મધ્યમ વર્ગના પરિવાર માટે નિવૃત્તિનું સ્માર્ટ આયોજન: હવે પ્રોવિડન્ટ ફંડમાંથી પણ મળશે ‘ડબલ પેન્શન’નો ફાયદો!
મધ્યમ વર્ગના પરિવાર માટે નિવૃત્તિનું સ્માર્ટ આયોજન: હવે EPFમાંથી પણ મળશે ‘ડબલ પેન્શન’નો ફાયદો!
આજના મોંઘવારીના સમયમાં મધ્યમ વર્ગના દરેક નોકરિયાત પરિવારની સૌથી મોટી ચિંતા એ હોય છે કે નિવૃત્તિ પછી ઘરનો ખર્ચ કેવી રીતે ચાલશે? અત્યાર સુધી નિવૃત્તિ સમયે પ્રોવિડન્ટ ફંડની એકસાથે મોટી રકમ હાથમાં આવતી હતી, જે ઘણીવાર સામાજિક પ્રસંગો, મકાન કે અન્ય ખર્ચમાં વપરાઈ જતી હતી અને પાછલી જિંદગીમાં માત્ર નજીવું પેન્શન જ બચતું હતું. પરંતુ હવે કર્મચારી ભવિષ્ય નિધિ સંગઠન (EPFO)ના સેન્ટ્રલ બોર્ડ ઓફ ટ્રસ્ટીઝની ૨૪૦મી બેઠકમાં લેવાયેલા ઐતિહાસિક નિર્ણય મુજબ, નિવૃત્ત થતા કર્મચારીઓ માટે સિસ્ટમેટિક વિડ્રોઅલ પ્લાનની સુવિધાને મંજૂરી આપવામાં આવી છે. આ નવી વ્યવસ્થા મધ્યમ વર્ગના પરિવારો માટે આશીર્વાદરૂપ સાબિત થશે.
શું છે EPFની નવી ‘SWP’ યોજના અને ‘ડબલ પેન્શન’નો ફાયદો?
કેન્દ્રીય શ્રમ અને રોજગાર મંત્રી મનસુખ માંડવિયાની અધ્યક્ષતામાં લેવાયેલા નિર્ણય મુજબ, હવે નિવૃત્તિ સમયે તમારે તમારા પ્રોવિડન્ટ ફંડના બધા પૈસા એકસાથે ઉપાડવાની જરૂર નથી. તમે તમારી જરૂરિયાત મુજબ દર મહિને, દર ત્રણ મહિને કે છ મહિને નિયમિત આવક (પેન્શનની જેમ) મેળવી શકો છો. આનો સૌથી મોટો ફાયદો એ છે કે જો તમે એમ્પ્લોયી પેન્શન સ્કીમના સભ્ય હોવ, તો નિવૃત્તિ પછી તમને બે જગ્યાએથી માસિક આવક મળી શકશે. એક, એમ્પ્લોયી પ્રોવિડન્ટ ફંડમાંથી સિસ્ટેમેટિક વિડ્રોઅલ પ્લાન હેઠળ જમા ફંડનું વ્યાજ ઉપાડીને નિવૃત્તિ વય આસાનીથી વિતાવી શકો છો. બીજું, એમ્પ્લોયી પ્રોવિડન્ટ ફંડ સ્કીમમાંથી મળતું નિશ્ચિત માસિક પેન્શન મેળવી શકો છો.
નાની બચતથી કરોડોનું ફંડ કેવી રીતે બને?
જો કોઈ મધ્યમ વર્ગનો યુવાન ૨૮ વર્ષની ઉંમરે નોકરી શરૂ કરે અને તેનો બેઝિક પગાર વત્તા મોંઘવારી ભથ્થું રૂ.૨૫,૦૦૦ હોય તો ૫૮ વર્ષની નિવૃત્તિ સુધીમાં (૩૦ વર્ષમાં) તે કેવી રીતે મોટું ભંડોળ ઊભું કરી શકે છે. કાયદેસરના નિયમ મુજબ બેઝિક પગારના ૧૨ ટકા ઈપીએફ-એમ્પ્લોયી પ્રોવિડન્ટ ફંડમાં જમા થઈ શકે છે. તદુપરાંત કંપનીના માલિક ઇપીએફમાં ૩.૬૭ ટકા યોગદાન ઈપીએમાં આપવા કાયદેસર બંધાયેલો છે. તેમ જ પગારની રકમમાંથી 8.33 ટકા રકમ એમ્પ્લોયી પેન્શન સ્કીમમાં જમા કરાવવા બંધાયેલો છે. જોકે તેની મહત્તમ માસક મર્યાદા રૂ. 25000ની છે. માસિક રૂ. 2083 પેન્શન સ્કીમમાં જમા કરાવી શકાય છે.
કર્મચારીને વાર્ષિક પાંચ ટકાનો પગાર વધારો મળે છે તેમ માનીને આગળ વધીએ અને તેના નોકરીના સમયગાળામાં ઇપીએફનો વ્યાજદર 8.25 ટકાનો રહ્યો હોવાનો અંદાજ મૂકીને ત્રિરાશી માંડીએ તો ૫૮ વર્ષ નિવૃત્તિની ઉંમરે તમારા ઈપીએફના ખાતામાં અંદાજે રૂ. ૧.૮૧ કરોડનું જંગી ફંડ જમા થશે!
નિવૃત્તિ પછી દર મહિને કેટલી આવક મળશે?
જો તમે રૂ. ૧.૮૧ કરોડનું ફંડ એકસાથે ઉપાડવાને બદલે સિસ્ટેમેટિક વિડ્રોઅલ પ્લાનનો વિકલ્પ પસંદ કરો અને બાકી રહેલા ફંડ પર ૮.૨૫ ટકા વ્યાજ મળતું રહે તો તમને એમ્પ્લોયી પેન્શન સ્કીમ હેઠળ માસિક આવક થઈ શકે છે.
| નિવૃત્તિ સમયનું EPF ફંડ | ઉપાડનો સમયગાળો (વર્ષ) | EPF SWP માસિક આવક | EPS માસિક પેન્શન | કુલ માસિક આવક (EPF + EPS) |
| ₹૧.૮૧ કરોડ | ૧૫ વર્ષ માટે | રૂ.૧,૬૫,૧૩૫ | રૂ.૧૧,૪૨૯ | રૂ.૧,૭૬,૫૬૪ |
| ₹૧.૮૧ કરોડ | ૨૦ વર્ષ માટે | રૂ.૧,૪૪,૪૭૪ | રૂ.૧૧,૪૨૯ | રૂ.૧,૫૫,૯૦૩ |
| ₹૧.૮૧ કરોડ | ૨૫ વર્ષ માટે | રૂ.૧,૩૩,૧૬૪ | રૂ.૧૧,૪૨૯ | રૂ.૧,૪૪,૫૯૩ |
| ₹૧.૮૧ કરોડ | ૩૦ વર્ષ માટે | રૂ.૧,૨૬,૬૭૯ | રૂ.૧૧,૪૨૯ | રૂ.૧,૩૮,૧૦૮ |
(નોંધ: EPS પેન્શનની ગણતરી (₹૨૫,૦૦૦ × ૩૨ વર્ષ) / ૭૦ = ₹૧૧,૪૨૯ મુજબ કરવામાં આવી છે, કારણ કે ૨૦ વર્ષથી વધુ નોકરી હોય તો પેન્શન ગણતરીમાં ૨ વર્ષ બોનસ પણ ઉમેરાય જ છે.)
જો વચ્ચેથી પૈસા ઉપાડ્યા હોય અને ફંડ ઓછું બચ્યું હોય તો શું?
મધ્યમ વર્ગના પરિવારમાં ઘર લેવા, બાળકોના ભણતર કે લગ્ન માટે ઘણીવાર પ્રોવિડન્ટ ફંડમાંથી અધવચ્ચે પૈસા ઉપાડવા પડે છે. જો નિવૃત્તિ સમયે તમારી પાસે ₹૧.૮૧ કરોડને બદલે ઓછું ફંડ બચ્યું હોય, તો પણ ૨૦ વર્ષ સુધી તમને દર મહિને સારી એવી આવક મળી શકે છે:
| નિવૃત્તિ સમયે બચેલું EPF ફંડ | EPF SWP માસિક આવક (૨૦ વર્ષ માટે) | EPS માસિક પેન્શન | કુલ માસિક આવક (EPF + EPS) |
| રૂ.૧ કરોડ | રૂ.૭૯,૮૩૩ | રૂ.૧૧,૪૨૯ | રૂ.૯૧,૨૬૨ |
| રૂ.૫૦ લાખ | રૂ.૩૯,૯૧૭ | રૂ.૧૧,૪૨૯ | રૂ.૫૧,૩૪૬ |
| રૂ.૨૫ લાખ | રૂ.૧૯,૯૫૮ | રૂ.૧૧,૪૨૯ | રૂ.૩૧,૩૮૭ |
એટલે કે, જો તમારી પાસે નિવૃત્તિ સમયે માત્ર રૂ.૫૦ લાખનું EPF ફંડ પણ બચ્યું હશે, તો પણ EPS પેન્શન સાથે મળીને તમને દર મહિને રૂ.૫૧,૩૪૬ ની નિયમિત આવક મળશે, જે મધ્યમ વર્ગના પરિવારનું ગુજરાન આરામથી ચલાવવા માટે પૂરતી છે.
મધ્યમ વર્ગના પરિવારે બચતનું આયોજન કઈ રીતે કરવું જોઈએ?
PFના પૈસાને અડશો નહીં: નાની-મોટી જરૂરિયાતો માટે પ્રોવિડન્ટ ફંડમાંથી એડવાન્સ ઉપાડવાનું ટાળો. પ્રોવિડન્ટ ફંડ પર ૮.૨૫ ટકા જેવું ઊંચું અને ટેક્સ-ફ્રી ચક્રવૃદ્ધિ વ્યાજ મળે છે. બેન્કમાં સિનિયર સિટિઝનને પણ 7.50થી 7.75 ટકા વ્યાજ મળે છે. બેન્ક એફડી પર થતી વ્યાજની આવક ટેક્સેબલ બને છે. આ સંજોગોમાં જો તમે રૂ.૫૦ લાખ પણ બચાવી રાખશો, તો તે નિવૃત્તિ પછી રૂ.૫૦,૦૦૦ વત્તા માસિક પેન્શન મળતું રહેશે.
ઈમરજન્સી ફંડ અલગ રાખો: મેડિકલ ઈમરજન્સી કે અચાનક નોકરી છૂટવાના સંજોગો માટે ૬ મહિનાના ઘરખર્ચ જેટલી રકમ અલગ બેંક ખાતા કે લિક્વિડ ફંડમાં રાખો, જેથી લાંબા ગાળાની બચત ન તૂટે. જોકે હવે એમ્પ્લોયી પ્રોવિડન્ટ ફંડ ઓર્ગેનાઈઝેશને પણ નોકરી છૂટવાના કિસ્સામાં વેઇટિંગ પીરિયડ ઘટાડીને બે મહિના કર્યો છે, છતાં અલગ ફંડ રાખવું હિતાવહ છે.
નાની ઉંમરથી શરૂઆત કરો: ૨૫ થી ૩૦ વર્ષની ઉંમર વચ્ચે બચત શરૂ કરવાથી ‘કમ્પાઉન્ડિંગ’ (વ્યાજનું વ્યાજ)નો સૌથી વધુ ફાયદો મળે છે. ૫-૧૦ વર્ષ મોડા પડવાથી ફંડ અડધું થઈ શકે છે. બીજું, દર વર્ષે પગારમાં ૫% થી ૧૦% નો વધારો થાય ત્યારે ખર્ચ વધારવાને બદલે વોલ્યુન્ટરી પ્રોવિડન્ટ ફંડ કે પછી અથવા મ્યુચ્યુઅલ ફંડના માધ્યમથી સિસ્ટેમેટિક ઇન્વેસ્ટમેન્ટ પ્લાનમાં બચતનો હિસ્સો વધારવો જોઈએ.
આરોગ્ય અને ટર્મ વીમો અવશ્ય લો: મધ્યમ વર્ગની વર્ષોની બચત એક મોટી બીમારીમાં ધોવાઈ જતી હોય છે. તેથી પરિવાર માટે પૂરતો હેલ્થ ઈન્સ્યોરન્સ અને કમાનાર વ્યક્તિ માટે ટર્મ ઈન્સ્યોરન્સ લેવો અનિવાર્ય છે.
(નોંધ: ઉપરોક્ત ગણતરીઓ વર્તમાન ૮.૨૫% વ્યાજ દર અને રૂ.૨૫,૦૦૦ની વેજ સીલિંગના અંદાજ પર આધારિત છે. ભવિષ્યમાં સરકારના નિયમો અને વ્યાજ દર મુજબ તેમાં ફેરફાર થઈ શકે છે.)

