અમૂલે દૂધના લિટરદીઠ ભાવમાં રૂ. ૨નો વધારો કર્યો

ગુજરાત કોઓપરેટીવ મિલ્ક માર્કેટિંગ ફેડરેશનના નેજા હેઠળ સક્રિય અમૂલે તેના દૂધની દરેક વરાયટીઓના લિટરદીઠ ભાવમાં રૃા. ૧થી ૪નો વધારો કરવાની જાહેરાત કરી છે. ટી સ્પેશિયલના એક લિટરની થેલીના ભાવમાં રૃા. ૩નો વધારો કરવામાં આવ્યો છે. તેમ જ ભેંસના દૂધની ૫૦૦ મિલીલિટરની થેલીના ભાવમાં રૃા. ૨નો વધારો કર્યો છે. આમ ભેંસના દૂધના એક લિટરના ભાવમાં રૃા. ૪નો વધારો થયો છે. ભેંસના દૂધનો લિટરદીઠ ભાવ વધીને રૃા. ૭૮ થશે.આ ભાવ વધારો ૧૪મી મે ૨૦૨૬થી લાગુ પડી જશે.

ટી સ્પેશિયલના ભાવમાં લિટરે સૌથી વધુ રૃા. ૩નો વધારો કરવામાં આવ્યોઃ ભેંસના દૂધના ભાવમાં રૃા. ૪નો વધારો

અમૂલના મેનેજિંગ ડિરેક્ટર જયન મહેતાનું કહેવું છે કે મહત્તમ વેચાણ કિંમતમાં ટકાવારીની દ્રષ્ટિએ અઢીથી માંડીને સાડા ત્રણ ટકાનો જ વધારો થયો છે. ખાદ્યસામગ્રીના ફુગાવાના દર કરતાં ગુજરાતના ફુગાવાના દર વધારે મોટા છે. પહેલી મે ૨૦૨૫ના દૂધના ભાવમાં વધારો કર્યા પછી પહેલીવાર ૧૪મી મે ૨૦૨૬માં દૂધના ભાવમાં વધારો કરવામાં આવ્યો છે. દૂધના ઉત્પાદન ખર્ચમાં વધારો થતાં દૂધના ભાવમાં વધારો કરવામાં આવ્યો છે. જોકે અમૂલ બટર, ચીઝ, ઘી કે આઈસક્રીમના ભાવમાં નજીકના ભવિષ્યમાં વધારો કરવાનું આયોજન ન હોવાનો સંકેત તેમણે આપ્યો છે.

તેમણે જણાવ્યું હતું કે પશુઆહારના, દૂધના પેકેજિંગ માટેની ફિલ્મના અને બળતણના ભાવમાં નોંધપાત્ર વધારો થયો હોવાથી તેમને ભાવ વધારો કરવાની ફરજ પડી છે. છેલ્લા એક વર્ષમાં ગુજરાતના તમામ દૂધ સંઘોએ ફેટની કિંમતમાં ૩.૭ ટકાનો વધારો કરી આપીને કિલોદીઠ ફેટનો ભાવ રૃા.૩૦નો કરી આપવામાં આવ્યો છે.

અમૂલ દ્વારા ગ્રાહકો પાસેથી વસૂલવામાં આવતા નાણાંમાંથી ૮૦ ટકા નાણાં પશુપાલકોને પરત કરવામાં આવે છે. દૂધના ભાવમાં કરવામાં આવેલા વધારાનો મોટો હિસ્સો પશુપાલકોને ફાળે જ જશે. તેમને ભાવમાં વધારો મળતાં દૂધનું ઉત્પાદન વધારવા માટ ેવધારાનું ધ્યાન આપશે.

દૂધના ભાવમાં કરવામાં આવેેલો વધારો ગૃહિણોનો ઘરખર્ચ વધારનાર સાબિત થશે. જોકે તેને કારણે અમૂલની આવકમાં વધારો થશે. ગુજરાત કોઓપરેટીવ મિલ્ક માર્કેટિંગ ફેડરેશનની આવક ૨૦૨૪-૨૫માં ૧૧.૪ ટકા વધીને રૃા. ૭૩,૪૫૦ કરોડની થઈ હતી. બીજીતરફ ૨૦૨૫-૨૬ના નાણાંકીય વર્ષમાં અમૂલનું ટર્નઓવર વધીને રૃા. ૧ લાખ કરોડનો વળોટી ગયું હતું. ડેરી પ્રોડક્ટ્સની ડિમાન્ડ વધી જતાં ગુજરાત કોઓપરેટીવ મિલ્ક માર્કેટિંગ ફેડરેશનની આવકમાં વધારો થયો હતો.

ગુજરાત કોઓપરેટીવ મિલ્ક માર્કેટિંગ ફેડરેશન વિશ્વનું સૌથી મોટી ડેરી સહકારી સંસ્થા છે. તેની સાથે અંદાજે ૩૬ લાખ પશુપાલકો અને ખેડૂતો જોડાયેલા છે. અમૂલ દૂધ અને દૂધની બનાવટો વિશ્વના ૫૦થી વધુ દેશોમાંગ અમૂલ દૂધ અને દૂધની બનાવટોનું વેચાણ કરે છે. અમૂલ રોજની ૩.૧૦ કરોડ લિટર દૂધ એકત્રિત કરે છે. અમૂલના ૨૪ અબજ પેકિંગ્સનું એક વર્ષમાં વિતરણ અને વેચાણ કરે છે. તેમાં અમૂલ બટર, દૂધ, ચીઝ, આઈસક્રીમનો સમાવેશ થાય છે. દૂધના નવા ભાવ નીચે મુજબ છે.

અમૂલ તાજાંના 500 મિલીલિટરની થેલીના ભાવ રૂ. 28થી વધારીને રૂ. 29 કરવામાં આવ્યા છે.

અમૂલ તાજાંની એક લિટરની થેલીના ભાવ રૂ. 55થી વધારીને રૂ. 57 કરવામાં આવ્યા છે.

અમૂલ ગાયના દૂધની 500 મિલીલિટરની થેલીના ભાવ રૂ. 29થી વધારીને રૂ. 30 કરવામાં આવ્યા છે.

અમૂલ શક્તિની 500 મિલીલિટરની થેલીના ભાવ રૂ. 31થી વધારીને રૂ. 32 કરવામાં આવ્યા છે.

અમૂલ ટી સ્પેશિયલની એક લિટરની થેલીના ભાવ રૂ. 63થી વધારીને રૂ. 66 કરવામાં આવ્યા છે.

અમૂલ ગોલ્ડની 500 મિલીલિટરની થેલીના ભાવ રૂ. 34થી વધારીને રૂ. 35 કરવામાં આવ્યા છે.

ભેંસના દૂધની 500 મિલીલિટરની થેલીના ભાવ રૂ. 37થી વધારીને રૂ. 39 કરવામાં આવ્યા છે.