ધીરજ છે તો ધન કમાવાની સંભાવના છેઃ સિપ્લા લાંબી રેસનો મજબૂત ઘોડો
સિપ્લાએ તૈયાર કરેલી ભવિષ્ય માટેની મજબૂત યોજના તેને 2026-27માં પડકારોમાંથી ધીમે ધીમે બહાર આવવામાં મદદરૂપ બની શકે છે
નાણાંકીય વર્ષ 2025-26 દરમિયાન અમેરિકન બજારમાં ભારતની ફાર્માસ્યૂટિકલ્સના ક્ષેત્રની કંપની સિપ્લાના બે મુખ્ય ઉત્પાદનોના વેચાણમાં ઘટાડા થઈ જતાં મોટો ફટકો પડ્યો છે. આ નુકસાનની ભરપાઈ કરવા માટે નવા ઉત્પાદનો લોન્ચ કરવામાં તો આવ્યા પરંતુ તેને અપેક્ષા મુજબ સફળતા મળી રહી નથી. સિપ્લાના શેરમાં આમ તો માર્ચ 2025માં રોકાણકારોને ધીમે ધીમે રોકાણ વધારવાની ભલામણ કરવામાં આવી હતી. ત્યારથી અત્યાર સુધી શેરના ભાવમાં આશરે આઠ ટકાનો ઘટાડો નોંધાયો છે.
જોકે 2026-27 માટે કંપનીની લોન્ચ પાઇપલાઇન મજબૂત દેખાઈ રહી છે. કેટલાક ઉત્પાદનોને પહેલેથી મંજૂરી મળી ગઈ છે. સિપ્લાના મેનેજમેન્ટે 2026-27 અને 2027-28 દરમિયાન વધુ નવા લોન્ચ કરવાની યોજના તૈયાર કરી લીધી છે. તેથી જ ત્રણથી પાંચ વર્ષના લાંબા ગાળાના દૃષ્ટિકોણ ધરાવતા રોકાણકારો માટે આ શેરમાં રોકાણ વધારવાની ભલામણ યથાવત રાખવામાં આવી છે, કારણ કે અમેરિકન બજારમાં નવી પ્રોડક્ટ પાઇપલાઇન મજબૂત છે અને ભારતીય બજારમાં પણ વિકાસની સારી તકો ઉપલબ્ધ છે. શેરબજારમાં હાલમાં કંપનીનો શેર આગામી એક વર્ષના અંદાજિત નફાના લગભગ 25 ગણા ભાવ પર ટ્રેડ થઈ રહ્યો છે. આ ભાવ તેના છેલ્લા પાંચ વર્ષના સરેરાશ 24 ગણાની આસપાસ છે.
નાણાંકીય વર્ષ 2024થી 2025-26 દરમિયાન નફામાં ઘટાડો જોવા મળ્યો હતો, પરંતુ 2025-26થી 2027-28 દરમિયાન અંદાજે 16 ટકા સંયુક્ત વાર્ષિક વૃદ્ધિ થવાની અપેક્ષા હોવાથી હાલનું મૂલ્યાંકન આકર્ષક ગણાય છે.
ભારત અને અન્ય બજારોમાં મજબૂત વૃદ્ધિ
ભારત, આફ્રિકા અને યુરોપ તથા ઉભરતા દેશોના બજારો કંપનીની આવકમાં મહત્વનો ફાળો આપે છે અને આ વિસ્તારોમાં સારો વિકાસ જોવા મળ્યો છે. ભારતમાં કંપનીની કામગીરી મુખ્યત્વે બ્રાન્ડેડ જેનરિક દવાઓ, ટ્રેડ જેનરિક (જન ઔષધિ) અને ગ્રાહક આરોગ્ય વિભાગ પર આધારિત છે. 2025-26 દરમિયાન ત્રણેય વિભાગોએ સારી વૃદ્ધિ નોંધાવી છે અને આગામી વર્ષોમાં પણ વધારાની આ ગતિ ચાલુ રહેવાની અપેક્ષા છે.
2026-27માં વજન ઘટાડવા અને ડાયાબિટીસ માટેની Tirzepatide દવા “Yurpeak” નામથી લોન્ચ કરવામાં આવશે. આ દવા Eli Lilly પાસેથી ખરીદીને સિપ્લા ભારતના બજારમાં તેનું વેચાણ કરશે. કંપનીએ ડાયાબિટીસ માટે Empagliflozin અને ઇન્હેલ્ડ ઇન્સ્યુલિન Afrezza પણ લોન્ચ કરી છે. ઉપરાંત Pfizer પાસેથી ત્રણ બ્રાન્ડ્સ હસ્તગત પણ કરી છે. શ્વસન તંત્રની બીમારીને લગતી દવાઓમાં મજબૂત સ્થાન, કાર્ડિયોલોજી અને ડાયાબિટીસ ક્ષેત્રમાં વૃદ્ધિ તથા ઇન-લાઇસન્સ પોર્ટફોલિયો કંપનીને ભારતમાં સતત ડબલ ડિજિટ વૃદ્ધિ અપાવી શકે છે. ભારત અને અમેરિકામાં વિકસાવેલી દવાઓ આફ્રિકા અને યુરોપના બજારોમાં પણ વૃદ્ધિને વેગ આપશે.
અમેરિકન બજારમાં નવી પ્રોડક્ટ પાઇપલાઇન
2025-26 દરમિયાન અમેરિકામાં સિપ્લાની આવક 16 ટકા ઘટીને 7.80 કરોડ અમેરિકી ડોલરની રહી છે. Generic Revlimidના વેચાણમાં ઘટાડો અપેક્ષિત હતો કારણ કે વોલ્યુમ મર્યાદા કરાર પૂર્ણ થયા બાદ સંપૂર્ણ જેનરિક સ્પર્ધા શરૂ થઈ હતી. ઉપરાંત Generic Lanreotideનું વેચાણ પણ બંધ થયું કારણ કે ઉત્પાદન ભાગીદાર Pharmathen પર FDAની તપાસ બાદ ઉત્પાદન અટકી ગયું હતું. કંપની બે નવા સપ્લાયરો સાથે કામ કરી રહી છે અને 2027-28ની શરૂઆત સુધી વેચાણમાં સુધારો થવાની અપેક્ષા છે. કંપનીએ 2027-28ના અંત સુધી અમેરિકામાં વાર્ષિક 1 અબજ ડોલરના વેચાણની ગતિ હાંસલ કરવાનો લક્ષ્યાંક રાખ્યો છે.
2026-27 દરમિયાન ચાર નવી શ્વસન સંબંધિત જેનરિક દવાઓ લોન્ચ કરવાની યોજના છે. તેમાંથી gVentolinને મંજૂરી મળી ગઈ છે અને ટૂંક સમયમાં લોન્ચ થવાની સંભાવના છે. ઉપરાંત gAdvair, gSymbicort અને અન્ય બે નવી દવાઓ પણ લોન્ચ થઈ શકે છે. આ દવાઓનો બજાર વિશાળ છે અને સ્પર્ધા મર્યાદિત હોવાથી દરેક પ્રોડક્ટ પ્રથમ વર્ષમાં 7.5 કરોડથી 10 કરોડ ડૉલરની આવક આપી શકે તેવી શક્યતા છે. કંપની આગામી સમયમાં પેપ્ટાઇડ અને કોમ્પ્લેક્સ જેનરિક્સની પણ શ્રેણી લોન્ચ કરવાની યોજના ધરાવે છે.
નાણાકીય સ્થિતિ અને મૂલ્યાંકન
2025-26 દરમિયાન કંપનીની કુલ આવક 2.2 ટકા ઘટીને રૂ. 28,163 કરોડ રહી હતી. EBITDA માર્જિન 500 બેસિસ પોઇન્ટ-પાંચ ટકા ઘટીને 20.9 ટકા રહ્યો છે. તેથી EBITDAમાં લગભગ 17 ટકાનો ઘટાડો થયો છે. 2026-27 દરમિયાન EBITDA માર્જિન 18.5થી 20 ટકા વચ્ચે રહેવાની શક્યતા છે, કારણ કે સંશોધન અને વિકાસ (R&D) ખર્ચમાં વધારો થયો છે. R&D ખર્ચ વેચાણના 7 ટકા સુધી પહોંચી ગયો છે. આગામી વર્ષમાં પણ આર એન્ડ ડીનો ખર્ચ આ સ્તરે રહેવાની શક્યતા છે.
બાયોસિમિલર, ઓલિગોન્યુક્લિઓટાઇડ્સ, પેપ્ટાઇડ્સ અને શ્વસન દવાઓના વિકાસ માટે વધુ ખર્ચ થવાનો હોવાથી વિકાસ ખર્ચ ઊંચો રહેશે. કર્મચારી ખર્ચ અને અન્ય વહીવટી ખર્ચમાં પણ વધારો થયો છે. કંપની અમેરિકામાં શ્વસન દવાઓનું ઉત્પાદન પ્લાન્ટ ચલાવે છે અને FDA સંબંધિત સુધારણા ખર્ચ પણ ઉઠાવી રહી છે. 2026-27 પછી નવા લોન્ચથી આવક વધશે અને ખર્ચ નિયંત્રણ દ્વારા માર્જિન સુધારવાની કંપની પાસે પૂરતી તક છે. Lanreotideમાંથી મળનારી આવક 2027-28માં ફરી શરૂ થઈ શકે છે, જે નફાકારકતામાં વધુ સુધારો લાવી શકે છે. બજારના અંદાજ મુજબ 2026-27માં કંપનીની આવક, EBITDA અને નફામાં આશરે 10થી 11 ટકા વૃદ્ધિ થવાની સંભાવના છે.
મજબૂત બેલેન્સ શીટ
માર્ચ 2026 સુધી કંપની પર લગભગ કોઈ દેવું નથી અને તેની પાસે રૂ. 10,526 કરોડની નેટ રોકડ ઉપલબ્ધ છે, જે કંપનીના કુલ માર્કેટ કેપિટલાઇઝેશનના આશરે 9 ટકા જેટલી છે. કંપનીનું નવું મેનેજમેન્ટ રોકડનો ઉપયોગ સાવચેતીપૂર્વક કરે તેવી શક્યતા છે, પરંતુ કંપની પાસે ભવિષ્યમાં નવી દવાઓ કે બ્રાન્ડ હસ્તગત કરીને વૃદ્ધિ કરવાની પૂરતી નાણાકીય ક્ષમતા છે. આમ સિપ્લાના શેરનું વર્તમાન બજાર મૂલ્ય વાજબી સ્તરે છે. 2026-27 નવા લોન્ચ માટે અત્યંત મહત્વનું વર્ષ રહેશે. માર્જિનમાં સુધારો ધીમે ધીમે થશે, પરંતુ તેના માટે કંપની પાસે અનેક સકારાત્મક પરિબળો ઉપલબ્ધ છે.
