કરદાતાઓ અને ટેક્સ પ્રોફેશનલ્સને મોટી રાહત: આવકવેરા રિટર્ન તથા ઓડિટ રિપોર્ટ ફાઇલ કરવાની મુદતમાં વધારો

વિલંબિત રિટર્ન ફાઇલ કરવા પર કલમ 234F હેઠળ રૂ. 5,000 ની લેટ ફી ને કરદાતાની કુલ વાર્ષિક આવક રૂ. 5 લાખથી ઓછી હોય તો  રૂ. 1000ની લેટ ફી 

મુદતમાં વધારો થવાથી કલમ 234A હેઠળનું વ્યાજ અને કલમ 271B હેઠળ ઓડિટ રિપોર્ટ મોડો જમા કરાવવા બદલ લાગતા રૂ. 1.5 લાખ સુધીના દંડનું જોખમ ટળશે

અમદાવાદઃ ટેક્સ પ્રોફેશનલ્સ અને વિવિધ ચેમ્બર ઓફ કોમર્સ દ્વારા રજૂ કરવામાં આવેલી પ્રાયોગિક મુશ્કેલીઓ અને પોર્ટલ સંબંધિત સમસ્યાઓને ધ્યાનમાં રાખીને નાણા મંત્રાલય હેઠળના સેન્ટ્રલ બોર્ડ ઓફ ડાયરેક્ટ ટેક્સિસ-સીબીડીડીએ આવકવેરા રિટર્ન અને ટેક્સ ઓડિટ રિપોર્ટ  ફાઇલ કરવાની અંતિમ તારીખમાં 21 દિવસ લંબાવી આપી છે. આ રિટર્ન ફાઈલ કરવાની છેલ્લી તારીખ 31 ઓક્ટોબરથી લંબાવીને 21મી નવેમ્બર કરી આપવામાં આવી છે. આ વર્ષે ઇનકમ ટેક્સ પોર્ટલ પર નવી યુટિલિટીઝ અને ફોર્મ્સ મોડા ઉપલબ્ધ કરાવવામાં આવ્યા હતા તથા પોર્ટલ પર સતત ટેકનિકલ ખામીઓ સર્જાતી હતી. આ સિવાય જીએસટી રિકન્સિલિએશન અને એસએફટી સ્ટેટમેન્ટના કામકાજને કારણે ઓડિટ અને રિટર્ન તૈયારી માટે ખૂબ જ મર્યાદિત સમય મળ્યો હતો.

સરકારના આ ડેટ એક્સટેન્શનના નિર્ણયથી દેશના કરોડો કરદાતાઓ, ખાસ કરીને નાના અને મધ્યમ કદના વેપારીઓ, કંપનીઓ, એલએલપી તથા ચાર્ટર્ડ એકાઉન્ટન્ટ્સ અને ટેક્સ પ્રેક્ટિશનર્સને સીધો અને મોટો ફાયદો થશે. છેલ્લી ઘડીના દબાણ અને ઉતાવળમાં થતી ભૂલો વગર ચોકસાઈપૂર્વક હિસાબો તૈયાર કરવા માટે વધારાનો સમય મળશે, જેથી ઉતાવળમાં થતી દંડકીય કાર્યવાહી અને વિલંબિત ફીમાંથી મુક્તિ મળશે.

કલમ 234F હેઠળ લાગતી વિલંબ માટેની પેનલ્ટી

નિયત તારીખ પછી વિલંબિત રિટર્ન ફાઇલ કરવા પર કલમ 234F હેઠળ રૂ. 5,000 ની લેટ ફી ચૂકવવી પડે છે. જો કરદાતાની કુલ વાર્ષિક આવક રૂ. 5 લાખથી ઓછી હોય, તો આ લેટ ફીની રકમ મહત્તમ રૂ. 1,000 રહે છે. ટેક્સ નિષ્ણાતો અને ગુજરાત ચેમ્બર ઓફ કોમર્સ એન્ડ ઇન્ડસ્ટ્રી (GCCI) સહિતની સંસ્થાઓએ સરકાર સમક્ષ નીચે મુજબની રજૂઆતો કરી હતી. એક, યુટિલિટીઝ મુક્ત કરવામાં વિલંબ થયો તેથી પણ તારીખ લંબાવવામાં આવી છે. આવકવેરા વિભાગ દ્વારા ITR-3, ITR-5, ITR-6 જેવા મહત્વપૂર્ણ ફોર્મ્સ અને ઓડિટ સોફ્ટવેર મોડા અપડેટ કરવામાં આવ્યા હતા, જેના કારણે ટેક્સ પ્રોફેશનલ્સ પાસે ઓડિટનું કામ પૂર્ણ કરવા માટે ખુબ ઓછો સમય બચ્યો હતો.

બીજું, પોર્ટલ પર ટેકનિકલ ખામીઓ પણ તારીખ લંબાવવાની ફરજ પાડવામાં જવાબદાર છે. ઓનલાઇન પોર્ટલ પર ડેટા અપલોડિંગ અને ફોર્મ સબમિશન દરમિયાન સર્વર ધીમું પડવું તથા ટેકનિકલ એરર આવવાની પણ ખાસ્સી ફરિયાદ હતી. ઓડિટ સીઝન દરમિયાન જીએસટી ફાઇલિંગ, ટીડીએસ (TDS) સ્ટેટમેન્ટ અને નાણાકીય વ્યવહારોના સ્ટેટમેન્ટ (SFT) ની તારીખો ભેગી થવાથી એકાઉન્ટન્ટ્સ પર કામનું ભારે ભારણ ઊભું થયું હતું.

કરદાતાઓ માટે આ નિર્ણય શા માટે મહત્વપૂર્ણ છે?

કરદાતાઓ પોતાના ઓડિટ થયેલા નાણાકીય પત્રકો અને ટેક્સ ગણતરીની યોગ્ય ચકાસણી કરીને રિટર્ન ભરી શકશે.

1. દંડ અને વ્યાજમાંથી રાહત: મુદતમાં વધારો થવાથી કલમ 234A હેઠળનું વ્યાજ અને કલમ 271B હેઠળ ઓડિટ રિપોર્ટ મોડો જમા કરાવવા બદલ લાગતા રૂ. 1.5 લાખ સુધીના દંડનું જોખમ ટળશે.

2. ટેક્સ પ્રોફેશનલ્સને સરળતા: છેલ્લી ઘડીના ધસારાને કારણે સી.એ. અને ટેક્સ કન્સલ્ટન્ટ્સ પર આવતું માનસિક અને કામનું દબાણ ઘટશે.

કેન્દ્રીય નાણા મંત્રાલયે આ મુદત વધારા સાથે કરદાતાઓને વિનંતી કરી છે કે તેઓ નવી લંબાવેલી અંતિમ તારીખની રાહ જોયા વગર વહેલી તકે પોતાના રિટર્ન અને ઓડિટ રિપોર્ટ વિલંબ વિના ફાઇલ કરી દેવા જોઈએ.