ટ્રેડ ડીલમાં આયાત ડયૂટી ૧૮ ટકા થતાં ભારતના ગારમેન્ટની નિકાસમાં વધારો થશે
ભારત સાથેની ટ્રેડ ડીલની અમેરિકાએ કરેલી જાહેરત કરી દીધીઃ ટ્રેડ ડીલમાં આયાત ડયૂટી ૧૮ ટકા થતાં ભારતના ગારમેન્ટની નિકાસમાં વધારો થશે
અમેરિકાએ બે દિવસ પૂર્વે જાહેર કરેલી ટ્રેડ ડિલને પરિણામે ભારતમાંથી નિકાસ કરવામાં આવતા રેડીમેડ કોટન ગારમેન્ટ, ટેરી ટોવેલ, મેનમેડ ફાઈબર-કૃત્રિમ રેસાઓમાંથી ભારતમાં બનતી વસ્તુઓની નિકાસમાં ૧૦થી ૧૫ ટકાનો વધારો થઈ જવાની સંભાવના છે. અમેરિકો ટેરિફ વૉર ચાલુ કરીને ભારતથી થતી આયાત પર ૫૦ ટકા ડયૂટી લગાવી દીધી તે પછીના સમયગાળામાં ભારતમાંથી થતી નિકાસમાં ૩૦થી ૨૫ ટકાનો ઘટાડો આવી ગયો છે. ભારતના પાવરલૂમ સેક્ટરના એકમોને ટ્રેડ ડીલને કારણે મોટો ફાયદો થશે. પાવરલૂમ સાથે સંકળાયેલા ઉત્પાદકો માટે ટ્રેડ ડીલ બહુ જ મોટું બજાર ઉપલબ્ધ કરાવી દેશે. ટ્રેડ ડીલને કારણે ટેક્સટાઈલના પ્રોડક્ટ્સની નિકાસમાં અંદાાજે રૃા. ૫૦૦૦ કરોડનો વધારો થશે, એમ ટેક્સટાઈલ સેક્ટરના અનુભવી અને જાણકાર ભરત છાજેડનું કહેવું છે.
બાંગલાદેશ, શ્રીલંકા, ઇન્ડોનેશિયા અને વિયટનામ કરતાં ભારતના પ્રોડક્ટ્સ સસ્તામાં વેચી શકાતા નિકાસ વધશે
ટેક્સટાઈલના સેક્ટરની રાષ્ટ્રીય સ્તરની સંસ્થા પાવરલૂમ ડેવલપમેેન્ટ એન્ડ એક્સપોર્ટ પ્રમોશન કાઉન્સિલ-પેડેક્સિલના સૂત્રોનું કહેવું છે કે અમેરિકાએ આયાત ડયૂટી ઘટાડી હોવાથી ભારતમાંથી થતી ટેક્સટાઈલની નિકાસ પર ૧૮ ટકા ડયૂટી કરી દેતા બાંગલાદેશ, શ્રીલંકા, ઇન્ડોનેશિયા, વિયેટનામ જેવા એક્સપોર્ટર્સ કરતાં વધુ સ્પર્ધાત્મક ભાવથી ભારતના નિકાસકારો અમેરિકાના બજારમાં તેમના ટેક્સટાઈલના પ્રોડક્ટ્સ વેચી શકશે. પરિણામે ભારતના પ્રોડક્ટ્સના વેચાણમાં ૧૦થી ૧૫ ટકાનો વધારો થઈ જવાની સંભાવના રહેલી છે.
પેડેક્સિલના સૂત્રોનું કહેવું છે કે નાના અને મધ્યમ કદના એકમો તેમના થકી થતી કપડાંની, મેડઅપ્સ એટલે કે ટોવેલ અને હોમ ટેક્સટાઈલની નિકાસને વધુ મોટો ફલક પર લઈ જઈ શકશે. આ ટ્રેડ ડીલને પરિણામે ટેરિફ વૉરને કારણે નિર્માણ થયેલી સ્થિતિ સાવ જ બદલાઈ જશે. નિકાસના ઘટાડાની જગ્યાએ નિકાસમાં વધારો થશે. મેક ઇન ઇન્ડિયાને પ્રોત્સાહન મળશે. ભારતના પાવરલૂમના ઉત્પાદનોને વધુ સારુ બજાર મળતું થશે. કોટન, સિન્થેટિક્સ અને બ્લેન્ડેડ યાર્ન ત્રણેયના ઉત્પાદનોની નિકાસ વધી જશે. સુરત અને મુંબઈ જેા ટેક્સટાઈલ ક્લસ્ટરને લાભ થશે.
(બોક્સ)
બજેટમાં ટેક્સટાઈલ માટે નેશનલ ફાઈબર સ્કીમ ચાલુ કરવામાં આવી
નાણાં મંત્રી નિર્મલા સીતારમણે રવિવારે રજૂ કરેલા બજેટમાં સલામતી માટેના સાધનો તૈયાર કરતા ઉદ્યોગ માટેના મહત્વના ગણાતા કાચા માલ મેનમેડ ફાઈબરમાથી બનતી વસ્તુઓની નિકાસમાં વધારો થાય અને સિલ્ક, વૂલ અને મેનમેડ ફાઈબરના સેક્ટરમાં ભારતને આત્મનિર્ભર બનાવશે. આ સાથે જ નેશનલ હેન્ડિક્રાફટ અને હેન્ડલૂમ માટે નેશનલ હેન્ડલૂમ એને હેન્ડિક્રાફ્ટ માટે સર્વગ્રાહી યોજનાની જાહેરાત કરી છે. આ આયોજન વિવર્સ-વવણકરો અને કારીગરોને નવી તાકાત આપશે. તેને પરિણામે પાવરલૂમ સેક્ટરની વેલ્યુ ચેઈન બનાવવામાં મદદ કરશે. ખાદીનું ગ્લોબલ બ્રાન્ડિંગ કરીને તેનું વેચાણ વધારવાનું આયોજન કરવામાં આવી રહ્યું છે.
