ચાંદીનો વધી રહેલો ચળકાટ, કિલોદીઠ ભાવ રૂ. 3.50 લાખના મથાળાને વળોટી જશે

ચાંદીમાં રોકાણ કરી લેનારાઓને એક જ મહિનામાં અંદાજે 50થી 75 ટકા વળતર મળી ગયું છે. હજીય ચાંદીમાં ફાટફાટ કરતી તેજી નવી ઊંચાઈને આંબી જાય તેવી સંભાવના જોવા મળી રહી છે. લંડન મેટલ એક્સચેન્જ અને કોમક્સની ભાવ મુવમેન્ટ હજીય ચાંદીમાં રોકાણ કરનારાઓને ચાંદી જ ચાંદી રહેવાનો સંકેત આપી રહી છે.

ત્રીવીસમી જાન્યુઆરી 2026ના જ ચાંદીના ટ્રોય ઔંસદીઠ ભાવ 100 અમેરિકી ડૉલરના મથાળાને આંબી ગયા છે. આમ ચાંદીમાં 2025ના વર્ષમાં જોવા મળેલી તેજી હજીય અટકે તેવા અણસાર મળતા નથી. ચાંદીમાં જોવા મળી રહેલી તેજીના કારણોમાં ઊંડા ઉતરીએ તો ચાંદીના ભાવમાં વધારો ન આવે તેવી માન્યતા સાથે ટ્રેડિંગ કરનારાઓએ ભાવમાં ઊછાળો આવતા શોર્ટકવરિંગ ચાલુ કરતાં ચાંદીની લેવાલીમાં ઊછાળો આવ્યો છે અને ચાંદીના ભાવમાં વધુ ભડકો તયો છે.

માર્ચ 2025 પછી સમગ્ર વિશ્વના બજારમાં ચાંદીના ફિઝિકલ સપ્લાય તેના નીચામાં નીચા સ્તરે પહોંચ્યો છે. ચાંદીમાં પણ છૂટક રોકાણકારોનું સેફ હેવન બાયિંગ આવતા તેજીને ટેકો મળી ગયો છે. વિશ્વના જુદા જુદાં દેશો વચ્ચે સંઘર્ષ અને તનાવનો વધી રહેલો માહોલ ચાંદીમાં લેવાલી કરવા તરફ દરેકને વાળી રહ્યો છે. વિશ્વસ્તરે જોવા મળતી આર્થિક અનિશ્ચિતતા પણ ચાંદીમાં રોકાણ કરવા તરફ લોકોને વાળી રહી છે.

ચાંદીના ભાવમાં જોવા મળી રહેલી તેજીના અન્ય કારણોમાં ઊંડા ઉતરીએ તો ચાંદીના ઉત્પાદનમાં પણ ઘટાડો જોવા મળી રહ્યો છે. ચાંદીના ઉત્પાદનના ઘટાડા સાથે ચાંદીની ઔદ્યોગિક ડિમાન્ડમાં પણ જબરો વધારો આવી ગયો છે. મોનેટરી પોલીસીને કારણે પણ ચાંદીની ડિમાન્ડ વધી હોવાથી તેજીને ટેકો મળ્યો છે. ચાંદીના બજારનું ટેકનિકલ એનાલિસિસ કરનારાઓનું કહેવું છે કે ટેકનિકલ ચાર્ટ ચાંદીમાં તેજીનો સંકેત આપી રહ્યા છે. વિશ્વસ્તરે ડિમાન્ડ અને સપ્લાયમાં ગાળો ચાલુ રહેશે તો ચાંદીના ભાવ ઊંચા જવાની સંભાવના રહેલી જ છે.

ભારતીય બજારોની સ્થિતિ શું છે?

24મી જાન્યુઆરીએ અમદાવાદ અને મુંબઈ સહિતના ભારતના શહેરોમાં ચાંદીના કિલોદીઠ ભાવ રૂ. 3.35થી રૂ. 3.40ના બોલાયા છે. અમદાવાદની વાત કરવામાં આવે તો કિલોદીઠ ભાવ રૂ. 3.30 લાખનો બોલાયો હતો. મુંબઈ અને દિલ્હીમાં રૂ. 3,30,100નો ભાવ અને ચૈન્નઈ-હૈદરાબાદમાં રૂ. 3.45000નો ભાવ બોલાયો હતો. સ્થાનિક પ્રીમિયમને કારણે પ્રાદેશિક સ્તરે ભાવમાં વિવિધતા જોવા મળી રહ્યા છે.

જાન્યુઆરી 2026માં ચાંદીના બજારની ચાલ

જાન્યુઆરી 2026માં જ ચાંદીના ભાવમાં અંદાજે 40 ટકાની આસપાસનો વધારો આવી ગયો છે. સટોડિયાઓ સક્રિય થતાં હોવાથી પણ સ્થાનિક બજારમાં ચાંદીના ભાવ ઉપરના પ્રીમિયમમાં વધઘટ થતી જોવા મળે છે. નવા આવી રહેલા બજેટમાં ચાંદી પર સરકાર ઇમ્પોર્ટ ડ્યૂટી લાદે તેવી સંભાવનાની વાતો વહેતી થતાં પણ ચાંદીમાં લેવાલી અને લેવાલીને પગલે ભાવ વધી રહ્યા છે. ઇમ્પોર્ટ ડ્યૂટી વધશે તો ચાંદીમાં વધુ મોટો ઊછાળો જોવા મળી શકે છે.

ભાવ કેમ ઊંચા જઈ રહ્યા છે

ચાંદીમાં ડિમાન્ડ સપ્લાય વચ્ચેનો ગાળો વધી રહ્યો છે. ચાંદીની ઔદ્યોગિક ડિમાન્ડ વધી છે. સોલાર પેનલમાં ચાંદી લાગે છે. તદુપરાંત ઇલેક્ટ્રોનિક્સ આઈટેમ્સમાં ચાંદી લાગે છે. ઇલેક્ટ્રિક વેહિકલમાં તથા મેડિકલ ડિવાઈઝમાં પણ ચાંદીનો ઉપયોગ કરવામાં આવતો હોવાથી ચાંદીની ડિમાન્ડ વધી રહી છે. ચાંદીના બજારના નિષ્ણાતોનું કહેવું છે કે ચાંદીની કુલ ડિમાન્ડમાં ઇન્ડસ્ટ્રીયલ ડિમાન્ડનો હિસ્સો 55થી 60 ટકાથી વધારેનો છે. બીજીતરફ ચાંદીનું ઉત્પાદન નીચે આવી રહ્યું છે. ચાંદીની ખાણમાંથી વધારે ચાંદી ન નીકળતી હોવાથી પણ તેના મૂલ્યમાં વધારો થઈ રહ્યો છે, કારણ કે ઔદ્યોગિક ડિમાન્ડ અને સેફ હેવન ઇન્વેસ્ટમેન્ટની ડિમાન્ડ વધી રહી છે. તેમાં કેટલાક લોકો કમાઈ લેવા માટે પણ રોકાણ કરતાં થયા છે. ફિક્સ્ડ ડિપોઝિટ તોડાવીને તેમાં રોકાણ કરતા થયા છે. કોમેક્સ પાસે ચાંદીની ઇન્વેન્ટરીનો જથ્થો સતત ઘટી રહ્યો છે. ચાંદીની ફંડામેન્ટલ વેલ્યુ ટ્રોય ઔંસદીઠ 60 અમેરિકી ડૉલરની આસપાસની છે. પરંતુ મોટી લાવ લાવ થઈ ગઈ હોવાથી ચાંદીના ભાવ સાતમે આસમાને પહોંચી રહ્યા છે. છતાંય કેટલાક નિષ્ણાતો માને છે કે 1980ના અરસામાં ચાંદીમાં તેજી આવ્યા પછી આવેલા કરેક્શનની જેમ જ આ વખતે પણ આગામી ત્રણેક મહિનામાં મોટું કરેક્શન આવી શકે છે. તેમાં ચાંદીના ભાવ 30થી 35 ટકા તૂટી જવાની સંભાવના વ્યક્ત કરવામાં આવી રહી છે.

ભૌગોલિક અનિશ્ચિતતા પણ ચાંદીના બજારની તેજીની તણખાને હવા આપવાનું કામ કરી રહી છે. વિશ્વના ઘણાં દેશો વચ્ચેનો સંઘર્ષ વધી રહ્યો હોવાથી સેફ હેવન બાયિંગ આવી રહ્યું છે. અન્ય કિંમતી ધાતુઓના ભાવ પર પણ તેની અસર જોવા મળી રહી છે.

ભારતીય રૂપિયો અમેરિકી ડૉલર સામે નબળો પડી રહ્યો હોવાથી પણ ચાંદી અને સોનાની આયાત કિંમત ઊંચી જતી હોવાથી બંને ધાતુઓના ભાવ નવી ઊંચાઈએ પહોંચી રહ્યા છે. બીજીતરફ કમુરતા ગયા પછી ગુજરાતમાં લગનસરાની અને ખેડૂતોની ડિમાન્ડ નીકળી રહી છે. તેની અસર હેઠળ પણ ભાવ થોડા ઊંચકાઈ શકે છે. જોકે લગનમાં હવે 9 કેરટ અને 14 કેરેટના તથા પોલાં દાગીના ખરીદવાનું ચલણ વધી રહ્યું છે. ટૂંકા ગાળામાં તેજી રહે અને ભાવ હજીય ઊંચા જાય તેવી સંભાવના રહેલી છે. ચાંદીની વૈશ્વિક સ્તરે ડિમાન્ડ ખાસ્સી વધારે છે. સપ્લાય ઓછોછે. કોમેક્સમાં ચાંદીનો સ્ટોક ઘટી રહ્યો છે. રૂપિયાના અવમૂલ્યનને કારણે પણ ભાવ વધી રહ્યા છે. ચાંદીના બજારના નિષ્ણાતોનું માનવું છે કે ચાંદીના ભાવ હજીય ઊંચા જશે. બજારમાં ચાલતી ચર્ચા મુજબ ચાંદીના કિલોદીઠ ભાવ રૂ. 6 લાખથી 7 લાખનું મથાળું વળોટી જાય તેવી શક્યતા રહેલી છે.

છતાંય ચાંદીમાં મોટું કરેક્શન આવે તેવી સંભાવના પણ નિષ્ણાતો વ્યક્ત કરી રહ્યા છે. સટોડિયાઓએ કરેલા શોર્ટ સેલિંગ માટેની ખરીદી પર બ્રેક લાગી ગયા પછી કરેક્શન આવી શકે છે. છૂટક ખરીદીના ભાવમાં પણ ઘટાડો આવે તેમ જણાય છે. બીજું, ચાંદીના વર્તમાન બજાર ભાવ તેના ફંડામેન્ટલ્સ કરતાં 40થી 42 ટકા ઊંચા છે. અમેરિકી ડૉલર સ્થિર થાય અને વૈશ્વિક નાણાં નીતિને વધુ ચુસ્ત બનાવવામાં આવે તો પણ ચાંદીના ભાવ નીચે આવી શકે છે.

આગામી છ માસથી માંડીને ચોવીસ માસના ગાળામાં ચાંદીના ભાવની ચાલની વાત કરવામાં આવે તો ઔદ્યોગિક ડિમાન્ડ, ઇલેક્ટ્રિક વેહિકલ અને ઇલેક્ટ્રોનિક્સ ઉપકરણો માટે ચાંદીની ડિમાન્ડ વધી રહી છે. આ સ્થિતિમાં પણ નફો બુક કરવા મોટી વેચવાલી આવે તો ચાંદીના ભાવમાં ગાબડું પડવાની શક્યતાને નકારી શકાતી નથી. બજારમાં નોર્મલ વેચાણને બદલે સટ્ટાકીય લેવાલી ને વેચવાલીનો પ્રભાવ વધે તો પણ ચાંદીમાં કડાકો બોલી જાય તો નવાઈ પામવા જેવું નહિ હોય. વિશ્વની આર્થિક સ્થિતિ સુધરે અને સ્થિરતા આવે તો પણ સેફ હેવન ડિમાન્ડ ઘટી જાય તો ચાંદી તૂટીને નીચી સપાટીએ આવી શકે છે. ચાંદીના ફંડામેન્ટલ્સ કરતાં તેના ભાવ ઘણાં ઊંચા છે તે હકીકતને કોઈએ ભૂલવી ન જોઈએ.