અમેરિકાએ જૂની સંપૂર્ણ રેન્ડમ લોટરીની જગ્યાએ વેજ-વેઇટેડ સિલેક્શન સિસ્ટમ લાગુ કરી

ઇમિગ્રેશન વકીલો અનુસાર, ભારતીય ઇન્ફોર્મેશન ટેક્નોલોજી (IT) કંપનીઓએ અમેરિકાના નાણાકીય વર્ષ 2027 (FY27), જે પહેલી ઓક્ટોબર, 2026થી 30 સપ્ટેમ્બર, 2027 સુધી ચાલે છે, માટે નવા H-1B વિઝા માટેની અરજીઓમાં મોટો ઘટાડો કર્યો છે. આ ઘટાડાનું મુખ્ય કારણ ગયા વર્ષે ડોનાલ્ડ ટ્રમ્પ વહીવટીતંત્ર દ્વારા વિઝા ફીમાં કરવામાં આવેલો ભારે વધારો અને લોટરી સિસ્ટમમાં કરવામાં આવેલા ફેરફારો છે. નવી વ્યવસ્થામાં વધુ પગાર ધરાવતા કર્મચારીઓને પસંદગીમાં વધુ પ્રાધાન્ય મળતું હોવાથી કંપનીઓએ લાંબા સમયથી ઉપયોગમાં લેવાતી ભરતીની પદ્ધતિ પર બ્રેક લગાવી છે.

H-1B રજિસ્ટ્રેશનમાં 38.5 ટકાનો ઘટાડો

અમેરિકાની United States Citizenship and Immigration Services (USCIS) અનુસાર, યોગ્ય રીતે રજૂ થયેલા એટલે કે પાત્ર H-1B રજિસ્ટ્રેશનની સંખ્યા FY27માં 38.5 ટકા ઘટીને 2,11,600 રહી હતી. એક વર્ષ અગાઉ FY26માં આ સંખ્યા 3,43,981 હતી. USCISની વેબસાઇટ પર ઉપલબ્ધ આંકડા મુજબ FY27નો આ આંકડો ઓછામાં ઓછા સાત વર્ષનો સૌથી નીચો સ્તર છે. 2024માં H-1B રજિસ્ટ્રેશનનો આંકડો સૌથી ઊંચો 7,58,994 રહ્યો હતો. જોકે, 2,11,600 અરજીઓમાંથી કેટલી નવી અરજીઓ, કેટલી વિઝા એક્સટેન્શન અને કેટલી સ્ટેટસ બદલવાની અરજીઓ હતી તે સ્પષ્ટ થઈ શક્યું નથી.

ઇમિગ્રેશન લૉ ફર્મના સ્થાપક અને મેનેજિંગ પાર્ટનર પૂર્વી ચોથાણીએ જણાવ્યું હતું કે, FY27ના H-1B કેપ કેસોમાં વોલ્યુમ FY26ની સરખામણીમાં 60થી 70 ટકા ઓછું રહ્યું હતું. તેમના મતે આ ઘટાડા પાછળ આર્ટિફિશિયલ ઇન્ટેલિજન્સ (AI) સોલ્યુશન્સનો વધતો ઉપયોગ તેમજ લોટરી સિસ્ટમમાં થયેલા ફેરફારો પણ જવાબદાર છે, જેમાં વધુ પગાર ધરાવતા કર્મચારીઓના રજિસ્ટ્રેશનને વધુ વજન આપવામાં આવ્યું છે.

અમેરિકાની નવી નીતિનો શું છે હેતુ?

અમેરિકી સરકાર છેલ્લા કેટલાક સમયથી H-1B વિઝા પ્રક્રિયા મારફતે કુશળ વિદેશી કર્મચારીઓની આવકને નિયંત્રિત કરવા માટે અનેક પગલાં લઈ રહી છે. સરકારનો દાવો છે કે આવા વિદેશી કર્મચારીઓ સ્થાનિક લોકોની નોકરીઓ છીનવી લે છે અને ઘણી વખત તેમને અમેરિકામાં પ્રવર્તમાન પગાર કરતાં ઓછો પગાર ચૂકવવામાં આવે છે. આ જ કારણસર સરકારે જૂની લોટરી સિસ્ટમની જગ્યાએ વેઇટેડ સિલેક્શન સિસ્ટમ તરફ આગળ વધવાનું શરૂ કર્યું છે. નવી વ્યવસ્થામાં વધુ કુશળ કર્મચારીઓને પ્રાધાન્ય આપવામાં આવશે. તેમાં અલગ-અલગ વેતન સ્તર બનાવવામાં આવશે અને વધુ પગાર ધરાવતી નોકરીઓ માટે પસંદગીની સંભાવના વધુ રહેશે.

TCS, Infosys અને Cognizantનો રસ્તો બદલાયો

આ પરિસ્થિતિને ધ્યાનમાં રાખીને Tata Consultancy Services (TCS), Infosys અને Cognizant જેવી IT કંપનીઓએ અમેરિકામાં પહેલેથી કામ કરી રહેલા કર્મચારીઓના H-1B વિઝાના એક્સટેન્શન માટે વધુ અરજીઓ કરી છે. સાથે સાથે કર્મચારીઓના ટ્રાન્સફર માટેની પિટિશનમાં પણ વધારો થયો છે. જોકે તેનો ચોક્કસ આંકડો તાત્કાલિક ઉપલબ્ધ થઈ શક્યો નથી. ઇમિગ્રેશન લૉ ફર્મ Cyrus D Mehta & Partnersના સ્થાપક અને મેનેજિંગ પાર્ટનર સાયરસ મેહતાના જણાવ્યા અનુસાર, કંપનીઓ $100,000ની ફીથી બચવા માટે મુખ્યત્વે H-1B વિઝાના એક્સટેન્શન અને સ્ટેટસ-ચેન્જ માટેની અરજીઓ કરી રહી છે. તેમણે કહ્યું કે હવે જો કોર્ટ દ્વારા આ ફી રદ કરવાનો નિર્ણય યથાવત રહે અને સ્થિતિ ચાલુ રહે તો આગામી માર્ચ 2027ની H-1B લોટરીમાં પસંદગી પામનારા વિદેશમાં રહેલા સંભવિત H-1B કર્મચારીઓ માટે વધુ કંપનીઓ H-1B પિટિશન દાખલ કરી શકે છે.

USCISએ હજુ સુધી પસંદ થયેલા રજિસ્ટ્રેશનની અંતિમ યાદી જાહેર કરી નથી. એક વખત H-1B હોય તો ફરી લોટરી જરૂરી નથી. પૂર્વી ચોથાણીએ જણાવ્યું હતું કે જ્યારે કોઈ H-1B કર્મચારી પોતાનું નોકરીદાતા એટલે કે એમ્પ્લોયર બદલે છે ત્યારે તેને ફરીથી લોટરી પ્રક્રિયામાંથી પસાર થવાની જરૂર પડતી નથી. મોટાભાગના કિસ્સામાં એમ્પ્લોયર બદલવાની પિટિશન દાખલ થયા બાદ કર્મચારી નવા એમ્પ્લોયર સાથે કામ શરૂ કરી શકે છે. આ ઉપરાંત FY26ની ઘણી H-1B પિટિશનને મંજૂરી મળવામાં નોંધપાત્ર વિલંબ થયો હતો. તેના કારણે એવા કર્મચારીઓનો એક સમૂહ તૈયાર થયો છે, જેમને FY27ના કેસોની પ્રક્રિયા પૂર્ણ થાય તે પહેલાં જ કામ માટે તૈનાત કરી શકાય છે.

ભારતીય IT કંપનીઓ એક દાયકાથી વિઝા પરની નિર્ભરતા ઘટાડે છે

ભારતીય IT કંપનીઓ છેલ્લા એક દાયકાથી H-1B વિઝા પરની પોતાની નિર્ભરતા ઘટાડવાનો પ્રયાસ કરી રહી છે. ખાસ કરીને ડોનાલ્ડ ટ્રમ્પના પ્રથમ કાર્યકાળથી કંપનીઓ અમેરિકાની સ્થાનિક કોલેજોમાંથી Science, Technology, Engineering and Mathematics (STEM) ક્ષેત્રના સ્નાતકોની વધુ ભરતી કરવા તરફ આગળ વધી રહી છે. સ્પેશિયાલિસ્ટ સ્ટાફિંગ કંપની Xpheno પાસેથી મેળવેલા આંકડા દર્શાવે છે કે 18 ભારતીય લિસ્ટેડ IT સર્વિસ કંપનીઓ અને Cognizant દ્વારા કરવામાં આવેલી કુલ H-1B અરજીઓમાં મોટો ઘટાડો થયો છે. 2024માં આ કંપનીઓની કુલ અરજીઓ 36,453 હતી, જે 2025માં ઘટીને માત્ર 8,160 રહી હતી.

અમેરિકન વિઝા અને ઇમિગ્રેશન સલાહકાર સુકન્યા રમને જણાવ્યું હતું કે હાલના આર્થિક સંજોગોમાં કંપનીઓ માટે પહેલેથી રહેલા H-1B પ્રતિભાશાળી કર્મચારીઓને જાળવી રાખવા અને તેમને ફરીથી વિવિધ પ્રોજેક્ટમાં તૈનાત કરવા વધુ ફાયદાકારક બની રહ્યું છે. તેમના જણાવ્યા અનુસાર, કંપનીઓ હવે વિઝા એક્સટેન્ડ કરવા, કર્મચારીઓને અલગ-અલગ પ્રોજેક્ટમાં ફરીથી તૈનાત કરવા, શક્ય હોય ત્યાં સ્થાનિક ભરતી કરવા અને વધુ કામ ભારત જેવા દેશોમાંથી ઓફશોર કરવાનું પસંદ કરી રહી છે. ભારતમાંથી નવા કર્મચારીને H-1B વિઝા પર અમેરિકા લઈ જવાનો નિર્ણય હવે વધુ ખર્ચાળ અને પસંદગી આધારિત બની ગયો છે, કારણ કે વિઝાનો ખર્ચ વધ્યો છે અને પસંદગી થવાની સંભાવના ઘટી  જ જવાની છે.