ટોરેન્ટ ફાર્મા તાજેતરમાં જ હસ્તગત કરેલી કંપની જે.બી.કેમિકલ્સ જેવી દવાની મૂળ ઉત્પાદક કંપની જેવી જ બનાવટી દવાઓ બનાવીને તેને બજારમાં ઘૂસાડતી આંતરરાજ્ય સિન્ડિકેટના ૩ મુખ્ય સૂત્રધારો દર્શિલ ગિરીશભાઈ ઠાકરશીભાઈ સંઘવી (રહે. પાલડી, અમદાવાદ), દેવેન્દ્ર રામનાથ ઘનીરામ યાદવ (રહે. લખનઉ, ઉત્તર પ્રદેશ) અને ઉમંગ અભય પરસોત્તમદાસ રસ્તોગી (રહે. લખનઉ, ઉત્તર પ્રદેશ) – ની પોલીસે વિધિવત ધરપકડ કરી લીધી છે. આ ભેજાબાજોએ હાર્ટ અને બીપીના દર્દીઓ માટે અત્યંત મહત્વની એવી  નિકાર્ડિયા રિટાર્ડ-10 અને 20 એમજીની ટેબ્લેટના નકલી બેચ તૈયાર કરીને ગુજરાતના જુદા જુદા શહેરોના મેડિકલ સ્ટોર્સ સુધી સપ્લાય કરી દીધા હોવાનું સામે આવતા તબીબી આલમ અને આરોગ્ય તંત્રમાં અરેરાટી વ્યાપી ગઈ છે.

પોલીસ પૂછપરછમાં અને પ્રાથમિક તપાસમાં બહાર આવેલા તારણ મુજબ આ કૌભાંડ માત્ર સાદા આર્થિક ગુના પૂરતું મર્યાદિત નથી પરંતુ માનવ જીવ સાથે ચેડાં કરવાનું સુઆયોજિત ષડયંત્ર છે. આરોપી દેવેન્દ્ર યાદવ અને ઉમંગ રસ્તોગી ઊંચી કિંમતનું ડિસ્કાઉન્ટ મેળવવા તેમજ પોતાના કમિશન માટે નકલી દવાઓ ખરીદીને ઉત્તર પ્રદેશથી ગુજરાતમાં સપ્લાય કરતા હતા. જ્યારે અમદાવાદનો દર્શિલ સંઘવી હોલસેલ વેપારી હોવાથી આ દવાઓ મંગાવીને અમદાવાદ સહિત રાજ્યના અન્ય શહેરોમાં સબ-ડિસ્ટ્રીબ્યુટર્સ અને મેડિકલ સ્ટોર્સને વેચતો હતો. આરોપીઓ સારી રીતે જાણતા હતા કે આવી બનાવટી દવાઓથી દર્દીનું મૃત્યુ પણ થઈ શકે છે, છતાં માત્ર અંગત આર્થિક લાભ ખાતર તેમણે અસલી જેવું જ પેકિંગ, લેબલ અને બેચ નંબર (Batch No. ACG25007) નો ઉપયોગ કરી નકલી દવાઓ બજારમાં ઉતારી હતી. તપાસમાં એ પણ સામે આવ્યું છે કે લખનઉના આરોપી દેવેન્દ્ર અને ઉમંગનો ગુનાહિત ઇતિહાસ છે. તેઓ અગાઉ જૂન-૨૦૨૬ માં મહારાષ્ટ્રના પુણે શહેરના વિશ્રામબાગ પોલીસ સ્ટેશનમાં પણ ડુપ્લિકેટ દવાના કેસમાં પકડાઈ ચૂક્યા છે.

આ મામલે ક્રાઈમ બ્રાન્ચના ઉચ્ચ પોલીસ અધિકારીએ જણાવ્યું હતું કે, “અમને ખોરાક અને ઔષધ નિયમન તંત્રના સિનિયર ડ્રગ્સ ઇન્સ્પેક્ટર શિરીષભાઈ હિંમતભાઈની લેખિત ફરિયાદ મળી હતી. જે ગંભીરતાને ધ્યાને લઈ બીએનએસ ૨૦૨૩ની વિવિધ કલમો હેઠળ ગુનો નોંધીને તુરંત જ જયપુર, લખનઉ અને ગુજરાતમાં અલગ-અલગ ટીમો રવાના કરવામાં આવી હતી. હાલ ત્રણ મુખ્ય આરોપીઓની અટકાયત કરી લેવાઈ છે અને આ બનાવટી દવાઓનું ઉત્પાદન મૂળ ક્યાં થતું હતું તે ફેક્ટરી કે માસ્ટરમાઇન્ડ સુધી પહોંચવા માટે ઊંડાણપૂર્વકની તપાસ ચાલુ છે.

આ સમગ્ર કૌભાંડનો ખુલાસો ત્યારે થયો જ્યારે ‘જે.બી. કેમિકલ્સ એન્ડ ફાર્માસ્યુટીકલ્સ લિમિટેડ’ (જીઆઈડીસી અંકલેશ્વર) ને જાણ થઈ કે તેમની પેટન્ટ પ્રોડક્ટ નિકાર્ડિયા રિટાર્ડ 10 એમજી (Batch No. ACG25007, Mfg: JUN.25, Exp: MAY.28, Mfg Lic No. G/394)ની નકલી ગોળીઓ બજારમાં વેચાઈ રહી છે. કંપનીએ ગાંધીનગર ખાતે ખોરાક અને ઔષધ નિયમન તંત્રમાં અને ત્યારબાદ અમદાવાદ શહેર પોલીસ કમિશનરશ્રીને લેખિત ફરિયાદ નોંધાવી હતી. ફરિયાદ મળતા જ ખોરાક અને ઔષધ નિયમન તંત્ર તથા અમદાવાદ ક્રાઈમ બ્રાન્ચે સંયુક્ત તપાસ હાથ ધરી હતી. રાજ્યના વિવિધ વિસ્તારોમાંથી તપાસના તાર મેળવતા સૌથી પહેલા પાલડી સ્થિત ‘પાર્શ્વ મેડિકલ એજન્સી’ ખાતેથી આ નકલી દવાનો સ્ટોક મળી આવ્યો હતો. આ એજન્સીની પૂછપરછ કરતા ખુલાસો થયો કે તેમણે આ સ્ટોક ઉત્તર પ્રદેશના લખનઉ ખાતે આવેલી ‘સેના મેડિકલ’ પાસેથી મેળવ્યો હતો. લખનઉથી આ દવાઓ કમિશનર એજન્ટ ઉમંગ રસ્તોગી અને દેવેન્દ્ર યાદવ મારફતે અમદાવાદના દર્શિલ સંઘવી પાસે પહોંચતી હતી.

અહીંથી આ દવાનું નેટવર્ક ગુજરાતના અન્ય જિલ્લાઓમાં ફેલાયું હતું. તપાસ દરમિયાન પોલીસે નડિયાદના પટેલ બેકરી રોડ પર આવેલ ‘કિશન મેડિકલ સ્ટોર’માંથી ૩૦ સ્ટ્રિપ (પત્તા) જપ્ત કર્યા હતા. ત્યારબાદ તપાસના તાર કચ્છ સુધી લંબાયા હતા, જ્યાં ભુજ સ્થિત પૂજન હોસ્પિટલ પાસેની ‘નવકાર મેડિકલ એજન્સી’ અને કતીરા કોમ્પ્લેક્સમાં આવેલી ‘મહાદેવ મેડિકલ એજન્સી’માંથી પણ આ જ નકલી બેચ નંબર ધરાવતી નિકાર્ડિયા રીટાર્ડ ટેબ્લેટનો જથ્થો ઝડપાયો હતો. કચ્છમાં આ સપ્લાય જયપુરની ‘એ.વી.આર. મેડિકોઝ’ મારફતે આવ્યો હોવાનું ખુલ્યું હતું. આ રીતે લખનઉ અને જયપુર જેવા અન્ય રાજ્યોમાંથી વાયા અમદાવાદ થઈને આ નકલી દવાઓ નડિયાદ, ભુજ અને ગુજરાતના અન્ય નાના-મોટા શહેરો કે ગામડાંઓના મેડિકલ સ્ટોર્સ સુધી ઘૂસાડવામાં આવી હતી. અસલી અને નકલી દવાનું પેકિંગ એટલું આબેહૂબ હતું કે સામાન્ય નાગરિક કે મેડિકલ સ્ટોર સંચાલક પણ તેને પરખી શકે તેમ નહોતા.

પોલીસે ડી.સી.બી. પોલીસ સ્ટેશન ખાતે બી.એન.એસ. ૨૦૨૩ ની કલમ ૨૭૬, ૨૭૭, ૩૧૬(૪), ૩૩૬(૨), ૩૩૬(૩), ૩૩૮, ૩૩૯, ૩૪૦(૨), ૩૪૧(૧), ૧૧૧, ૪૯ અને ૬૧ મુજબ ગુનો નોંધી વધુ તપાસ હાથ ધરી છે. સાથે જ પોલીસે નાગરિકો અને મેડિકલ સ્ટોર્સને અપીલ કરી છે કે જો કોઈ પણ સ્ટોર, એજન્સી અથવા હોસ્પિટલે આ બનાવટી દવાનું વેચાણ કે ખરીદી કરી હોય તો તેમણે ક્રાઈમ બ્રાન્ચનો સંપર્ક કરવો જોઈએ.