તમે વજન ઘટાડવાની ઇમ્પોર્ટેડ દવા ખરીદો છો? આટલું જરૂર વાંચી લો
વજન ઘટાડવા માટેની ઓનલાઈન ગેરકાયદે દવાઓ ખરીદવી અત્યંત જોખમી હોવાથી બ્રિટનમાં દવાનું મોનિટરિંગ કરતી સંસ્થાએ ચેતવણી આપીઃ
ભારતીયો પણ ઇમ્પોર્ટેડ દવા ખાઈ વજન ઘટાડવાના મોહમાં જોખમને આમંત્રણ આપવાથી દૂર રહે
આ દવાઓના ઉપયોગથી હૃદય સંબંધિત સમસ્યાઓ, માનસિક અસર અને રક્તમાં શુગરનું સ્તર ખતરનાક રીતે ઘટી જવું જેવી ગંભીર આડઅસરો થઈ શકે છે.
બ્રિટનની મેડિસિન્સ એન્ડ હેલ્થકેર પ્રોડક્ટ્સ રેગ્યુલેટરી એજન્સી (MHRA)એ અનિયમિત વેબસાઇટ્સ-બહુ જાણીતી ન હોય તેવી વેબસાઈટ્સ કે પછી સોશિયલ મીડિયા મારફતે વેચાતી વજન ઘટાડવાની દવાઓ ખરીદી રહ્યા હોવ તો તેના પર બ્રેક લગાવી દેવાની સૂચના બહાર પાડી છે. તમે આ પ્રકારની દવા ખરીદીને તેનો ઉપયોગ કરતા હોવ તો તેનાથી તમારા આરોગ્ય સામે ઊભા થતાં ગંભીર જોખમોની ચેતવણી આપી છે.
ગેરકાયદે રીતે વેચાતી દવાઓ ઘણીવાર નકલી, દૂષિત, ખોટી માત્રામાં બનાવેલી અથવા પેકેટ પર ઉલ્લેખ ન કરેલા શક્તિશાળી ઘટકો ધરાવતી હોય છે. આ દવાઓના ઉપયોગથી હૃદય સંબંધિત સમસ્યાઓ, માનસિક અસર અને રક્તમાં બ્લડસુગરનું સ્તર ખતરનાક રીતે ઘટી જવું જેવી ગંભીર આડઅસરો થઈ શકે છે.
તમારા પોતાના વજન નિયંત્રણ માટે ઉપયોગમાં લેવાતી કેટલીક દવાઓમાં તમામ GLP-1 દવાઓ (જેનાને “સ્કિની જેબ્સ” તરીકે પણ ઓળખવામાં આવે છે)નો સમાવેશ થાય છે. આ દવાઓ માત્ર પ્રિસ્ક્રિપ્શન પર જ વેચાતી દવાઓ છે. યોગ્ય અને સલામત સારવાર સુનિશ્ચિત કરવા માટે તે માત્ર લાયકાત ધરાવતા આરોગ્ય વ્યવસાયિક દ્વારા યોગ્ય તપાસ પછી જ આપવી જોઈએ. આ દવાઓનું સોશિયલ મિડિયા પરથી અને ઓનલાઈન ધૂમ વેચાણ થઈ રહ્યું છે.
MHRAએ લોકોને પ્રિસ્ક્રિપ્શન વિના દવાઓ ન ખરીદવાની કડક સલાહ આપી છે. GLP-1 સહિત વજન ઘટાડવાની દવાઓ માત્ર ક્લિનિકલ મૂલ્યાંકન પછી જ આપવી જોઈએ. દવાઓ હંમેશા બ્રિટનની સરકારી સંસ્થામાં રજિસ્ટર થયેલી કે નોંધાયેલી ફાર્મસી અથવા કાયદેસર રિટેલર્સ પાસેથી જ ખરીદવી જોઈએ. સોશિયલ મીડિયા પર “ઝડપી ઉપાય”, “ચમત્કારી પરિણામ” અથવા અત્યંત ઓછી કિંમતે વેચાતી દવાઓથી દૂર રહેવું જોઈએ. ગેરકાયદે વેચાણના સામાન્ય સંકેતો છે. શંકાસ્પદ વેબસાઇટ્સ અથવા દવાઓની જાણ સત્તાવાળાઓને કરવી જોઈએ જેથી અન્ય લોકોને સુરક્ષિત રાખી શકાશે. બ્રિટનના હેલ્થ મિનિસ્ટર ડૉ. જુબીર અહમદે જણાવ્યું કે, “એક પ્રેક્ટિસિંગ ડોક્ટર અને પેશન્ટ સેફ્ટી મિનિસ્ટર તરીકે હું સ્પષ્ટપણે કહેવા માંગું છું કે કૃપા કરીને અનિયમિત સ્ત્રોતોમાંથી વજન ઘટાડવાની દવાઓ ન ખરીદો. આ દવાઓ સલામતી અને ગુણવત્તાની કોઈ કાળજી વિના જ બનાવવામાં આવે છે અને ગ્રાહકોના આરોગ્ય માટે ગંભીર જોખમ ઊભું કરે તેવી હોય છે. જે લોકો તમારા આરોગ્યની ચિંતા કરતા નથી એવા અપરાધીઓને પ્રોત્સાહન આપશો નહિ.”
MHRAની સેફ્ટી એન્ડ સર્વેલન્સ ટીમની જેન મેથિસને ઉમેર્યું કે, “વર્ષના આ સમયગાળામાં લોકો સ્વાસ્થ્ય સુધારવાના રસ્તા શોધે છે, પરંતુ ગેરકાયદે ઓનલાઈન વેચાણકારો પાસેથી દવાઓ ખરીદવી તમારા આરોગ્ય માટે ખરેખર જોખમી સાબિત થઈ શકે છે. હંમેશા અધિકૃત અને કાયદેસર સ્ત્રોતોમાંથી જ દવાઓ લો અને સુરક્ષિત, વૈજ્ઞાનિક આધારિત વિકલ્પો માટે આરોગ્ય નિષ્ણાતની સલાહ લો.”
ભારતીયો પણ ઇમ્પોર્ટેડ દવા લઈને મિત્રવર્તુળને પ્રભાવિત કરવા માટે ઓનલાઈન આ પ્રકારની દવાઓ મંગાવતા હોવાનું જોવા મળે છે. આ પ્રકારની દવા લઈને તેનો વજન ઘટાડવા માટે ઉપયોગ કરતાં પહેલા ભારતીયોએ પણ ચેતી જવાની જરૂર છે. આ રીતે ઓનલાઈન ખરીદેલી દવાઓ ડુપ્લિકેટ હોઈ શકે છે. તેમ જ તમારા આરોગ્ય માટે જોખમી સાબિત થઈ શકે છે.
જશુભાઈ પટેલનું શું કહેવું છે?
વજન ઘટાડવા માટેની ઇમ્પોર્ટેડ દવા ખરીદવી ખતરનાક છે તેનો સ્વીકાર કરતાં અમદાવાદના કેમિસ્ટ અને ડ્રગિસ્ટ એસોસિયેશનના પ્રમુખ જશુભાઈ પટેલ કહે છે કે બ્રિટનની MHRA એ ચેતવણી આપી છે કે આ દવાઓમાં નકલી, દૂષિત અથવા ખોટી માત્રામાં બનાવેલી દવાઓ હોઈ શકે છે, જે હૃદય સંબંધિત સમસ્યાઓ, માનસિક અસર અને રક્તમાં શુગરનું સ્તર ઘટી જવું જેવી ગંભીર આડઅસરો કરી શકે છે. આ સ્થિતિમાં આયાતી દવાનો ઉપયોગ કરવાની ઇચ્છા ધરાવનારાઓએ તમારે શું કરવું જોઈએ? મારા મતાનુસાર તેમણે નીચે મુજબની કાળજી રાખવી જોઈએ.
– પ્રિસ્ક્રિપ્શન વિના દવાઓ ન ખરીદો
– અધિકૃત ફાર્મસી અથવા કાયદેસર રિટેલર્સ પાસેથી જ દવાઓ ખરીદો
– સોશિયલ મીડિયા પર “ઝડપી ઉપાય” અથવા “ચમત્કારી પરિણામ” વેચાતી દવાઓથી દૂર રહો
– આરોગ્ય નિષ્ણાતની સલાહ લો
