SEBI ના નવા PMS નિયમોથી IPO રોકાણકારો માટે નવા દ્વાર ખુલ્યાઃ MF પોર્ટફોલિયો માટે ₹૨૫ લાખની રૂટ લિમિટ કરી દેવામાં આવતા રોકાણકારો પર શું  અસર પડશે

રોકાણકારોના પોર્ટફોલિયો મેનેજર્સ પોતાના ક્લાયન્ટ્સના ફંડમાંથી આઈપીઓ (IPO) અને પ્રાઈમરી ડેટ સિક્યોરિટીઝમાં સીધું રોકાણ કરી શકશે.

નવી દિલ્હી: ભારતીય જામીનગીરી અને વિનિમય બોર્ડ-SEBIએ પોર્ટફોલિયો મેનેજર્સ માટેના નિયમોમાં મોટો સુધારાત્મક ફેરફાર કરતાં ‘સેબી (પોર્ટફોલિયો મેનેજર્સ) રેગ્યુલેશન્સ, ૨૦૨૬’ની જાહેરાત કરી છે. આ નવા નિયમો અંતર્ગત હવે પોર્ટફોલિયો મેનેજર્સ પોતાના ક્લાયન્ટ્સના ફંડમાંથી આઈપીઓ (IPO) અને પ્રાઈમરી ડેટ સિક્યોરિટીઝમાં સીધું રોકાણ કરી શકશે. આ નિર્ણયથી આઈપીઓ માર્કેટમાં સંસ્થાકીય અને મોટા એચએનઆઈ (HNI) નાણાનો પ્રવાહ વધશે, જેનાથી આઈપીઓ ઈશ્યૂઓને વધુ લિક્વિડિટી અને મજબૂત સબ્સ્ક્રિપ્શન સપોર્ટ મળશે. ઉપરાંત સેબીએ મ્યુચ્યુઅલ ફંડ યુનિટ્સમાં રોકાણ કરવા માટે રૂ. ૨૫ લાખની નીચી મર્યાદા ધરાવતો નવો PRIM (Portfolio Route for Investing in Mutual Funds) રૂટ પણ શરૂ કર્યો છે. આ તમામ નવા નિયમો પહેલી એપ્રિલ ૨૦૨૭ થી અમલમાં આવશે.

આઈપીઓ અને અન્સિસ્ટેડ ડેટમાં રોકાણની છૂટ: રોકાણકારો માટે ફાયદા

નવા ફ્રેમવર્ક હેઠળ પોર્ટફોલિયો મેનેજર્સને આઈપીઓ (IPOs) અને પ્રાથમિક ડેટ ઈશ્યૂમાં રોકાણ કરવાની સ્પષ્ટ મંજૂરી આપવામાં આવી છે. આ ઉપરાંત ક્લાયન્ટની સંમતિથી ડિસ્ક્રિપ્શનરી પોર્ટફોલિયો મેનેજર્સ ક્લાયન્ટના કુલ ફંડના ૧૦ ટકા સુધીનું રોકાણ ‘ઈન્વેસ્ટમેન્ટ ગ્રેડ’ ધરાવતા અનલિસ્ટેડ નોન-કન્વર્ટિબલ ડિબેન્ચર્સમાં કરી શકશે.

ડેરિવેટિવ્ઝ એક્સપોઝર: એક્સચેન્જ-ટ્રેડેડ ડેરિવેટિવ્ઝમાં ક્લાયન્ટના કુલ ફંડના ૧.૨૫ ગણા સુધી એક્સપોઝર લેવાની છૂટ પણ આપવામાં આવી છે. સેબીએ મ્યુચ્યુઅલ ફંડ યુનિટ્સમાં રોકાણ માટે PRIM (Portfolio Managers Route for Investing in Mutual Fund Units) નામનો નવો વિશેષ રૂટ બનાવ્યો છે. આ રૂટ હેઠળ લઘુત્તમ રોકાણ મર્યાદા રૂ. ૨૫ લાખ રાખવામાં આવી છે (પરંપરાગત PMS માટે મર્યાદા રૂ.૫૦ લાખ જ રહેશે). આ રૂટમાં માત્ર મ્યુચ્યુઅલ ફંડના ડાયરેક્ટ પ્લાન્સ, એક્સચેન્જ ટ્રેડેડ ફંડ, ઈન્ડેક્સ ફંડ્સ અને સ્પેશિયલાઈઝ્ડ ફંડ્સમાં જ રોકાણ કરી શકાશે.

ફી અને નેટવર્થ: PRIM રૂટ માટે પોર્ટફોલિયો મેનેજરની ન્યૂનતમ નેટવર્થ રૂ. બે કરોડ હોવી જરૂરી છે. મેનેજમેન્ટ ફી પર ૧ ટકા (કુલ ભંડોળના)ની મર્યાદા રાખવામાં આવી છે. પોર્ટફોલિયો મેનેજર્સ નિર્ધારિત શરતો હેઠળ ચોક્કસ વિદેશી સિક્યોરિટીઝ અને ગ્લોબલ રોકાણ ઉત્પાદનોમાં પણ એક્સપોઝર લઈ શકશે. રજિસ્ટર્ડ પોર્ટફોલિયો મેનેજર્સ સાથે બાહ્ય ઈન્ડિપેન્ડન્ટ ફંડ મેનેજર્સ જોડાઈ શકશે, જોકે મુખ્ય જવાબદારી રજિસ્ટર્ડ PMS કંપનીની જ રહેશે. રૂ. ૧૦૦ કરોડથી ઓછા ભંડોળ ધરાવતા મેનેજર્સ માટે ડીલિંગ-રૂમની શરતોમાં છૂટછાટ આપવામાં આવી છે.

શું બદલાયું નથી?

સામાન્ય કે પરંપરાગત PMS માટે રૂ. ૫૦ લાખનું લઘુત્તમ રોકાણ અને ઓર્ડિનરી પોર્ટફોલિયો મેનેજર માટે રૂ. ૫ કરોડની નેટવર્થની શરત યથાવત રાખવામાં આવી છે. હાલના રૂ. ૫૦ લાખથી નીચા રોકાણોને નિયમો લાગુ થયાના ૧૨ મહિનામાં (એટલે કે ૩૧ માર્ચ ૨૦૨૮ સુધીમાં) સુસંગત બનાવવા પડશે.