વડોદરાની લેબમાં માર્ચ મહિનાથી સરકારી હોસ્પિટલ્સમાં અપાતી દવાના સેમ્પલોના ટેસ્ટિંગ થતા નથી
ગુજરાતની પ્રજાનું આરોગ્ય ભગવાન ભરોસેઃ વડોદરાની લેબમાં માર્ચ મહિનાથી દવાના સેમ્પલોના ટેસ્ટિંગ થતા નથી
દવાના નમૂનાના ટેસ્ટિંગના કેમિકલ્સ માર્ચ મહિનાથી ખરીદાયા નથી: ગુજરાતની સરકારી હોસ્પિટલ્સમાં આપવામાં આવતી દવાઓના સેમ્પલ ટેસ્ટિંગ માટે વડોદરાની લેબમાં ચકાસણી માટે જાય છે
જાહેર હિસાબ સમિતિએ બોલાવીને છેલ્લા પાંચ વર્ષમાં ફેઈલ ગયેલા સેમ્પલ માટે શાં પગલાં લેવાયા તેનો ખુલાસો કરવા જણાવ્યું
અમદાવાદઃ ગુજરાતની સરકારી હોસ્પિટલ્સમાં કરવામાં આવતા દવાના સપ્લાયના નમૂનાઓ ટેસ્ટિંગ માટે ગુજરાતના ફૂડ એન્ડ ડ્રગ કમિશનરની કચેરીની દેખરેખ હેઠળ ચાલતી વડોદરાની લેબોરેટરીમાં દવાના ૭૫ ટકાથી વધુ સેમ્પલ્સની ગત માર્ચ મહિનાથી ચકાસણી કરવામાં આવી જ નથી. પરિણામે ગઈકાલે ફૂડ એન્ડ ડ્રગ કમિશરની કચેરીના અધિકારીઓને ચારથી પાંચ ઓગસ્ટે પબ્લિક એકાઉન્ટ કમિટીએ સ્પષ્ટતા કરવા બોલાવી હોવાનું બહાર આવ્યું છે. પબ્લિક એકાઉન્ટ કમિટીની મિટિંગમાં તેમણે પાંચ વર્ષમાં કેટલા સેમ્પલ ટેસ્ટ કર્યા અને સેમ્પલ ફેઈલ ગયા તે કંપનીઓ સામે શાં પગલાં લીધા તે અંગે પૂછપરછ કરી હતી.
જીએમએસસીએલ દ્વારા સરકારી હોસ્પિટલ્સના સપ્લાય માટે ખરીદવામાં આવતી દવાઓના નમૂના લઈને વડોદરાની લેબોરેટરીમાં ચકાસણી માટે મોકલવામાં આવે છે. તેને આધારે દવાની ગુણવત્તા નક્કી થયા પછી દવાઓ સરકારી હોસ્પિટલમાં સારવાર લેતા દરદીઓને આપવામાં આવે છે. આમ પ્રિટેસ્ટિંગના સેમ્પલ ટેસ્ટ થયા જ નથી. પરંતુ વડોદરાની લેબોરેટરી કાર્યક્ષમતાવિહીન અધિકારીઓના હાથમાં હોવાથી તેઓ દવાના ટેસ્ટિંગ માટેના કેમિકલ્સ ન હોવાનું કારણ આગળ ધરીને નમૂનાઓનું પરીક્ષણ કરતાં જ નથી. આ સ્થિતિમાં પરીક્ષણના પરિણામો વિના જ દવાઓનો સપ્લાય હોસ્પિટલ્સ સુધી જતો હોવાનું માનવામાં આવે છે. આ જ રીતે દવાની ગુણવત્તા શંકાસ્પદ જણાતા ડ્રગ ઇન્સ્પેક્ટર દ્વારા એકત્રિત કરીને લેબોરેટરીમાં મોકલવામાં આવતા સેમ્પલની ચકાસણી કરવામાં આવતી નથી.
માર્ચ મહિનાથી વડોદરાની લેબોરેટરીમાં સેમ્પલ ટેસ્ટિંગ માટે જોઈતા લાલ ટેસ્ટ રિ-એજન્ટ, મિથેનોલ, રેક્ટિફાઈડ સ્પિરીટ, એબસોલ્ટ આલ્કોહોલ જેવા કેમિકલ ખરીદવામાં આવતા નથી. ઉદાહરણ આપીને વાત કરીએ તો ગ્લુકોઝના બાટલાના પ્રવાહીની ગુણવત્તા ચકાસવા માટે જોઈતા લાલ ટેસ્ટ રિએજન્ટ વડોદરાની લેબોરેટરીમાં છે જ નહિ. માનવ શરીરમાં દવા ગયા પછી કેટલીવારમાં ડિઝોલ્વ થાય એટલે કે ઓગળીને શરીરની સિસ્ટમમાં ભળીને કામ કરતી થાય તેનો ટેસ્ટ કરવા માટેનું મશીન કોર્પોરેટ સોશિયલ રિસ્પોન્સિબિલિટી હેઠળ મફતમાં આપવામાં આવ્યું હોવા છતાં વડોદરાની લેબમાં તે મશીન વપરાયા વિના જ પડયું રહ્યું છે. તેનો ઉપયોગ જ ન કરવામાં આવતો હોય તેવી સ્થિતિ છે. આ મશીનનો ઉપયોગ કરીને દવાઓના ટેસ્ટ કરવા માટે જોઈતું ટ્રિપ્સિન નામનું કેમિકલ પણ માર્ચ મહિનાથી ખરીદાયું નથી. લેબોરેટરીને નિયમિત કેમિકલ જોઈતા હોવાથી દરેક વખતે તેની ખરીદી માટે મંજૂરી લેવાની ન હોવા છતાંય મંજૂરી માટે પત્ર લખવાની બિનજરૃરી પ્રક્રિયા કરવામાં આવે છે.
આ ફરિયાદો વધી જતાં જાહેર હિસાબ સમિતિએ પાંચમી ઓગસ્ટના અરસામાં ફૂડ એન્ડ ડ્રગ કમિશનરની કચેરીના અધિકારીઓને પૂછપરછ માટે બોલાવ્યા હતા. બીજીતરફ સ્ટોર માટે દવાની ખરીદી કરતાં અધિકારીએ પણ ટેસ્ટિંગ કરાવવાનું હોય છે. તેના સિનિયર અધિકારીની સૂચના છતાંય સ્ટોરના અધિકારી દવાના ટેસ્ટિંગ ન કરાવતા હોવાનું પણ જાણવા મળી રહ્યું છે. જીએમએસસીએલના અધિકારીઓને પણ દવાની ખરીદીના સંદર્ભમાં પૂછપરછ કરવા માટે બોલાવવામાં આવ્યા હોવાનું જાણવા મળી રહ્યું છે.
