ઈ-કેસીસી પોર્ટલના માધ્મયથી ત્રણ લાખથી વધુ કિસાન ક્રેડિટ કાર્ડ ડિજિટલ ઓનબોર્ડ થયા

ખેતી માટે ધિરાણ મેળવવા બેંકોના વારંવાર ચક્કર કાપતા અને કલાકો સુધી લાંબી લાઈનોમાં ઉભા રહેતા દેશના ખેડૂતોને બેંકોના ચક્કરની જફા અને લાંબી લાઈનોથી મુક્તિ મળશે

અમદાવાદઃ ખેતી માટે ધિરાણ મેળવવા બેંકોના વારંવાર ચક્કર કાપતા અને કલાકો સુધી લાંબી લાઈનોમાં ઉભા રહેતા દેશના ખેડૂતો માટે ડિજિટલાઇઝેશન આશીર્વાદરૂપ સાબિત થઈ રહ્યું છે. નેશનલ બેંક ફોર એગ્રીકલ્ચર એન્ડ રૂરલ ડેવલપમેન્ટ-નાબાર્ડ અને વડોદરા સ્થિત એગ્રી-ફિનટેક સ્ટાર્ટઅપ ’24X7 મનીવર્ક્સ કન્સલ્ટિંગ’ના સંયુક્ત પ્રયાસોથી ડિસેમ્બર ૨૦૨૫થી અત્યાર સુધીમાં ૩ લાખથી વધુ કિસાન ક્રેડિટ કાર્ડની અરજીઓને ‘eKCC’ પોર્ટલ મારફતે સફળતાપૂર્વક ડિજિટલી ઓનબોર્ડ કરી દેવામાં આવી છે.

eKCC પોર્ટલ કેવી રીતે કામ કરે છે?

આ ઇ-કેસીસી (eKCC) પોર્ટલ ખાસ કરીને કોઓપરેટિવ બેંકો અને પ્રાથમિક કૃષિ ધિરાણ મંડળીઓ (PACS) માટે ડિઝાઇન કરવામાં આવ્યું છે. પોર્ટલ પર ખેડૂતોનું ઓથેન્ટિકેશન, જમીનના રેકોર્ડની ચકાસણી અને વાવેતર હેઠળના વિસ્તાર તથા પાકની વિગતોના આધારે ધિરાણની મર્યાદા નક્કી કરવામાં આવે છે. ખેડૂતો પોતે જ પોર્ટલના માધ્યમથી પોતાના જિલ્લા અને પાક મુજબ તેમને મળવાપાત્ર કૃષિ લોનની પાત્રતા સીધી જાણી શકે છે. એક વર્ષથી પણ ઓછા સમયમાં આ પહેલ ૨૩૮ જેટલી સહકારી બેંકો અને આશરે ૩૨,૦૦૦ પ્રાથમિકકૃષિ ધિરાણ મંડળીઓ સુધી વિસ્તરી છે. એકલા કોઓપરેટિવ નેટવર્ક દ્વારા ૧.૭ લાખ કિસાન ક્રેડિટ કાર્ડની અરજીઓ ઓનલાઈન પ્રોસેસ કરાઈ છે.

પરંપરાગત પ્રક્રિયા અને ડિજિટલ પ્રક્રિયા વચ્ચેનો તફાવત

લક્ષણ / વિગત	પરંપરાગત KCC પ્રક્રિયા	eKCC ડિજિટલ પ્રક્રિયા
અરજીનો સમય (Turnaround Time)	૩ થી ૪ અઠવાડિયાનો સમય લાગતો	તાત્કાલિક અને ઝડપી ડિજિટલ મંજૂરી
બેંક મુલાકાતો	વારંવાર બેંકના ચક્કર અને લાંબી લાઈનો	ન્યૂનતમ મુલાકાતો, કાગળરહિત (Paperless)
ચકાસણી પદ્ધતિ	મેન્યુઅલ કાગળો અને જમીનના આધાર	ડિજિટલ ચકાસણી અને જમીન રેકોર્ડ વેલિડેશન

નાબાર્ડનું પ્રથમ સ્ટાર્ટઅપ રોકાણ

નાબાર્ડ દ્વારા 24X7 મનીવર્ક્સ કન્સલ્ટિંગમાં ૧૦% હિસ્સેદારી ખરીદવામાં આવી છે. નાબાર્ડનું કોઈ બુટસ્ટ્રેપ્ડ સ્ટાર્ટઅપમાં આ સર્વપ્રથમ રોકાણ છે. આ ઉપરાંત, આ સ્ટાર્ટઅપે ‘એગ્રીકલ્ચર ઈન્ફ્રાસ્ટ્રક્ચર ફંડ’ હેઠળ વ્યાજ સહાયના દાવોના રિયલ-ટાઈમ મેનેજમેન્ટ માટે પણ ડિજિટલ પ્લેટફોર્મ વિકસાવ્યું છે.

કૃષિ ધિરાણ અને વ્યાજ સહાય યોજના

દેશમાં હાલમાં ૭.૭૨ કરોડ સક્રિય KCC ધારકો છે, જેમાં પશુપાલન (૪૪ લાખ) અને મત્સ્યપાલન (૨.૪ લાખ) ક્ષેત્રના ધારકોનો પણ સમાવેશ થાય છે. નાણાકીય વર્ષ ૨૦૨૫-૨૬ માં કૃષિ ક્ષેત્રે કુલ રૂ. ૩૨.૫ લાખ કરોડથી વધુનું ધિરાણ પૂરું પાડવામાં આવ્યું છે, જેમાંથી ૬૦ ટકા રકમ ટૂંકા ગાળાની પાક લોન તરીકે આપવામાં આવી હતી.

ચાર ટકા વ્યાજે લોન: સુધારેલી વ્યાજ સહાય યોજના (MISS) હેઠળ KCC ધારક ખેડૂતોને રૂ. ૩ લાખ સુધીની ટૂંકા ગાળાની પાક લોન ૭ ટકા વ્યાજદરે મળે છે. જે ખેડૂતો સમયસર લોનની ભરપાઈ કરે છે તેમને વધારાની ૩ ટકા વ્યાજ રાહત મળતાં, અસરકારક વ્યાજ દર ઘટીને માત્ર ૪ ટકા થઈ જાય છે.