સોશિયલ મિડીયા પર શેરબજારની ટીપ્સ, ગેરંટીડ રિટર્નના દાવા કરનારાઓથી ચેતતા રહો
NSEની એક એડવાઇઝરી અનુસાર, મોબાઇલ નંબર 8003629549 પરથી કાર્યરત એક વ્યક્તિ, ‘Mehta is Back’ નામની યુટ્યુબ ચેનલ અને ‘Art of Trading’ નામની ટેલિગ્રામ ચેનલ દ્વારા રોકાણકારોને શેરબજાર સંબંધિત ભલામણો આપવામાં આવે છે. રોકાણ પર નિશ્ચિત અથવા ગેરંટીવાળા નફાના વચનો આપવામાં આવે છે તેમજ રોકાણકારોના ટ્રેડિંગ એકાઉન્ટ સંભાળવાની સેવા પણ ઓફર કરવામાં આવે છે. NSEના જણાવ્યા અનુસાર, આવી બિનચકાસાયેલ વ્યક્તિઓ અથવા સંસ્થાઓ સાથે વ્યવહાર કરતી વખતે રોકાણકારોએ અત્યંત સાવચેતી રાખવી જોઈએ. અલગથી જાહેર કરાયેલી બીજી એડવાઇઝરીમાં NSEએ બિશાલ નામના વ્યક્તિ અંગે ચેતવણી આપી છે, જે પોતે ‘Index Fund’ નામની સંસ્થા સાથે જોડાયેલ હોવાનો દાવો કરે છે.
NSEના જણાવ્યા મુજબ, આ વ્યક્તિ મોબાઇલ નંબર 8974738447 અને ‘INDEX FUND’ નામની યુટ્યુબ ચેનલ મારફતે કાર્યરત છે. એક્સચેન્જના જણાવ્યા મુજબ, બિશાલ પણ શેરબજારમાં રોકાણ કરીને ગેરંટીવાળા નફા અને રોકાણકારોના એકાઉન્ટ સંચાલનની સેવાઓ આપવાનો દાવો કરે છે. શેરબજારમાં નિશ્ચિત અથવા ગેરંટીવાળા નફાના આવા વચનો સામાન્ય રીતે નિર્દોષ રોકાણકારોને આકર્ષવા માટે આપવામાં આવે છે અને તેના કારણે તેમને મોટું આર્થિક નુકસાન થઈ શકે છે. NSEએ સ્પષ્ટ કર્યું છે કે રોકાણ સંબંધિત કોઈપણ સેવા આપતા વ્યક્તિ અથવા સંસ્થાને નાણાં ટ્રાન્સફર કરતા પહેલાં અથવા પોતાના ટ્રેડિંગ એકાઉન્ટની ઍક્સેસ આપતા પહેલાં તેની નોંધણી અને અધિકૃતતા અંગે સ્વતંત્ર રીતે ચકાસણી કરવી જોઈએ.
એક્સચેન્જે રોકાણકારોને એવી કોઈપણ યોજના અથવા પ્રોડક્ટમાં જોડાવા સામે ચેતવણી આપી છે, જે શેરબજારમાં સંકેતાત્મક, નિશ્ચિત અથવા ગેરંટીવાળા નફાનું વચન આપે છે, કારણ કે કાયદા હેઠળ આવા દાવા પ્રતિબંધિત છે. NSEએ રોકાણકારોને પોતાની ટ્રેડિંગ વિગતો, જેમ કે યુઝર આઈડી અને પાસવર્ડ, કોઈપણ તૃતીય પક્ષ સાથે શેર ન કરવાની પણ સલાહ આપી છે. મહત્વની બાબત એ છે કે NSEએ સ્પષ્ટ કર્યું છે કે આ એડવાઇઝરીમાં ઉલ્લેખિત વ્યક્તિઓ અથવા સંસ્થાઓ પૈકી કોઈપણ NSEના નોંધાયેલ સભ્ય નથી અને ન તો તેઓ કોઈ નોંધાયેલ NSE સભ્યના અધિકૃત પ્રતિનિધિ છે.
રોકાણકારોને સલાહ આપવામાં આવી છે કે તેઓ કોઈપણ બ્રોકર અથવા અધિકૃત વ્યક્તિ સાથે વ્યવહાર કરતા પહેલાં NSEની લોકેટ યોર સ્ટોક બ્રોકરની સુવિધાના માધ્યમથી તેની ચકાસણી કરી લેવી જરૂરી છે. એક્સચેન્જે વધુમાં જણાવ્યું છે કે આવી બિનઅધિકૃત યોજનાઓમાં ભાગ લેવાનું સંપૂર્ણ જોખમ રોકાણકારનું પોતાનું રહેશે. જો આવા લોકો સાથે વ્યવહાર કરીને કોઈ નુકસાન થાય, તો તે NSEની રોકાણકાર સુરક્ષા વ્યવસ્થા હેઠળ આવરી લેવામાં ન પણ આવે. ઉપરાંત આવા રોકાણકારોને એક્સચેન્જની વિવાદ નિવારણ અને ફરિયાદ નિવારણ વ્યવસ્થાનો લાભ પણ ન મળી શકે.
તાજેતરની આ ચેતવણીઓ એવા સમયે બહાર પાડવામાં આવી છે જ્યારે સોશિયલ મીડિયા, મેસેજિંગ એપ્લિકેશન્સ અને ઓનલાઈન પ્લેટફોર્મનો ઉપયોગ કરીને બિનનોંધાયેલ ઓપરેટરો દ્વારા નાના રોકાણકારોને અસંભવિત નફાના વચનો આપી આકર્ષવાના બનાવોમાં વધારો થઈ રહ્યો છે.
બજાર નિયામકો અને સ્ટોક એક્સચેન્જો વારંવાર ચેતવણી આપી રહ્યા છે કે શેરબજારમાં ગેરંટીવાળા નફાનું વચન હંમેશા જોખમનું સંકેત (Red Flag) હોય છે અને રોકાણકારોએ માત્ર યોગ્ય રીતે નોંધાયેલા અને અધિકૃત મધ્યસ્થીઓ સાથે જ વ્યવહાર કરવો જોઈએ. રોકાણકારોને સલાહ આપવામાં આવે છે કે નાણાં ટ્રાન્સફર કરતા પહેલાં નોંધણીની સંપૂર્ણ ચકાસણી કરે અને શેરબજારમાં ઝડપથી અથવા ગેરંટીવાળા નફાનું વચન આપતી કોઈપણ યોજનાથી દૂર રહે તો તે તેમના હિતમાં રહશે.
