આજે શેરબજારમાં શું કરશો?

ફંડામેન્ટલ્સની દ્રષ્ટિએ મજબૂત ગણાતો આજનો પહેલો શેર HCL Technologies Ltdનો છે. માર્કેટ સ્મિથ ઇન્ડિયાએ આ સ્ક્રિપમાં લેવાલી કરવાની ભલામણ કરી છે. શેરનો વર્તમાન બજાર ભાવ-Current Market Price રૂ.1,718નો છે. સ્ક્રિપમાં રોકાણ કરવા માટેના કારણોમાં ઊંડા ઉતરીએ તો કંપની વિશ્વમાં આઈ.ટી. સર્વિસ પૂરી પાડતી મજબૂત કંપની તરીકે જાણીતી છે. કંપની ક્લાઉડ અને એન્જિનિયરિંગ સર્વિસનું ફલક વિસ્તારી રહી છે. કંપની પાસે અત્યારે તગડી ઓર્ડર બુક છે. ડિજિટલ અને ક્લાઉડ સર્વિસ માટેના સોદાઓ થયા હોવાથી અમેરિકા અને યુરોપિયન સંઘના દેશોના ક્લાયન્ટ્સના સંખ્યાબંધ ઓર્ડર્સ કંપની ધરાવે છે. તેમ જ સંગીન ક્લાયન્ટ બેઝ છે. કંપનીનો રોકડનો મજબૂત પ્રવાહ તેની આર્થિક સંગીનતાનો નિર્દેશ આપે છે. કંપની ડિવિડંડ આપતી કંપની છે. કંપનીના થઈ રહેલા ડિજિટલ ટ્રાન્સફોર્મેશનને કારણે લાંબા ગાળે તેની આવકમાં સંગીન વધારો થવાની શક્યતા દેખાઈ રહી છે. સામાન્ય રીતે ડિમાન્ડમાં ચઢાવ ઉતાર જોવા મળે છે. પરંતુ ક્લાઉડ અને આર્ટિફિશિયલ ઇન્ટેલિજન્સની ડિમાન્ડને કારણે કંપનીની સેવાઓનો પોર્ટફોલિયો વિસ્તરી રહ્યા છે. કંપનીના શેરના ભાવ વર્તમાન સપાટીથી ઉપર જવાની સંગીન સંભાવના છે. બજાર મજબૂત થાય તો સ્ક્રિપનો ભાવ વધીને રૂ. 1820થી રૂ.1850ની સપાટી પકડી શકે છે. ટેકનિકલ એનાલિસ્ટોને પણ સ્ક્રિપના ટેકનિકલ ચાર્ટમાં કપ અને હેન્ડલની પેટર્ન રચાતી જોવા મળી રહી છે. આ દર્શાવે છે કે ટૂંકા ગાળામાં એચસીએલ ટેકનોલોજીના શેરમાં ઇન્વેસ્ટર્સનો રસ વધી જશે.

ફંડામેન્ટલ્સની દ્રષ્ટિએ ઇન્વેસ્ટ કે ટ્રેડ કરવા પાત્ર બીજો શેર રિલાયન્સ ઇન્ડસ્ટ્રીઝ લિમિટેડ-Reliance Industries Ltd (RIL)નો છે. આજના દિવસ માટે લાર્જ કેપ કંપનીઓમાંથી લેવાલી કરવાને પાત્ર શેર્સ તરીકે રિલાયન્સ ઇન્ડસ્ટ્રીઝના શેરને મૂકવામાં આવ્યો છે. શેરનો વર્તમાન બજાર ભાવ રૂ. 2500થી 2550નો છે. રિલાયન્સ ઇન્ડસ્ટ્રીઝનું વિવિધતાસભર બિઝનેસ મોડેલ હોવાથી તેની આવક વધતી રહેવાની સંભાવનાને કારણે તેમાં લેવાલી કરવાની સૂચના આપવામાં આવી રહી છે. એનર્જી, ટેલિકોમ અને છૂટક વેચાણના બજાર સાથે કંપનીના હિતો સંકળાયેલા છે. કંપની લાંબાગાળે સારી આવક અને નફો કરે તેવી સંભાવના દેખાઈ રહી છે. કંપનીના એનર્જી અને રિટેઈલ બિઝનેસમાં સ્થાનિક સ્તરે જ મોટી ડિમાન્ડ છે. જિયોના ટેલિકોમ ક્ષેત્રના કામકાજથી કંપનીને સતત આવક થતી જોવા મળી રહી છે. ડિજિટલ અને  એનર્જીના બિઝનેસ થકી કંપનીને લાંબાગાળામાં વધુ આવક અને નફો મળવાની શક્યતા જોવાઈ રહી છે. કંપનીના શેરનો ભાવ વધીને રૂ. 2700થી 2850નું મથાળું બતાવી શકે છે.

આજે ખરીદવા પાત્ર ત્રીજો શેર ટાટા કન્સલ્ટન્સી સર્વિસિસ-Tata Consultancy Services (TCS)નો છે. લાંબાગાળા માટે તેમાં રોકાણ કરવાની ભલામણ કરવામાં આવી રહી છે. શેરનો વર્તમાન બજાર ભાવ રૂ. 3350થી રૂ. 3450ની રેન્જમાં ફરતો જોવા મળી રહ્યો છે. કંપની વૈશ્વિક આઈ.ટી. સર્વિસના બજારની અગ્રણી કંપની તરીકેનું સ્થાન ધરાવે છે. ડિજિટલ સર્વિસ ટ્રાન્સફોર્મેશનની સેવાના ક્ષેત્રમાં પણ કંપની મોટું કામ ધરાવે છે. કંપનીનું બિઝનેસ મોડેલ ઊંચા માર્જિનવાળું છે. છેલ્લા વીસ કે એકવીસ વર્ષથી કંપની તેના શેરહોલ્ડરને ડિવિડંડ આપતી આવી છે. જાન્યુઆરી 2026માં પણ શેરદીઠ રૂ. 57ના ડિવિડંડની જાહેરાત કરવામાં આવી છે. કંપનીનું આર્થિક સરવૈયું- balance sheet મજબૂત છે. રોકડનો પ્રવાહ પણ મજબૂત હોવાથી કંપનીની આર્થિક સંગીનતા દેખાઈ રહી છે. ઇન્ફોર્મેશન ટેક્નોલોજીના સેક્ટરની આ કંપની પાસે આર્ટિફિશિયલ ઇન્ટેલિજન્સ, સાયબર સિક્યોરીટી અને ક્લાઉડ સર્વિસના ઓર્ડરને કારણે મધ્યમ ગાળામાં પણ તેનો વિકાસ વધુ સારો થવાની શક્યતા દેખાઈ રહી છે. ટીસીએસ દેશ અને દુનિયાભરની કંપનીઓ સાથે સારા સંપર્ક ધરાવતી હોવાથી તેની ઓર્ડર બુક સંગીન છે. કંપનીના શેરનો ભાવ વધીને રૂ. 3600થી રૂ. 3800ની સપાટીને વળોટી જાય તેવી સંભાવના છે.

ટેકનિકલ ચાર્ટ પરથી મળતા સંકેતોને આધારે કંપનીના શેર્સની પસંદગી કરવામાં આવે તો આજના દિવસ માટે સીજી પાવર એન્ડ ઇન્ડસ્ટ્રીયલ સોલ્યુશન્સ-CG Power & Industrial Solutionsનું નામ આવે છે. ઇલેક્ટ્રિકલ એન્જિનિયરિંગના સેક્ટરની આ કંપની છે. શેરના ભાવમાં સુધારો થવાની મજબૂત શક્યતા દેખાઈ રહી છે. ટેકનિકલ ચાર્ટમાં મહત્વની પ્રતિકાર સપાટીની ઉપર બ્રેકઆઉટ આવે તેવી સંભાવના દેખાઈ રહી છે. આમ શેરના ભાવમાં સુધારા તરફી ચાલ જોવા મળી શકે છે. ટેકનિકલ ચાર્ટ દર્શાવે છે કે પહેલી પ્રતિકાર સપાટી વટાવી જાય તો બીજી પ્રતિકાર સપાટી વટાવવા માટે શેર છલાંગ લગાવી શકે છે.

ટેકનિકલ ચાર્ટની દ્રષ્ટિએ રોકાણ કરવાને પાત્ર બીજો શેર જિન્દાલ શૉ લિમિટેડ-Jindal Saw Ltdનો છે. સ્ટીલ અને પાઈપ મેન્યુફેક્ચરિંગના સેક્ટરની આ કંપનીના ટેકનિકલ ચાર્ટ તેમાં તેજી તરફી સુધારો આવવાનો નિર્દેશ આપે છે. ટેકનિકલ ચાર્ટમાં પ્રાઈસ બ્રેકઆઉટ આવવાનો સંકેત મળી રહ્યો છે. શેરનો આરએસઆઈ-રિલેટીવ સ્ટ્રેન્ગ્થ ઇન્ડેક્સ પણ મજબૂતીનો નિર્દેશ આપે છે. સ્ક્રિપના ભાવમાં ઊછાળો આવે તો પહેલી પ્રતિકાર સપાટીને વળોટીને બીજી પ્રતિકાર સપાટી તરફ છલાંગ લગાવે તેવી સંભાવના રહેલી છે.

આજે નિફ્ટીમાં શું કરશો?

ગત સપ્તાહના અંતમાં એનએસઈ-NSE Niftyમાં નરમાઈ જોવા મળી હતી. નિફ્ટી 25,600ની નજીક બ્રેકઆઉટ સપોર્ટ ધરાવે છે.  ટૂંકા ગાળામાં થોડીક નરમાઈ સાથે આજે નિફ્ટી રેન્જબાઉન્ડ રહેવાની સંભાવના છે. બજારની નરમાઈ વચ્ચે પણ આઈટીસી હોટેલ્સ-ITC Hotels, ટાટા કેપિટલ-Tata Capital, ઓલા ઇલેટ્રિક-Ola Electric, અદાણી પાવર-Adani Power, એલટીઆઈ માઈન્ડટ્રી-LTIMindtreeના શેર્સ ફોકસમાં રહેવાની સંભાવના છે.

નિફ્ટી ફ્ચુયર-Nifty Future માર્કેટની વાત કરીએ તો 26મી જાન્યુઆરી સુધી 25,550થી 25,600ની નજીકની ટેકાની સપાટીની ઉપર રમતો રહેશે. નિફ્ટિ ફ્યુચરમાં 26,050થી 26,200ની સપાટીએ પ્રતિકાર જોવા મળી શકે છે. નિફ્ટિ ફ્ચુયરમાં 25000ની સપાટીએ પુટ ઓપ્શન મોટી સંખ્યામાં હોવાથી બજાર રેન્જબાઉન્ડ રહેવાની સંભાવના વધારે છે. નિફ્ટિ ફ્યુચર પ્રતિકાર સપાટીને વળોટી જાય તો 26,350થી 26,500ની રેન્જમાં જાય તે પછી તેમાં બ્રેકઆઉટ આવવાની સંભાવના છે. નિફ્ટી ફ્યુચર 25,300થી 25,400ની ટેકાની સપાટીથી નીચે  ઉતરી જાય તો તેમાં નરમાઈ જોવા મળી શકે છે. બજારનું વર્તમાન માળખું નિર્દેશ આપે છે કે નિફ્ટી વર્તમાન રેન્જમાં રહે તેવી સંભાવના વધારે છે. મહત્વની ટેકાની સપાટીની ઉપરની સપાટી નિફ્ટી ફ્યુચર જાળવી રાખે તો રેન્જબાઉન્ડ રહેશે. નિફ્ટી ફ્યુચરમાં મોટો અવરોધ ફોરેન ઇન્સ્ટિટ્યૂશનલ ઇન્વેસ્ટર્સની ચાલી રહેલી મોટી વેચવાલીને કારણે આવી રહ્યો છે.

ખાસ નોંધઃટ્રેડર્સ અને ઇન્વેસ્ટર્સ એક વાત સમજી લે. શેરબજારમાં રોકાણ કરવું કે ટ્રેડિંગ કરવું એ એક જોખમી બાબત છે. તેથી કેટલીકવાર રોકાણ કે ટ્રેડિંગ કરીને આબાદ કે બરબાદ થઈ શકાય છે. આ સ્થિતિમાં રોકાણકારોએ પોતે સમજી વિચારીને અમે સૂચવેલી સ્ક્રિપમાંથી કઈ સ્ક્રિપમાં રોકાણ કરવાનો નિર્ણય લેવાનો રહેશે. તેમાં રોકાણ કરવાથી થતાં નફા કે નુકસાન માટે અમે જવાબદાર નથી. અમે માત્ર માર્ગદર્શન આપ્યું છે. માત્ર સંભાવનાને વ્યક્ત કરી છે. છતાં રોકાણકાર કે ટ્રેડરે પોતાની બુદ્ધિ વાપરીને કે પછી પોતાની જોખમ લેવાની કે રોકાણ કરવાની મર્યાદાને સમજીને સ્ક્રિપમાં રોકાણ કરવાનો નિર્ણય લેવાનો રહેશે. તેને માટે પોતે નક્કી કરેલા એક્સપર્ટનો અભિપ્રાય લઈને પણ આગળ વધી શકાય છે. કોઈપણ સ્થિતિ માટે આ રિપોર્ટ રજૂ કરનાર જવાબદાર નથી. દરેક નિર્ણય માટે વાચક કે રોકાણકાર પોતે જ જવાબદાર છે.