ગોદરેજ એગ્રોવેટનો શેર લાંબા ગાળે લાભદાયી સાબિત થઈ શકે
ગોદરેજ ઇન્ડસ્ટ્રીઝ જૂથની આ કંપનીનું મૂલ્યાંકન વાજબી સ્તરે, લાંબા ગાળાના રોકાણકારો માટે આકર્ષક તક
માર્ચ 2024માં ગોદરેજ એગ્રોવેટ અંગે આપવામાં આવેલી અગાઉની ભલામણ વખતે કંપનીનો શેરનો ભાવ આશરે રૂ. 485 હતો. હાલમાં શેરનો ભાવ લગભગ રૂ. 570 આસપાસ છે, એટલે કે શેરે લગભગ 17.6 ટકાનો ભાવવધારો આપ્યો છે. ઉપરાંત કંપનીએ લગભગ 2 ટકાનું વાર્ષિક ડિવિડન્ડ પણ આપ્યું છે. આ સમયગાળા દરમિયાન કંપનીએ વ્યાપક શેરબજાર કરતાં વધુ સારું પ્રદર્શન કર્યું છે.
જો કે શેરની સફર સતત ઉપર રહી નથી. જુલાઈ 2024માં શેરે રૂ. 877.85ની સર્વોચ્ચ સપાટી હાંસલ કરી હતી. ત્યારબાદ તેમાં કરેક્શન આવ્યું હતું. તેનો ભાવ જુલાઈ 2025માં ફરી ઊંચા સ્તરે પહોંચ્યો અને ત્યારથી અત્યાર સુધી આશરે 35 ટકાનો ઘટાડો નોંધાયો છે. ગોદરેજ પરિવારના માલિકી વિવાદના સમાધાન, FY2022-23 પછી નફામાં સુધારાની આશા, માર્જિનમાં વધારો અને પામ ઓઈલ તથા એનિમલ ન્યુટ્રિશન બિઝનેસમાં વધારો થવાની અપેક્ષાઓ મુખ્ય કારણો રહ્યા હતા. તાજેતરના ઘટાડાનું કારણ ક્રોપ કેર, ડેરી અને એસ્ટેક બિઝનેસમાં અપેક્ષિત પ્રદર્શન ન થવું અને નફાની ધારણામાં ફેરફાર હોવાનું માનવામાં આવે છે.
હાલમાં કંપનીનો શેર 2027-28ના અંદાજિત નફાના લગભગ 17 ગણા મૂલ્યાંકન પર ટ્રેડ થઈ રહ્યો છે. વિશ્લેષકો 2026-27 અને 2027-28 દરમિયાન પ્રતિ શેર નફામાં દર વર્ષે લગભગ 18 ટકાની વૃદ્ધિની અપેક્ષા રાખે છે. તેથી હાલના રોકાણકારોએ શેર જાળવી રાખવો જોઈએ, જ્યારે ત્રણથી પાંચ વર્ષનો દૃષ્ટિકોણ ધરાવતા નવા રોકાણકારોએ બજારમાં ઘટાડા દરમિયાન ધીમે ધીમે રોકાણ વધારવું યોગ્ય રહેશે.
કંપનીના વિવિધ વ્યવસાય
ગોદરેજ એગ્રોવેટ અનેક ક્ષેત્રોમાં કાર્યરત છે. કંપની ભારત અને બાંગ્લાદેશમાં પશુ, મરઘાં, માછલી અને ઝીંગા માટેનું પશુઆહાર વેચે છે. કંપની ક્રૂડ પામ ઓઈલ, પામ કર્નેલ ઓઈલ અને પામ કર્નલ કેક-ખોળનું ઉત્પાદન કરે છે. ક્રોપ કેર વિભાગમાં નીંદણનાશક, જંતુનાશક, ફૂગનાશક, ગ્રોથ રેગ્યુલેટર, ખાતર અને જૈવિક ખાતરોનું વેચાણ કરે છે. તેની સહાયક કંપની એસ્ટેક કૃષિ રસાયણોનું ઉત્પાદન કરે છે. કંપની ક્રીમલાઈન બ્રાન્ડ હેઠળ ડેરી વ્યવસાય ચલાવે છે. રિયલ ગુડ ચિકન અને યમ્મિઝ બ્રાન્ડ હેઠળ પ્રોસેસ્ડ ફૂડ અને પોલ્ટ્રી ઉત્પાદનોનું વેચાણ કરે છે. 2025-26 દરમિયાન કંપનીની કુલ આવકમાં એનિમલ ન્યુટ્રિશનનો હિસ્સો 46 ટકા, પામ ઓઈલનો 19 ટકા, ડેરીનો 15 ટકા, ક્રોપ કેરનો 11 ટકા અને પ્રોસેસ્ડ ફૂડનો 7 ટકા રહ્યો હતો.
2025-26નું પરફોર્મન્સ
2025-26 દરમિયાન એનિમલ ન્યુટ્રિશન અને પામ ઓઈલ બિઝનેસે ઉત્તમ પ્રદર્શન કર્યું હતું. ક્રોપ કેર ક્ષેત્ર પડકારજનક રહ્યું હતું. જોકે એસ્ટેક વિભાગ EBITDA બ્રેક-ઈવન સુધી પહોંચ્યો છે. ડેરી બિઝનેસમાં દૂધ ખરીદીના ઊંચા ખર્ચને કારણે નફાકારકતા પર દબાણ આવ્યું છે. ફૂડ બિઝનેસની આવકમાં ઘટાડો થયો છતાં વધુ નફાકારક ઉત્પાદનો પર ધ્યાન કેન્દ્રિત કરવાને કારણે માર્જિનમાં સુધારો થયો છે. કંપનીની કાર્યક્ષમતામાં પણ નોંધપાત્ર સુધારો થયો છે. સરેરાશ વર્કિંગ કેપિટલ દિવસો 2023-24માં 45થી ઘટીને 2025-26માં માત્ર 25 દિવસ રહ્યા છે, તેની સામે રિટર્ન એન્ડ કેપિટલ એમ્પ્લોઈડ-ROCE વધીને 20 ટકા થયો છે.
વૃદ્ધિના કારણો
હવે કંપની માત્ર માર્જિન સુધારાની વાર્તા નથી રહી પરંતુ મૂલ્યવર્ધિત કૃષિ અને ફૂડ પ્લેટફોર્મ તરીકે વિકસી રહી છે. 2025-26 દરમિયાન પામ ઓઈલ વિભાગની આવકમાં 42.4 ટકાનો વધારો થયો છે. તેમ જ વિભાગીય નફામાં 67.9 ટકાનો ઉછાળો આવ્યો છે. વિભાગનો માર્જિન 17 ટકાથી વધીને 20.1 ટકા થયો છે. કંપનીએ આંધ્રપ્રદેશ, તેલંગાણા, તમિલનાડુ, ગોવા, મહારાષ્ટ્ર અને મિઝોરમમાં 75,000 હેક્ટરથી વધુ પામ વાવેતર કર્યું છે. નાણાંકીય વર્ષ 2030-31 સુધીમાં પામ ઓઈલ પોર્ટફોલિયોના 50થી 55 ટકા ઉત્પાદનો મૂલ્યવર્ધિત બનાવવા કંપનીનું લક્ષ્ય છે. 2026-27ના કુલ મૂડીરોકાણનો લગભગ અડધો ભાગ આ વિભાગમાં ખર્ચવામાં આવશે.
પશુઓ માટે પોષક આહાર
FY26 દરમિયાન આ વિભાગના વેચાણ જથ્થામાં 11.6 ટકાનો વધારો થયો હતો. તેમાંય ખાસ કરીને પશુઆહાર વિભાગમાં મજબૂત વૃદ્ધિ જોવા મળી હતી. નવા પ્રોડક્ટ્સ, બ્રાન્ડેડ પશુઆહાર અને ટેકનિકલ સેવાઓના આધારે આગામી ઘણા વર્ષો સુધી વૃદ્ધિ ચાલુ રહેવાની અપેક્ષા છે. કાચા માલના સારા સંચાલન અને સંશોધનના કારણે માર્જિનમાં પણ સુધારો થઈ શકે છે.
સાવચેતી રાખવાના મુદ્દા
કંપનીના ક્રોપ કેર વિભાગે 2025-26માં નબળું પ્રદર્શન કર્યું હતું અને માર્જિનમાં મોટો ઘટાડો નોંધાયો હતો. મેનેજમેન્ટ 2026-27ના બીજા ત્રિમાસિકથી સુધારાની અપેક્ષા રાખે છે, પરંતુ વૈશ્વિક સપ્લાય ચેઇન અવરોધોને કારણે ખર્ચ વધી શકે છે. હર્બિસાઇડ નિયમોમાં થતા ફેરફારો પણ જોખમ બની શકે છે. ક્રીમલાઈન-ડેરી વિભાગમાં આવક સ્થિર રહી અને EBITDAમાં લગભગ એક તૃતીયાંશ ઘટાડો થયો છે. દૂધ ખરીદીના ભાવ ઘટશે તો જ આ વિભાગમાં સુધારો શક્ય બનશે. એસ્ટેકમાં સુધારો થયો છે પરંતુ તે હજુ મોટો નફાકારક વિભાગ બન્યો નથી.
ચોમાસું અને વૈશ્વિક બજાર પર નજર જરૂરી
2026નું ચોમાસું કંપની માટે અત્યંત મહત્વપૂર્ણ રહેશે કારણ કે ક્રોપ ઇનપુટ્સ, પશુઆહાર, ડેરી ખર્ચ અને પામ ઓઈલ ઉત્પાદન તેના પર આધારિત છે. નબળું અથવા અસમાન ચોમાસું કંપનીના વેચાણ અને માર્જિનને અસર કરી શકે છે. વૈશ્વિક સ્તરે પામ ઓઈલના ભાવ મલેશિયા અને ઇન્ડોનેશિયાના ઉત્પાદન, બાયોડીઝલની માંગ અને હવામાન પર આધારિત રહે છે. સ્થાનિક પામ વાવેતર કંપનીને કેટલીક હદ સુધી સુરક્ષા આપે છે, પરંતુ વૈશ્વિક ભાવમાં વધઘટની અસર સંપૂર્ણપણે ટાળી શકાતી નથી.
રોકાણકારો માટે મુખ્ય મુદ્દા
પામ ઓઈલ અને એનિમલ ન્યુટ્રિશન બિઝનેસ મજબૂત નફા વૃદ્ધિના મુખ્ય આધાર છે. ક્રોપ કેર, ડેરી અને એસ્ટેક વિભાગમાં સુધારો જરૂરી રહેશે. રીટર્ન ઓન કેપિટલ એમ્પ્લોઈડ-ROCE અને વર્કિંગ કેપિટલમાં સતત સુધારો કંપનીની કાર્યક્ષમતામાં વધારો દર્શાવે છે. ત્રણથી પાંચ વર્ષના લાંબા ગાળાના રોકાણકારો માટે શેરમાં ધીમે ધીમે રોકાણ વધારવાની તક પમ ગણવામાં આવી શકે છે.
