IPLનું બિઝનેસ વેલ્યુ વધીને $20.6 બિલિયન થયું, RCB સૌથી મૂલ્યવાન ફ્રેન્ચાઇઝી બની

IPLનું બિઝનેસ વેલ્યુ વધીને $20.6 બિલિયન થયું, RCB સૌથી મૂલ્યવાન ફ્રેન્ચાઇઝી બની

આ વર્ષે રોયલ ચેલેન્જર્સ બેંગલુરુ (RCB) અને રાજસ્થાન રોયલ્સ (RR)ની માલિકી બે “લેન્ડમાર્ક ટ્રાન્ઝેક્શન” દ્વારા બદલાઈ, જે IPLમાં સંસ્થાકીય વિશ્વાસમાં વધારો સૂચવે છે

રોયલ ચેલેન્જર્સ બેંગલુરુ $312 મિલિયનની બ્રાન્ડ વેલ્યુ સાથે સૌથી મૂલ્યવાન ફ્રેન્ચાઇઝી તરીકે પ્રથમ ક્રમે રહી, જે વાર્ષિક ધોરણે 16 ટકાનો વધારો દર્શાવે છે. આ સાથે $300 મિલિયનનો આંકડો પાર કરનારી તે પ્રથમ ફ્રેન્ચાઇઝી બની છે. આ વર્ષે રોયલ ચેલેન્જર્સ બેંગલુરુ (RCB) અને રાજસ્થાન રોયલ્સ (RR)ની માલિકી બે મુખ્ય વ્યવહારો દ્વારા બદલાઈ, જે IPLમાં સંસ્થાકીય વિશ્વાસ વધતો હોવાનું દર્શાવે છે.

ગ્લોબલ ઇન્વેસ્ટમેન્ટ બેંક, હુલિહાન લોકે, ઇન્ક. દ્વારા બહાર પાડવામાં આવેલા અહેવાલ મુજબ, ઇન્ડિયન પ્રીમિયર લીગ (IPL)નું બિઝનેસ વેલ્યુ વાર્ષિક 11.4 ટકા વધીને $20.6 બિલિયન થઈ ગયું છે.   દસ ટકાથી વધારેની વૃદ્ધિનું આ સતત બીજું વર્ષ છે. T20 લીગની એકલી બ્રાન્ડ વેલ્યુ વાર્ષિક 10.3 ટકા વધીને $4.3 બિલિયન થઈ છે, જેમાં 2023થી અત્યાર સુધીમાં $1.1 બિલિયનથી વધુનો ઉમેરો થયો છે. અહેવાલમાં જણાવાયું છે કે આ બાબત વિશ્વની સૌથી મૂલ્યવાન સ્પોર્ટ્સ બ્રાન્ડ્સમાં લીગના સ્થાનને વધુ મજબૂત કરે છે અને પ્રતિ-મેચ ધોરણે તે NFL પછી તુરંત જ આવે છે.

આ વર્ષે રોયલ ચેલેન્જર્સ બેંગલુરુ (RCB) અને રાજસ્થાન રોયલ્સ (RR)ની માલિકી બે “લેન્ડમાર્ક ટ્રાન્ઝેક્શન” દ્વારા બદલાઈ, જે IPLમાં સંસ્થાકીય વિશ્વાસમાં વધારો સૂચવે છે. અગ્રણી વૈશ્વિક રોકાણકારો લીગની દર્શકોની વિશાળ ક્ષમતા, અનુમાનિત આવકના સ્ત્રોત અને લાંબા ગાળાના વ્યાપારી વિકાસની શક્યતાઓને વધુને વધુ ઓળખી રહ્યા છે. એક વૈશ્વિક માલિકી ધરાવતી અને સંસ્થાકીય ટેકો ધરાવતી એસેટ ક્લાસ તરીકે ક્રિકેટનો વિકાસ 2026માં વધુ ઝડપી બન્યો છે, જેમાં IPL વૈશ્વિક રમતગમતના ક્ષેત્રને નવેસરથી વ્યાખ્યાયિત કરવાનું ચાલુ રાખે છે. આ વર્ષે બજારમાં થયેલા મુખ્ય ફ્રેન્ચાઇઝી વ્યવહારોથી એ સ્પષ્ટ થયું છે કે આ લીગ વૈશ્વિક, સંસ્થાકીય અને વ્યૂહાત્મક મૂડીને આકર્ષવાની ક્ષમતા ધરાવે છે, જેના માટે તેની રચના કરવામાં આવી હતી. ફ્રેન્ચાઇઝીના મૂલ્યાંકન નવા શિખરે પહોંચ્યા છે, ખાનગી મૂડીની ભાગીદારી વધી છે અને લીગની વ્યાપારી ઇકોસિસ્ટમ વધુ વૈવિધ્યસભર બની રહી છે, એમ હુલિહાન લોકેના ફાઇનાન્શિયલ એન્ડ વેલ્યુએશન એડવાઇઝરીનું કહેવું છે.

તેમનું કહેવું છે કે, “પ્રતિ-મેચ ધોરણે, IPLના મીડિયા રાઇટ્સ વિશ્વની સૌથી મોટી સ્પોર્ટ્સ લીગ સાથે સરખામણી કરી શકાય તેવા છે, અને માત્ર અઢાર વર્ષ જૂની સ્પર્ધા માટે આ અદ્ભુત બાબત છે. સેન્ટ્રલાઇઝ્ડ મીડિયા રાઇટ્સ, રેવન્યુ શેરિંગ અને નાણાકીય શિસ્તતાએ એક એવું મોડેલ બનાવ્યું છે જે સ્થિર અને ટકાઉ છે. હું આગામી મીડિયા રાઇટ્સ સાયકલ વિશે આશાવાદી છું, એટલા માટે નહીં કે હું એક માલિક છું, પરંતુ એટલા માટે કે તેના પાયા વધુ મજબૂત બની રહ્યા છે. પંજાબ કિંગ્સના સહ-માલિક નેસ વાડિયાએ જણાવ્યું હતું.

દરમિયાન, રોયલ ચેલેન્જર્સ બેંગલુરુ $312 મિલિયનની બ્રાન્ડ વેલ્યુ સાથે સૌથી મૂલ્યવાન ફ્રેન્ચાઇઝી તરીકે ઉભરી આવ્યું છે, જેમાં વાર્ષિક 16 ટકાનો વધારો થયો છે. તે $300 મિલિયનનો આંકડો પાર કરનારી પ્રથમ ફ્રેન્ચાઇઝી બની છે. અહેવાલમાં ઉમેરાયું છે કે, “ફ્રેન્ચાઇઝીનું આ મૂલ્યાંકન મેદાન પરની સતત સફળતા, અસાધારણ ફેન એંગેજમેન્ટ અને ડિજિટલ રીતે પરિપક્વ કમર્શિયલ ઇકોસિસ્ટમની અસરો દર્શાવે છે જે લીગમાં નવા માપદંડો સ્થાપિત કરે છે.”

મુંબઈ ઇન્ડિયન્સ IPL 2026માં નવમા ક્રમે રહ્યા છતાં તેની મજબૂત બ્રાન્ડ સ્થિતીને કારણે $264 મિલિયનની બ્રાન્ડ વેલ્યુ સાથે બીજા ક્રમે રહ્યું હતું, જેમાં વાર્ષિક 9.1 ટકાનો વધારો થયો હતો. કોલકાતા નાઇટ રાઇડર્સ $245 મિલિયન સાથે ત્રીજા સ્થાને રહ્યું (7.9%નો વધારો). ચેન્નાઈ સુપર કિંગ્સ $244 મિલિયનની બ્રાન્ડ વેલ્યુ સાથે ચોથા ક્રમે રહ્યું, જેમાં વાર્ષિક 3.8 ટકાની વૃદ્ધિ નોંધાઈ હતી.

જ્યારે સનરાઇઝર્સ હૈદરાબાદ $168 મિલિયન (+9.1%) ની બ્રાન્ડ વેલ્યુ સાથે પાંચમા સ્થાને રહ્યું, રાજસ્થાન રોયલ્સ $161.0 મિલિયન (+10.3%) સાથે છઠ્ઠા ક્રમે રહ્યું, જેને પ્લેઓફમાં પહોંચવાનો અને નવયુવાન ખેલાડી વૈભવ સૂર્યવંશીના આગમનનો તેમ જ મુખ્ય માલિકી વ્યવહારનો લાભ મળ્યો. પંજાબ કિંગ્સ ($158.0 મિલિયન) 7મા ક્રમે અને ગુજરાત ટાઇટન્સ $157.0 મિલિયન સાથે 8મા ક્રમે રહ્યું. બ્રાન્ડ વેલ્યુએશનની દ્રષ્ટિએ દિલ્હી કેપિટલ્સ નવમા ક્રમે અને લખનૌ સુપર જાયન્ટ્સ દસમા ક્રમે રહ્યા છે.

દરમિયાન, અહેવાલમાં નોંધવામાં આવ્યું છે કે આ વર્ષની આવૃત્તિએ મીડિયા વપરાશમાં માળખાકીય ફેરફાર દર્શાવ્યો છે, જેમાં રેકોર્ડ ડિજિટલ સ્કેલ સાથે ટીવી વ્યુઅરશિપમાં ઘટાડો અને ડિજિટલમાં વધારો જોવા મળ્યો છે. “બ્રોડકાસ્ટમાંથી ડિજિટલ તરફનું આ સ્થળાંતર કમાણીની પ્રક્રિયાને નવું રૂપ આપી રહ્યું છે, જેનાથી ગૂગલ જેમિની (Google Gemini) સાથેના ત્રણ વર્ષના જોડાણ જેવી પ્રીમિયમ અને ડેટા-ડ્રાઇવન ભાગીદારી શક્ય બની છે, જ્યારે લીગની કુલ આવક $1.8 બિલિયનને વટાવી ગઈ છે.”

RCB ને બ્લેકસ્ટોન, બોલ્ટ વેન્ચર્સ, આદિત્ય બિરલા ગ્રુપ અને ટાઇમ્સ ઓફ ઇન્ડિયા ગ્રુપના એક જૂથ દ્વારા $1.78 બિલિયનના અંદાજિત મૂલ્યાંકને ખરીદવામાં આવી હતી, જે ઇતિહાસનો સૌથી મોંઘો સિંગલ IPL ફ્રેન્ચાઇઝી વ્યવહાર છે. જ્યારે રાજસ્થાન રોયલ્સને મિત્તલ પરિવાર અને આદર પૂનાવાલા દ્વારા $1.65 બિલિયનના અંદાજિત મૂલ્યાંકને ખરીદવામાં આવી હતી.