હવે પ્રોવિડન્ટ ફંડ સામટું નહિ, પણ ૧, ૩ કે ૬ માસના હપતામાં ઉપાડી શકાશે
હવે પ્રોવિડન્ટ ફંડ સામટું નહિ, પણ ૧, ૩ કે ૬ માસના હપ્તામાં ઉપાડી શકાશે
EPFO ના મોટા નિર્ણયોઃ મિનિમમ બેલેન્સ ૨૫% થી ઘટાડીને ૧૦% કરાયું; રૃ. ૧,૦૦૦ ના લઘુત્તમ પેન્શનમાં વધારો ન થતાં લાખોમાં નિરાશા
અમદાવાદ, ગુરુવાર: કર્મચારી ભવિષ્ય નિધિ સંગઠનએ પ્રોવિડન્ટ ફંડ ઉપાડના નિયમોમાં વ્યાપક અને મહત્ત્વપૂર્ણ સુધારાઓને મંજૂરી આપી દીધી છે. કેન્દ્રીય શ્રમ અને રોજગાર મંત્રી મનસુખ માંડવિયાના અધ્યક્ષસ્થાને નવી દિલ્હી ખાતે મળેલી સેન્ટ્રલ બોર્ડ ઓફ ટ્રસ્ટીઝની ૨૪૦મી બેઠકમાં લેવાયેલા આ નિર્ણયો મુજબ, હવે કર્મચારીઓ પોતાનું પ્રોવિડન્ટ ફંડ એકસામટું ઉપાડવાને બદલે માસિક (૧ માસ), ત્રિમાસિક (૩ માસ) કે છ માસિક (૬ માસ) હપતામાં ઉપાડી શકશે. આ સુવિધા સંપૂર્ણપણે મરજિયાત કર્મચારી ઇચ્છે તો ૧૦૦ ટકા રકમનો પણ ઉપાડ કરી શકશે.
સિસ્ટેમેટિક વિડ્રોઅલ, ૧૦ ટકા બેલેન્સ અને વ્યાજનો લાભ
કર્મચારીઓને તેમના પ્રોવિડન્ટ ફંડના હપતામાં ઉપાડ કરવા ઉપરાંત તેમને મિનિમમ બેલેન્સ પહેલા 25 ટકા રાખવું પડતું હતું તે હવે ઘટડાીને 10 ટકા કરી આપવામાં આવ્યું છે. આમ કર્મચારીઓ તેમના પ્રોવિડન્ટ ફંડમાંથી વધુ નાણાંનો ઉપાડ કરી શકશે.
-
પ્રારંભિક લાભાર્થીઓ: નવી વ્યવસ્થાનો લાભ પ્રારંભિક તબક્કામાં ૫૫ વર્ષથી વધુ વયના અને રૂ. ૫ લાખથી વધુ ભંડોળ ધરાવતા અંદાજે ૬.૩૨ લાખ સભ્યોને મળશે.
-
ખાતામાં રકમ પર વ્યાજ: ૧, ૩ કે ૬ મહિને હપતામાં ઉપાડ કરનારા સભ્યોના ખાતામાં બાકી રહેલી રકમ પર સામાન્ય નિયમ મુજબ નિયમિત વ્યાજ મળતું રહેશે.
-
મિનિમમ બેલેન્સમાં ઘટાડો: સભ્યોને વધુ નાણાકીય તરલતા (લિક્વિડિટી) મળે તે માટે જાળવી રાખવાની લઘુત્તમ સિલક-બેલેન્સ મર્યાદા ૨૫ ટકાથી ઘટાડીને માત્ર ૧૦ ટકા કરવામાં આવી છે.
-
નોમિની કે આશ્રિતો માટે જોગવાઈ: નિવૃત્ત થતા સભ્યો માટેના આ આયોજનમાં હપતાના સમયગાળા દરમિયાન સભ્યનું અવસાન થાય, તો નોમિની અથવા આશ્રિતો બાકીની રકમ એકસાથે ઉપાડી શકશે અથવા નિયમિત હપ્તામાં ઉપાડ ચાલુ રાખી શકશે.
-
પ્રતીક્ષા સમયગાળો ઘટ્યો: પ્રોવિડન્ટ ફંડના અંતિમ ઉપાડ માટેનો પ્રતીક્ષા સમયગાળો ૧૨ મહિનાથી ઘટાડીને માત્ર ૨ મહિના કરી દેવાયો છે.
સર્વિસ સેક્ટર માટે UAN આધારિત ટિપ અને સ્વૈચ્છિક યોગદાન
-
UAN લિન્ક્ડ મિકેનિઝમ: યુનિવર્સલ એકાઉન્ટ નંબર (UAN) આધારિત સ્વૈચ્છિક યોગદાનની વ્યવસ્થાને માન્યતા આપવામાં આવી છે.
-
ગ્રાહક ટિપ સીધી PF ખાતામાં: સર્વિસ સેક્ટરના કર્મચારીઓને થર્ડ પાર્ટી તરફથી મળતી નાની નાની રકમ—જેમ કે ગ્રાહકો તરફથી મળતી ટિપ—સીધી તેમના પ્રોવિડન્ટ ફંડના ખાતામાં જમા થઈ શકશે. આ માટે એમ્પ્લોયી પ્રોવિડન્ટ ફંડ યોજનામાં જરૂરી સુધારા સૂચિત કરાશે અને આવકવેરા કાયદામાં સુધારા માટે નાણા મંત્રાલય સાથે સંકલન સાધવામાં આવી રહ્યું છે.
વીમા યોજના, રોકાણ મર્યાદા અને મુક્તિના કેસોની સમીક્ષા
-
EDLI યોજના ૨૦૨૬ માં સુધારા: કર્મચારી ડિપોઝિટ લિંક્ડ ઇન્સ્યોરન્સ યોજના, ૨૦૨૬માં સુધારા મંજૂર કરાયા છે. જે સંસ્થાઓએ વૈધાનિક EDLI જેટલું કે તેથી વધુ વીમા કવચ જાળવ્યું હોય અને યોગ્ય દાવાઓનું સમાધાન કર્યું હોય, તેમને સમાપ્ત થયેલી મુક્તિ રિન્યૂ કરવા ૬ મહિનાની મુદત તેમજ સંક્રમણકાળના કોન્ટ્રીબ્યુશન, વ્યાજ અને દંડમાંથી શરતી રાહત મળશે.
-
વૈકલ્પિક રોકાણ ભંડોળ: એમ્પ્લોયી પ્રોવિડન્ટ ફંડ ઓર્ગેનાઈઝેશને વર્તમાન રોકાણ મર્યાદામાં રહીને નવા ભંડોળના ૩ ટકા સુધીની રકમ યોગ્ય વૈકલ્પિક રોકાણ ભંડોળમાં રોકવાની સૈદ્ધાંતિક મંજૂરી મળી છે. શરૂઆતમાં સરકાર સમર્થિત સંસ્થાઓના માધ્યમથી આ રોકાણ કરી શકાશે. .
-
મુક્તિ પરત કે રદ કરવાની સમીક્ષા: ૨૭ સંસ્થાઓની એમ્પ્લોયી પ્રોવિડન્ટ ફંડની મુક્તિ પરત ખેંચવાની અને ૪ સંસ્થાઓની મુક્તિ રદ કરવાની દરખાસ્તોની સમીક્ષા કરાઈ, જેનાથી ૧,૪૪,૪૩૭ સભ્યોનું આશરે રૂ. ૫,૯૯૬ કરોડનું ભંડોળ સીધું એમ્પ્લોયી પ્રોવિડન્ટ ફંડ ઓર્ગેનાઈઝેશનના વહીવટ હેઠળ આવશે.
ટેક્નોલોજી ૨.૦ થી ક્લેમ પ્રક્રિયા ઝડપી, પણ પેન્શનમાં વધારો નહિ
-
ઝડપી ક્લેમ સેટલમેન્ટ: એમ્પ્લોયી પ્રોવિડન્ટ ફંડ ઓર્ગેનાઈઝેશનની સેન્ટ્રલાઇઝ્ડ ઇન્ફોર્મેશન ટેક્નોલોજી એનેબલ્ડ સિસ્ટમ ૨.૦ ના કારણે ઓટોમેટિક ક્લેમ પ્રોસેસિંગ ૩૯ ટકાથી વધીને ૭૧ ટકા થયું છે, ક્લેમ રિજેક્શન રેટ ૨૩ ટકાથી ઘટીને ૭.૮૨ ટકા થયો છે અને સરેરાશ ક્લેમ સેટલમેન્ટ સમય ૧૧.૧૫ દિવસથી ઘટીને ૨.૫૭ દિવસ થયો છે.
-
લઘુત્તમ પેન્શનમાં નિરાશા: બેઠકમાં લઘુત્તમ પેન્શન રૂ. ૧,૦૦૦ થી વધારીને રૂ. ૩,૦૦૦, રૂ. ૫,૦૦૦ કે રૂ. ૭,૦૦૦ કરવા અંગે કોઈ નિર્ણય કે નવી જાહેરાત ન થતાં નજીવું પેન્શન મેળવનારા લાખો કર્મચારીઓમાં નિરાશા અને હતાશા પણ જોવા મળી છે.

