ડુપ્લિકેટ દવા નિકાર્ડિયા રિટાર્ડના સેમ્પલ્સનું પેથલેબમાં હજીય પરીક્ષણ પૂરું થયું નથી
ડુપ્લિકેટ દવા નિકાર્ડિયા રિટાર્ડના સેમ્પલ્સનું પેથલેબમાં હજીય પરીક્ષણ પૂરું થયું નથી
માર્કેટમાંથી દવા ખતમ થઈ ગયા પછી ટેસ્ટિંગનો રિપોર્ટ આવે તેવી સંભાવના
ફૂડ એન્ડ ડ્રગ કચેરીને વડોદરાની પેથલેબમાં લગભગ બંધ હાલતમાં
દવાના સેમ્પલ્સના પરીક્ષણ માટે જોઈતા કેમિકલ્સ જ ન હોવાથી કામકાજ ટલ્લે ચઢ્યું હોવાની અધિકારીઓની કબૂલાત
અમદાવાદઃ હૃદય રોગ અને બ્લડ પ્રેશરના દરદીઓ દ્વારા લેવામાં આવતી નિકાર્ડિયા રિટાર્ડના ૧૦૦થી વધુ સેમ્પલ્સ વડોદરાની ફૂડ એન્ડ ડ્રગ કમિશનરની પેથલેબમાં મોકલી અપ્યાને આજે વીસથી પચ્ચીસ દિવસ થવા આવ્યા હોવા છતાંય પરીક્ષણ કરવા માટે જોઈતા કેમિકલ્સના અભાવે તેના પરીક્ષણના કામકાજ ટલ્લે ચઢી રહ્યા છે. નવાઈની વાત તો એ છે કે ડુપ્લિકેટ બેચ નંબરથી કે હલકી ગુણવત્તાની દવાઓ પકડવા માટે દરોડા પાડતા ફૂડ એન્ડ ડ્રગ કમિશનરની કચેરીના ઇન્ટેલિજન્સ બ્યુરોના વડા અને પરીક્ષણ વિભાગના જોઈન્ટ કમિશનરનો હોદ્દો એક જ અધિકારીના હાથમાં હોવાથી સેમ્પલ્સની ચકાસણીમાં વિલંબ થઈ રહ્યો હોવાનો આક્ષેપ કરવામાં આવી રહ્યો છે. આમ હિતોનો ટકરાવ થતો હોવાથી બે વિરોધાભાસી કામગીરી માટેની જવાબદારી એક જ અધિકારીને ન સોંપવાના નિયમની પણ ઐસીતૈસી કરી દેવામાં આવી છે.છેલ્લા એક જ મહિનામાં વડોદરાની લેબોરેટરીમાં ૧૦૦૦ જેટલા સેમ્પલ્સ પરીક્ષણ માટે મોકલવામાં આવ્યા હોવાનો અંદાજ છે.
ડુપ્લિકેટ કે નબળી ગુણવત્તાની દવાઓ બજારમાં વેચાઈ ન જાય ત્યાં સુધી તેના પરિણામોની જાહેરાત કરવામાં આવતી જ ન હોવાના આક્ષેપો પણ થઈ રહ્યા છે.નિકાર્ડિયા રિટાર્ડ ઉપરાંત પણ અન્ય દવાઓના સૅકડો સેમ્પલ્સ આવ્યા પછી ટેસ્ટિંગ વિના જ પડી રહ્યા છે. ગત મહિને ગુજરાતના ૩૩ જિલ્લાઓમાં દરોડા પાડીને સેમ્પલ્સ એકત્રિત કરવામાં આવ્યા હતા.જાણકાર સૂત્રોનું કહેવું છે કે ગુજરાતના ફૂડ એન્ડ ડ્રગ એડમિનિસ્ટ્રેશન, ગુજરાત મેડિકલ સર્વિસીસ કોર્પોરેશન લિમિટેડની ઇરાદા પૂર્વકની બેદરકારી તથા દવા ઉદ્યોગના માફિયાઓ સાથેની મિલીભગતને કારણે રાજ્યની ડ્રગ ટેસ્ટિંગની-પરીક્ષણની સમગ્ર સિસ્ટમ ભાંગી પડી છે.
વપરાયા વિના પડી રહેલી કરોડોની મશીનરી
વડોદરાની લેબોરેટરીમાં રુ. ૪૫ લાખના ખર્ચે લેવામાં આવેલું ઇન્ક્યુબેટિંગ રીડર પણ ૨૦૧૯થી અત્યાર સુધીમાં વપરાતું ન હોવાનું જાણવા મળી રહ્યું છે. આ જ રીતે કોરોના કાળમાં રેમડેસિવીરના પરીક્ષણ માટે ખરીદવામાં આવેલા સ્કેનરનો પણ છેલા થોડા વરસોથી કરવામાં આવતો નથી. આ સ્કેનરમાં ગ્લુકોઝના અને સોડિયમ ક્લોરાઈઢના બાટલાઓનું પરીક્ષણ સરળતાથી થઈ જતું હોવા છતાંય તેનો ઉપયોગ કરવામાં આવતો નથી. દવાના સેમ્પલ્સના પેથોજન ટેસ્ટ માટે વપરાતી ઓટોમેટેડ માઈક્રોબાયોલોજિકલ ટેસ્ટિંગ સિસ્ટમનો પણ ઉપયોગ કરવામાં આવતો નથી. વડોદરાની ડ્રગ ટેસ્ટિંગ લેબોરેટરી છેલ્લા છ મહિનાથી લગભગ બંધ હાલતમાં જ છે. વડોદરામાં આપવામાં આવેલી ડ્રગ ટેસ્ટિંગ વાનના સાધનો પણ બે ત્રણ વર્ષથી વણવપરાયેલા પડયા રહ્યા છે. આ વાન અને સાધનો આપવા માટે અંદાજે રુ. ૩ કરોડનો ખર્ચ કરવામાં આવ્યો હોવાનું જાણવા મળી રહ્યું છે. વડોદરાની લેબોરેટરીમાં સમયસર પરીક્ષણ થાય અને લોકો હલકી ગુણવત્તાની દવાઓ ઉપયોગ ન કરે તે માટે પરીક્ષણ માટેના કેમિકલ્સ ઝડપથી ખરીદવાની માગણી કરવામાં આવી રહી છે. વડોદરાની લેબોરેટરીમાં સ્ટોર ડિપાર્ટમેન્ટના અધિકારીની નિમણૂક પણ છેલ્લા દસ બાર વરસથી કરવામાં આવી ન હોવાથી જરૃરી કેમિકલ્સની ખરીદી સ્થાપિત હિત ધરાવતા અધિકારીઓના હાથમાં પહોંચી ગઈ છે. તેનો દુરુપયોગા કરવામાં આવી રહ્યો છે.
સરકારી હોસ્પિટલ્સ માટે દવા ખરીદતા જીએમએસસીએલના સેમ્પલ્સનું ટેસ્ટિંગ પણ ટલ્લે ચઢી ગયું
ગુજરાત ફૂડ એન્ડ ડ્રગ એડમિનિસ્ટ્રેશનની રુ. ૧૫૦ કરોડના ખર્ચે ઊભી કરવામાં આવેલી સિદ્ધપુરના દેથલી પાસેથી લેબોરેટરીમાં પણ પરીક્ષણ ન થતાં હોવાથી તે ગુજરાત મેડિકલ સર્વિસિસ કોર્પોરેશનને આપી દેવામાં આવી છે. આ લેબોરેટરીમાં પણ કેમિકલ્સની ખરીદી જીએમએસસીએલના અધિકારીઓ ન કરતાં હોવાથી પરીક્ષણ થતાં નથી. ગુજરાત મેડિકલ સર્વિસિસ કોર્પોરેશન લિમિટેડ તરફથી ગુજરાત સરકારની હોસ્પિટલ્સ માટે ખરીદવામાં આવતી દરેક દવાઓના સેમ્પલ્સના પરિક્ષણ કરવાના હોય છે. તેને માટે જોઈતા કેમિકલ્સ-રિએક્ટન્ટ્સ ખરીદવામાં જ ન આવતા હોવાથી પરીક્ષણની કામગીરી લગભગ ઠપ થઈ ગઈ છે. અંદાજે અઢાર મહિનાથી આ કેમિકલ્સની અછત છે. આ લેબોરેટરી બનાવવા માટે રૃા. ૧૫૦ કરોડનો ખર્ચ કરવામાં આવ્યો હોવા છતાંય વરસોથી તેમાં કોઈ જ પરીક્ષણ થતાં નથી. કરોડોના ખર્ચ બનાવવામાં આવેલી અને જીએમએસસીએલને આપી દેવામાં આવેલી લેબેોરેટરીમાં પણ સાધનો ધૂળ ખાઈ રહ્યા છે. ફૂડ એન્ડ ડ્રગ કમિશનર અને જીએમએસસીએલના ભ્રષ્ટ અધિકારીઓની મિલીભગતમાં આ કૌભાંડ ચાલી રહ્યું હોવાના આક્ષેપો કરવામાં આવી રહ્યા છે.
