટિસ્ટના એન્યુઅલ ઇન્ફોર્મેશન સ્ટેટમેન્ટ, ટીડીએસ રિટર્ન સાથે તેની તુલના કરીને પછી કરવેરાની ચોરી પકડી પાડવાની કવાયત કરવામાં આવશે

દરદીઓ પાસેથી રોકડમાં ફી વસૂલીને આવકવેરાની મોટી ચોરી કરનારા ડૉક્ટર્સ, ડેન્ટિસ્ટ અને મેડિકલ પ્રોફેશનલ્સની કરચોરી પકડી પાડવા માટે આવકવેરા ખાતાએ નવું ફોર્મ 25 બહાર પાડ્યું છે. આવકવેરાના 2026ની સાલના નિયમો હેઠળ આ ફોર્મ બહાર પાડવામાં આવ્યું છે. આ ફોર્મ ભરવાનું આવતા ડૉક્ટર્સ, ડેન્ટિસ્ટ અને મેડિકલ પ્રોફેશનલ્સની કરચોરી ઘટી જવાનો અંદાજ મૂકવામાં આવી રહ્યો છે. મેડિકલ પ્રેક્ટિશમાંથી થઈ પાઈએ પાઈનો હિસાબ ફોર્મ 25માં આપવાની ફરજ પાડવામાં આવી છે.

આવકવેરાના નિષ્ણાત પ્રમોદ પોપટનું કહેવું છે કે આ ફોર્મ સામાન્ય ક્લિનિક ચલાવતા ડૉક્ટર્સ, હોસ્પિટલ કન્સલ્ટન્ટ્, ડેન્ટિસ્ટ, પેથોલોજી અને રેડિયોલોજીના એક્સપર્ટ્સ ઉપરાંત પરંપરાગત મેડિકલ પ્રેક્ટિશનર્સે ભરીને આપવાનું આવશે. ફોર્મ નંબર 25માં ડૉક્ટરે તેની પાસે રોજેરોજ આવેલા પેશન્ટ્સના રજિસ્ટરનો રેકોર્ડ મૂકવો પડશે. આમ તેમની ક્લિનિક કે ઓફિસમાં થતી દરેક પ્રોફેશનલ એક્ટિવિટીનો હિસાબ આપવો પડશે.

એક, ડૉક્ટરોએ તેમની ક્લિનિક માં આવતા પેશન્ટ્સની પાસે વાસ્તવમાં વસૂલેલી ફીની વિગતો આપવી પડશે. તેમને મળેલી ફી રોકડામાં કે ચેકથી મળી છે તે પણ જણાવવું પડશે. આવકવેરાના 2026ની સાલના નિયમ નંબર 46 હેઠળ દરેક ડૉક્ટર્સ અને પ્રેક્ટિશનર્સે જે તે ક્ષણે થયેલા તેના કામકાજ અને આવકની વિગતો આપવી પડશે. તેમણે દરદીનું નામ, સરનામું, સારવાર લીધાની તારીખ, કેવા પ્રકારની સારવાર લીધી, તેણે આઉટ પેશન્ટ ડિપાર્ટમેન્ટમાં સારવાર લીધી કે કોઈ શસ્ત્રક્રિયા કરાવી, તેમની પાસેથી ફી પેટે કેટલી રકમ લીધી, યુપીઆઈ કે ક્રેડિટ કાર્ડથી તેમને કેટલી ફી જમા મળી, રોકડેથી કેટલી ફી જમા મળી, ફી મળ્યાની તારીખ શુદ્ધાની વિગતો આપવી ફરજિયાત કરી દેવામાં આવી છે.

ઉપરોક્ત દરેક બાબતનો રેકોર્ડ ડૉક્ટર્સે તૈયાર કરીને જાળવી રાખવો પડશે. પ્રમોદ પોપટનું કહેવું છે કે ડૉક્ટર્સે છેલ્લા સાત વર્ષનો રેકોર્ડ રાખવો પડશે. આવકવેરાના આકરણી અધિકારી જ્યારે માગે ત્યારે આ વિગતો ડૉક્ટર્સ, ડેન્ટિસ્ટ અને મેડિકલ પ્રોફેશનલ્સે રજૂ કરવી પડશે. ડૉક્ટર્સ કે ડેન્ટિસ્ટના રિટર્ન સ્ક્રૂટિની હેઠળ હોય તો તેમણે સ્ક્રૂટિની પૂરી ન થાય ત્યાં સુધીના તમામ રેકોર્ડ સાચવી રાખવા પડશે.

આવકવેરા ખાતું ડૉક્ટર્સ અને ડેન્ટિસ્ટ તથા મેડિકલ પ્રેક્ટિશનર્સની દરદી દીઠ આવકની વિગતો મેળવવા માગે છે. તેમ જ તેમણે આપેલા સારવારના ખર્ચના બિલ અને વાસ્તવમાં મળતી રકમ વચ્ચેના ગાળાને પકડી પાડવા માટે આ વ્યવસ્થા ઊભી કરવામાં આવી રહી છે. આ વ્યવસ્થા હેઠળ મળનારી માહિતીની એન્યુઅલ ઇન્ફોર્મેશન સ્ટેટમેન્ટ અને ટીડીએસના સ્ટેટમેન્ટ તથા હોસ્પિટલમાં તૈયાર કરવામાં આવેલી વિગતો સાથે સરખામણી કરીને તેની મદદથી કરચોરીની આકારણી કરવામાં આવશે.

આવકવેરા ખાતાની સૂચના મુજબ વિગતો તૈયાર ન કરનાર ડૉક્ટર, ડેન્ટિસ્ટ કે પછી મેડિકલ પ્રોફેશનલ્સે આવકવેરા ખાતાની સૂચનાની અવગણના કરી હોવાનું માનવામાં આવશે. તેમના હિસાબી ચોપડાં તૈયાર નહિ હોય તો પણ તેમણે નિયમોનું પાલન ન કર્યું હોવાનું માની લઈને તેમને દંડ કરવામાં આવશે. ત્યારબાદ આકારણી અધિકારી કે જે તે આવકવેરા અધિકારી પોતાની રીતે ડૉક્ટર્સ કે ડેન્ટિસ્ટ અથવા તો પછી મેડિકલ પ્રોફેશનલ્સની આવકમાં ઉમેરો કરશે. રૂ. 1.5 લાખની વાર્ષિક આવકથી વધુ આવક હશે તે બધાંએ રોજ બરોજની પ્રેક્ટિશનો રિપોર્ટ તૈયાર રાખવો પડશે.આ રિપોર્ટનું દર મહિને મેળવણું કરવું પડશે.