પેટ્રોલ અને ડીઝલના ભાવ ચોથીવાર વધાર્યા, રૂ. ૨.૬૧ થી રૂ. ૨.૭૧ નો વધારો
બે અઠવાડિયામાં જ ચોથી વારના ભાવ વધારો સાથે કુલ ભાવ વધારો લિટરદીઠ રૂ. ૭.૫ને પાર કરી ગયો
આંતરરાષ્ટ્રીય બજારમાં ક્રૂડ ઓઇલ ની વધતી કિંમતોનો બોજ સરકારી તેલ કંપનીઓએ ગ્રાહકો પર નાખવાનું ચાલુ રાખતા સોમવારે પેટ્રોલ અને ડીઝલના ભાવમાં લીટર દીઠ ₹૨.૬૧ થી ₹૨.૭૧ નો તોતિંગ વધારો ઝીંકવામાં આવ્યો છે. છેલ્લા બે અઠવાડિયા કરતાં પણ ઓછા સમયમાં ભાવમાં આ ચોથો મોટો વધારો છે.
આ નવીનતમ ભાવ વધારા સાથે, ૧૫ મે થી શરૂ થયેલા ઈંધણના ભાવ સુધારા બાદ અત્યાર સુધીમાં પેટ્રોલ અને ડીઝલની કિંમતોમાં કુલ મળીને લગભગ રૂ.૭.૫ પ્રતિ લીટરનો વધારો થઈ ચૂક્યો છે. આ પહેલાં લાંબા સમય સુધી દેશમાં ઈંધણના ભાવો સ્થિર રાખવામાં આવ્યા હતા.
ઉદ્યોગના આંતરિક સૂત્રોના જણાવ્યા અનુસાર, દેશની રાજધાની દિલ્હીમાં પેટ્રોલની કિંમત ₹૨.૬૧ વધીને ₹૯૯.૫૧ થી સીધી રૂ. ૧૦૨.૧૨ પ્રતિ લીટર પર પહોંચી ગઈ છે. જ્યારે ડીઝલનો ભાવ રૂ. ૨.૭૧ વધીને રૂ.૯૨.૪૯ થી રૂ. ૯૫.૨૦ પ્રતિ લીટર થઈ ગયો છે.
વૈશ્વિક બજારમાં ક્રૂડ ઓઇલના ઊંચા ભાવો અને અમેરિકી ડોલર સામે ભારતીય રૂપિયાના અવમૂલ્યનને કારણે તેલ માર્કેટિંગ કંપનીઓનો આયાત ખર્ચ ઘણો વધી ગયો છે, જેના દબાણ હેઠળ આ ભાવ વધારો કરવામાં આવ્યો છે.
