યુનોના ફૂડ એન્ડ એગ્રીકલ્ચર ઓર્ગેનાઈઝેશન વિશ્વસ્તરે ખાદ્યસામગ્રીના ફુગાવાની નવી લહેર અંગે ચેતવણી આપી

સંયુક્ત રાષ્ટ્રી સંઘના ફૂડ એન્ડ એગ્રીકલ્ચર ઓર્ગેનાઈઝેશન વિશ્વસ્તરે ખાદ્યસામગ્રીના ફુગાવાની નવી લહેર અંગે ચેતવણી આપી

વિશ્વને ૨૦૨૬ના અંત સુધીમાં ખાદ્ય પદાર્થોની મોંઘવારી (ફૂડ ઇન્ફ્લેશન)ની નવી લહેરનો સામનો કરવો પડી શકે છે

યુનાઈટેડ નેશન્સના ફૂડ એન્ડ એગ્રીકલ્ચર ઓર્ગેનાઈઝેશનના જણાવ્યા અનુસાર વિશ્વને ૨૦૨૬ના અંત સુધીમાં ખાદ્ય પદાર્થોની મોંઘવારી (ફૂડ ઇન્ફ્લેશન)ની નવી લહેરનો સામનો કરવો પડી શકે છે. ફાઓ-FAOના ચીફ ઇકોનોમિસ્ટ મેક્સિમો ટોરેરોએ ચેતવણી આપી છે કે ભૂ-રાજકીય સંઘર્ષો, કૃષિ ઉત્પાદન ખર્ચમાં વધારો અને એલ નીનો હવામાન ક્ષમતાના સંભવિત મજબૂત બનવાના મિશ્રણને કારણે વૈશ્વિક ખાદ્ય પુરવઠા અને ભાવ પર ભારે દબાણ આવી શકે છે.

ફાઓ-FAO ફૂડ પ્રાઇસ ઇન્ડેક્સ, જે અગ્રણી વેપારી ખાદ્ય વસ્તુઓના આંતરરાષ્ટ્રીય ભાવ પર નજર રાખે છે, જુલાઈ ૨૦૨૬માં સરેરાશ ૧૩૧.૧ પોઇન્ટ રહ્યો હતો, જે જૂનની સરખામણીમાં ૦.૬ ટકાનો વધારો દર્શાવે છે અને જાન્યુઆરી ૨૦૨૩ પછીનું સૌથી ઊંચું સ્તર છે. આ વધારો સૂચવે છે કે પ્રમાણમાં સ્થિરતાના સમયગાળા પછી વૈશ્વિક ખાદ્ય બજારો ફરી એકવાર વધુ અસ્થિરતાનો સામનો કરી રહ્યા છે. આમ નવા ઊભા થઈ રહેલા જોખમમાં કેટલાંક પરિબળો ફાળો આપી રહ્યા છે. ફાઓએ મુખ્ય કૃષિ અને ઊર્જા-ઉત્પાદક પ્રદેશોમાં સંઘર્ષની અસરો, વેપારમાં વિક્ષેપ અને ક્રૂડ ઓઇલ, ડીઝલ તથા ખાતરના ઊંચા ભાવો પર પ્રકાશ પાડ્યો છે. બ્લેક સી (કાળો સમુદ્ર) પ્રદેશ વૈશ્વિક અનાજ પુરવઠા માટે ખાસ કરીને મહત્વપૂર્ણ બની રહ્યો છે, જ્યારે ઊર્જા અને ખાતરના વેપારમાં વિક્ષેપ વિશ્વભરના ખેડૂતો માટે ઉત્પાદન ખર્ચ વધારી શકે છે. જુલાઈમાં, બ્લેક સી નિકાસ વિક્ષેપો અને હવામાન સંબંધિત પાક નુકસાનની ચિંતાઓ વચ્ચે વૈશ્વિક ઘઉંના ભાવમાં ૫.૮ ટકાનો વધારો થતાં ફાઓ સિરિયલ (અનાજ) પ્રાઇસ ઇન્ડેક્સમાં ૩.૪ ટકાનો વધારો થયો હતો.

આમ અપેક્ષા મુબજ મજબૂત એલ નીનો વિકસે અને મુખ્ય કૃષિ ક્ષેત્રોમાં વરસાદ તથા તાપમાનની પેટર્ન વિક્ષેપિત કરે, તો પરિસ્થિતિ વધુ પડકારજનક બની શકે છે. ભારે ગરમી, દુષ્કાળ અને અતિશય વરસાદ પાકની ઉપજ ઘટાડી શકે છે અને સાથે જ સિંચાઈ, ઊર્જા તથા અન્ય ઉત્પાદન ખર્ચમાં વધારો કરી શકે છે. ફાઓના અર્થશાસ્ત્રીઓએ ચેતવણી આપી છે કે ઊંચા કોમોડિટી ભાવોની અસર ઉપભોક્તાઓ (ગ્રાહકો) સુધી પહોંચવામાં કેટલાક મહિનાઓ લાગી શકે છે, જેનો અર્થ એ છે કે વર્ષના અંત સુધીમાં ખાદ્ય ફુગાવો વધુ સ્પષ્ટપણે દેખાઈ પણ શકે છે.