બલ્ક ડ્રગ્સ માટેની PLI યોજનામાં ઓનલાઈન અરજી કરવાની મર્યાદા 16 જાન્યુઆરી સુધી લંબાવાઈ
અમદાવાદઃ બલ્ક ડ્રગ્સ માટેની પ્રોડક્શન લિંક્ડ ઇન્સેન્ટિવ (PLI) યોજના હેઠળ ઓનલાઈન અરજી કરવાની સમયમર્યાદા ડિપાર્ટમેન્ટ ઓફ ફાર્માસ્યૂટિકલ્સે 16મી જાન્યુઆરી, 2026 સુધી લંબાવી આપી છે. આ યોજના હેઠળ વ્યાપક અસર ધરાવતા કાર્બાપેનેમ એન્ટિબાયોટિક મેરોપેનેમ અને એન્ટિરેટ્રોવાયરલ દવા રિટોનાવિરના મુખ્ય ઘટકોના ઉત્પાદન માટે સહાય આપવામાં આવી રહી છે.
દેશમાં મહત્વપૂર્ણ કી સ્ટાર્ટિંગ મટીરિયલ્સ (KSMs), ડ્રગ ઇન્ટરમિડિએટ્સ (DIs) અને એક્ટિવ ફાર્માસ્યુટિકલ ઇન્ગ્રેડિયન્ટ્સ (APIs)ના સ્થાનિક ઉત્પાદનને પ્રોત્સાહન આપવા માટેની PLI યોજના હેઠળ, DoP એ નવેમ્બર મહિનામાં અન્ય કેમિકલ સિન્થેસિસ આધારિત KSMs, DIs અને APIsના ટાર્ગેટ સેગમેન્ટમાં આ ઉત્પાદનોના ઉત્પાદન માટે પાત્રતા ધરાવતી કંપનીઓ પાસેથી અરજીઓ મંગાવી હતી.
આ આમંત્રણના આધારે વધુ આઠ કંપનીઓને સહાય આપવામાં આવશે. DoP દ્વારા તાજેતરમાં કરવામાં આવેલી જાહેરાત મુજબ, આ ઉત્પાદનો માટે ઓનલાઈન અરજી કરવાની અંતિમ તારીખ 16 જાન્યુઆરી, 2026 સુધી લંબાવવામાં આવી છે. અગાઉ નવેમ્બર મહિનામાં વિભાગે અરજી કરવાની અંતિમ તારીખ 26 ડિસેમ્બર, 2025 જાહેર કરી હતી. ફાર્માસ્યૂટિકલ્સ વિભાગે જણાવ્યું છે કે 26 નવેમ્બરનાં અગાઉના નોટિસમાં દર્શાવેલી બધી અન્ય શરતો યથાવત લાગુ રહેશે.
અગાઉના અહેવાલ મુજબ, મેરોપેનેમ માટે આ રાઉન્ડમાં મહત્તમ ચાર અરજદારો પસંદ કરવામાં આવશે, જેમાં યોજના માર્ગદર્શિકા અનુસાર ન્યૂનતમ વાર્ષિક ઉત્પાદન ક્ષમતા 4 મેટ્રિક ટન રહેશે. આમ કુલ ઉત્પાદન ક્ષમતા 16 મેટ્રિક ટન રહેશે. રિટોનાવિર માટે પણ મહત્તમ ચાર અરજદારો પસંદ કરી શકાય છે, જેમાં ન્યૂનતમ વાર્ષિક ઉત્પાદન ક્ષમતા 5 મેટ્રિક ટન રહેશે અને કુલ ઉત્પાદન ક્ષમતા 20 મેટ્રિક ટન રહેશે, એમ વિભાગે જણાવ્યું હતું.
DoP એ નવેમ્બર મહિનામાં જણાવ્યું હતું કે યોજનાની વિવિધ શરતોનું પાલન કરવું ફરજિયાત રહેશે, જેમ કે ઉપલબ્ધ ક્ષમતાના આધારે ફાળવણી, ઉત્પાદનો માટે ઇન્સેન્ટિવની મર્યાદા તથા ઉત્પાદન અવધિ દરમિયાન ઇન્સેન્ટિવની મર્યાદા, જે કેમિકલ સિન્થેસિસ આધારિત ઉત્પાદનો માટે નાણાકીય વર્ષ 2027-28 સુધી રહેશે.
જે અરજદારો (તેમની ગ્રુપ કંપનીઓ અથવા સબસિડિયરીઝ સહિત)એ અગાઉ આ જ સબસ્ક્રાઇબ ન થયેલા ઉત્પાદનો માટે અરજી કરી હતી અને મંજૂરી મેળવી હતી, પરંતુ બાદમાં કામગીરી ન થવાને કારણે અથવા અન્ય કારણોસર યોજના છોડીને ગયા હોય અથવા જેમની મંજૂરી રદ કરવામાં આવી હોય, તેવા અરજદારોને આ જ પાત્ર ઉત્પાદન માટે ફરી અરજી કરવાની મંજૂરી મળશે નહીં.
બલ્ક ડ્રગ્સ માટેની PLI યોજના 20 માર્ચ, 2020ના રોજ શરૂ કરવામાં આવી હતી, જેમાં નાણાકીય વર્ષ 2020-21થી 2029-30 માટે કુલ રૂ. 6,940 કરોડનું નાણાકીય આયોજન કરવામાં આવ્યું છે. આ યોજનાનો હેતુ આયાત પર ભારે નિર્ભરતા ધરાવતા 41 ઓળખાયેલા બલ્ક ડ્રગ્સના સ્થાનિક ઉત્પાદનને પ્રોત્સાહન આપવાનો છે.આ વર્ષે ઑગસ્ટમાં, કેમિકલ્સ અને ફર્ટિલાઇઝર્સ મંત્રાલયે (જે હેઠળ DoP કાર્યરત છે) જણાવ્યું હતું કે 32 કંપનીઓને ગ્રીનફિલ્ડ ઉત્પાદન માટે 48 પ્રોજેક્ટ્સ મારફતે 33 APIs/DIs/KSMs માટે પસંદ કરવામાં આવી છે.
જૂન, 2025 સુધીમાં યોજનાની છ વર્ષીય ઉત્પાદન અવધિમાંથી કેમિકલ સિન્થેસિસ આધારિત ઉત્પાદનો માટે સવા ત્રણ વર્ષ અને ફર્મેન્ટેશન આધારિત ઉત્પાદનો માટે સવા બે વર્ષનો અમલ પૂર્ણ થયો છે. તે સમય સુધી રૂ. 3,938.5 કરોડના પ્રતિબદ્ધ રોકાણ સામે કુલ રોકાણ લક્ષ્યાંકને વટાવીને રૂ. 4,709 કરોડ સુધી પહોંચ્યું હતું.
જૂન, 2025 સુધીમાં ફર્મેન્ટેશન આધારિત ઉત્પાદનોમાં ન્યૂનતમ 90 ટકા અને કેમિકલ સિન્થેસિસ આધારિત ઉત્પાદનોમાં 70 ટકા સ્થાનિક મૂલ્યવર્ધન સાથે 26 APIs/KSMs/DIs માટે દેશી ઉત્પાદન ક્ષમતા ઊભી કરવામાં આવી છે. નાણાકીય વર્ષ 2022-23થી અત્યાર સુધી કુલ રૂ. 1,962 કરોડનું વેચાણ નોંધાયું છે, જેમાં રૂ. 479 કરોડની નિકાસનો સમાવેશ થાય છે, પરિણામે રૂ. 1,483 કરોડની આયાત ટાળી શકાયી હોવાનું મંત્રાલયે ઑગસ્ટમાં જણાવ્યું હતું.
