RBI ની વ્યાજદરોમાં હજી અડધાથી પોણા ટકાનો વધારો થવાની સંભાવનાઃ હોમલોનના હપતાની રકમ વધી શકે
RBI ની વ્યાજદરોમાં હજી અડધાથી પોણા ટકાનો વધારો થવાની સંભાવનાઃ હોમલોનના હપતાની રકમ વધી શકે
ઓક્ટોબર મહિનામાં છૂટક ફુગાવાનો દર રીઝર્વ બેન્કની છ ટકાની ઉપલી મર્યાદાને વટાવી જતાં અર્થશાસ્ત્રીઓએ આગામી સમયમાં વધુ ચુસ્ત નાણાકીય પગલા લેવામાં આવે તેવી સંભાવના સંભાવના વ્યક્ત કરી રહ્યા છે. રિઝર્વ બેંક ઓફ ઇન્ડિયા આગામી નીતિગત બેઠકોમાં રેપો રેટમાં વધુ વધારો કરે તેવી પૂરી શક્યતા છે.
ઓક્ટોબર CPI ફુગાવો: ગ્રાહક ભાવાંક-કન્ઝ્યુમર પ્રાઈસ ઇન્ડેક્સ આધારિત ફુગાવો સપ્ટેમ્બરના ૫.૫૪ ટકાથી વધીને ઓક્ટોબરમાં ૬.૦૯ ટકા પર પહોંચી ગયો છે. મુખ્યત્વે ખાદ્ય ચીજવસ્તુઓના ભાવમાં તીવ્ર વધારો એટલે કે ૮.૯૪ ટકાનો થયેલો વધારો ફુગાવાના દર ઊંચા જવા માટે જવાબદાર છે. નવા ૨૦૨૪ ના બેઝ વર્ષવાળી સીરિઝ શરૂ થયા પછીનો આ સૌથી ઊંચો આંકડો છે. મોનેટટરી પોલીસી કમિટીના સભ્યોની આગામી બેઠક ૨ થી ૪ ડિસેમ્બર, ૨૦૨૬ દરમિયાન યોજાવાની છે. આ બેઠકમાં વ્યાજદર વધારવાનો નિર્ણય લેવામાં આવે તેવી સંભાવના છે. અગાઉ ઓક્ટોબરમાં મોનેટરી પોલીસી કમિટીએ રેપો રેટ ૨૫ બેઝિસ પોઈન્ટ-પા ટકો વધારીને ૫.૫૦ ટકા કર્યો હતો અને પોતાનું વલણ ‘તટસ્થ’થી બદલીને ‘માપાંકિત કડકાઈ’ તરફનું કર્યું હતું.
અર્થશાસ્ત્રીઓ અને વૈશ્વિક બ્રોકરેજ હાઉસના અંદાજો
મોર્ગન સ્ટેન્લી (Morgan Stanley): ડિસેમ્બર, ફેબ્રુઆરી અને એપ્રિલ ૨૦૨૭ માં ૨૫-૨૫ bps ના ત્રણ વધુ દર વધારાની અપેક્ષા રાખે છે. કુલ મળીને પોણા ટકા જેટલો વ્યાજદરમાં વધારો આવી શકે છે. આ સાથે ટર્મિનલ રેટ (સૌથી ઊંચો દર) વધીને ૬.૨૫ ટકા પર પહોંચશે.
જે.પી. મોર્ગન (J.P. Morgan): અગાઉ ૫.૭૫ ટકાનો અંદાજ હતો, જેને સંશોધિત કરીને હવે ૬.૨૫ ટકા કર્યો છે. તેમના મતે, જૂન ૨૦૨૭ સુધી ફુગાવો ૬ ટકા અથવા તેથી ઉપર રહેવાની સંભાવના છે. જો ફુગાવાનું જોખમ વધુ વધશે તો ડિસેમ્બરમાં ૫૦ bps નો મોટો વધારો થવાનું પણ જોખમ રહેલું છે.
એમકે ગ્લોબલ (Emkay Global): વર્તમાન ચક્રમાં ટૂકડે ટૂકડે ૭૫ બેઝિસ પોઈન્ટ એટલે કે પોણા ટકા વ્યાજદર વધારાની અપેક્ષા છે. ફુગાવો આગામી ત્રણ ક્વાર્ટરમાં સરેરાશ ૫.૯ ટકા રહી શકે છે. અલ નીનોની સ્થિતિને કારણે રવિ પાક અને ખાદ્ય ફુગાવા પર જોખમ યથાવત છે.
બારક્લેઝ (Barclays): ડિસેમ્બરમાં ૨૫ બેઝિસ પોઈન્ટ અને ફેબ્રુઆરી ૨૦૨૭ માં વધુ ૨૫ બેઝિસ પોઈન્ટ ના વધારા સાથે ટર્મિનલ રેટ ૬.૦ ટકા પર સ્થિર થશે તેવી અપેક્ષા રાખે છે.
વ્યાજના દરમાં વધારો કરવાને પરિણામે હોમલોનના વ્યાજદર વધી શકે છે. તેમના હપતાની સંખ્યા વધી શકે છે. તેમ જ તેમને ચૂકવવાના થતાં માસિક નાણાંમાં વધારો થઈ શકે છે. આમ હોમલોન કે ઔદ્યોગિક લોન લેનારાઓની કઠણાઈ વધી શકે છે.
બજાર પર રાહત અને ચિંતાના પરિબળો
-
રાહત આપતા પરિબળો: બ્રેન્ટ ક્રૂડ ઓઇલના ભાવ અગાઉના ૧૧૭ ડોલર પ્રતિ બેરલની સપાટીથી ઘટીને આશરે ૯૫ ડોલર પ્રતિ બેરલની આસપાસ આવી ગયા છે. આ ઉપરાંત વિદેશી પોર્ટફોલિયો રોકાણકારોનું ભારતીય બજારોમાં પરત ફરવું અને રૂપિયા પરનું દબાણ ઘટવું એ સકારાત્મક બાબત છે.
-
ચિંતાના પરિબળો: લાંબો સમય સુધી ચાલી શકે તેવી અલ નીનોની સ્થિતિ, ખાદ્ય અને ઊર્જાના ઊંચા ભાવ તથા વૈશ્વિક અનિશ્ચિતતાઓ હજુ પણ ફુગાવા સામેના પડકારો વધારી જ રહી છે.

