ટોચની બ્રોકરેજ હાઉસના મતાનુસાર 2026માં રોકાણ કરવા પાત્ર 5 શેર્સ
ત્રીજા ત્રિમાસિક ગાળાના પરિણામો પછી ટોચની બ્રોકરેજ હાઉસ 5 શેરમાં 38 ટકા સુધીનો ભાવ વધારો થવાની શક્યતા
શેરબજારમાં ખૂંપેલા હોય કે ન ખૂંપેલા હોય તેમને કોઈને કોઈ તબક્કે ઇન્વેસ્ટમેન્ટ કરવા માટે માર્ગદર્શનની જરૂર તો પડે જ છે. આ સ્થિતિમાં બ્રોકરેજ હાઉસ સતત કંપનીઓના નાણાંકીય પરફોર્મન્સ પર નજર રાખીને રોકાણ કરવા પાત્ર શેર્સના નામની ભલામણ કર્યા જ કરે છે. હા, રોકાણકારોએ તેના પર પોતાનું મગજ લગાવીને પછી જ નિર્ણય લેવો જોઈએ.
અમદાવાદઃ રોકાણકારો અને ટ્રેડરોને માર્ગદર્શન મળી રહે તે માટે બ્રોકરેજ હાઉસે સર્વાનુમતિથી નક્કી કરેલા અને 2026ના વર્ષ દરમિયાન રોકાણ કરવા પાત્ર શેર્સની વિગતો નીચે મુજબ છે. 2025-26ના નાણાંકીય વર્ષના ત્રીજા ત્રિમાસિક ગાળાના પરિણામોની સિઝન શરૂ થઈ ગઈ છે. કંપનીઓ ત્રીજા ત્રિમાસિક પરિણામો જાહેર કરી રહી છે. સાથે-સાથે બ્રોકરેજ હાઉસિસમાં પણ ભારે ગતિવિધિ જોવા મળી રહી છે, જ્યાં વિશ્લેષકો આંકડાઓનું ઊંડાણપૂર્વક વિશ્લેષણ કરી રહ્યા છે અને વૃદ્ધિના મુખ્ય કારણો શોધી રહ્યા છે. મોટી કંપનીઓ ઉપરાંત નવી લિસ્ટ થયેલી કેટલીક કંપનીઓ પર મોતીલાલ ઓસવાલ, જેફરીઝ, JM ફાઇનાન્સિયલ અને ICICI ડાયરેક્ટ જેવી બ્રોકરેજ સંસ્થાઓએ રેટિંગ, ટાર્ગેટ પ્રાઈસ અને અપસાઇડ અંદાજ આપ્યા છે.
કંપનીઓના પરફોર્મન્સનું એનાલિસિસ કરતી બ્રોકરેજ કંપનીઓના મતે 2026માં રોકાણ કરવા પાત્ર શેર્સમાં ઇન્ફોસિસ, ગ્રાસિમ ઇન્ડસ્ટ્રીઝ, સીમેન્સ એનર્જી ઇન્ડિયા, બિલિયનબ્રેન્સ ગેરેજ વેન્ચર્સ (Groww) અને યુનિયન બેંક ઓફ ઇન્ડિયાના શેરોનો સમાવેશ થાય છે.
ઇન્ફોસિસ
JM ફાઇનાન્સિયલ, મોતીલાલ ઓસવાલ અને જેફરીઝ સહિત ચાર બ્રોકરેજોએ ઇન્ફોસિસના પરફોર્મન્સ અને તેના શેર્સની ભાવિ ચાલ અંગેના હેવાલો પ્રકાશિત કર્યા છે. મોતીલાલ ઓસવાલે રૂ. 2,200નો ટાર્ગેટ આપ્યો છે, જે 38 ટકાનો ભાવ વધારો થવાનો સંકેત આપવામાં આવી રહ્યો છે. બીજીતરફ જેફરીઝે Buy રેટિંગ સાથે રૂ. 1,880નો ટાર્ગેટ આપ્યો છે, જ્યારે JM ફાઇનાન્સિયલે રૂ. 1,930નો ટાર્ગેટ રાખ્યો છે. તમામ બ્રોકરેજોએ AI સર્વિસિસ, ડીલ વિન્સ અને માર્જિન સુધારાને મુખ્ય કારણ તરીકે દર્શાવ્યા છે.
ગ્રાસિમ ઇન્ડસ્ટ્રીઝ
JP મોર્ગન અને મોતીલાલ ઓસવાલે ગ્રાસિમના શેરમાં રોકાણ કરવા અંગે પોઝિટિવ સંકેત આપ્યો છે. JP મોર્ગને Overweight રેટિંગ સાથે રૂ. 3,300નો ટાર્ગેટ આપ્યો છે, જ્યારે મોતીલાલ ઓસવાલે Buy રેટિંગ સાથે રૂ. 3,600નો ટાર્ગેટ આપ્યો છે. અલ્ટ્રાટેક સિમેન્ટમાં ગ્રાસિમની હિસ્સેદારી અને બિરલા ઓપસ પેઇન્ટ્સ બિઝનેસ તેની મુખ્ય તાકાત તરીકે ગણાવવામાં આવી છે.
સીમેન્સ એનર્જી ઇન્ડિયા
મોતીલાલ ઓસવાલ અને ICICI ડાયરેક્ટે ગ્રિડ ઇન્ફ્રાસ્ટ્રક્ચર ડિમાન્ડ અને ઓર્ડર બુક મજબૂત હોવાનું જણાવ્યું છે. મોતીલાલ ઓસવાલે રૂ. 3,800નો ટાર્ગેટ આપ્યો છે, જ્યારે ICICI ડાયરેક્ટે રૂ. 3,450થી રૂ. 3,920 સુધીનો ટાર્ગેટ રેન્જ આપ્યો છે.
Groww
મોતીલાલ ઓસવાલ અને જેફરીઝે Groww પર Buy રેટિંગ આપ્યું છે. Groww ભારતનું સૌથી મોટું રિટેલ બ્રોકિંગ પ્લેટફોર્મ બની ગયું હોવાનું જણાવ્યું છે. મોતીલાલ ઓસવાલે રૂ. 185-190નો ટાર્ગેટ ભાવ આપ્યો છે, જ્યારે જેફરીઝે રૂ. 195નો ટાર્ગેટ રાખ્યો છે.
યુનિયન બેંક ઓફ ઇન્ડિયા
મોતીલાલ ઓસવાલે ન્યુટ્રલ રેટિંગ આપ્યું છે, જ્યારે આનંદ રાઠીએ Buy રેટિંગ સાથે રૂ. 208નો ટાર્ગેટ આપ્યો છે. મજબૂત ROE, સ્થિર એસેટ ક્વોલિટી અને ખર્ચાળ ડિપોઝિટ્સ ઘટાડવાના પગલાંને હકારાત્મક ગણાવવામાં આવ્યા છે. IT સર્વિસિસ, ઇન્ડસ્ટ્રીયલ, એનર્જી ઇન્ફ્રાસ્ટ્રક્ચર, ડિજિટલ પ્લેટફોર્મ અને PSU બેન્કિંગ ક્ષેત્રમાં બ્રોકરેજોની દૃષ્ટિ જ્યાં એકસમાન બની રહી છે, ત્યાં 2026 માટે આ શેરોમાં મજબૂત વિશ્વાસ દેખાઈ રહ્યો છે.
