આજે શેરબજારમાં શું કરશો?

ફંડામેન્ટલ્સની દ્રષ્ટિએ મેટલ શેર્સમાં અને બેન્કિંગ શેર્સમાં લેવાલી કરી શકાય છે. બેન્કિંગ શેર્સનો લોનનો પોર્ટફોલિયો સંગીન બની રહ્યો છે. ટેકનિકલ ચાર્ટ ઓએનજીસી અને બાયોકોનની ભલામણ કરે છે

આજે શેરબજારમાં ફંડામેન્ટલ્સની દ્રષ્ટિએ મજબૂત ગણાતો પહેલો શેર છે LG Electronics India Ltd.નો છે. તેનો એનએસઈનો કોડ LGEINDIA છે. બ્રોકરેજ કંપની જે.એમ. ફાઈનાન્શિયલ એલજી ઇલેક્ટ્રોનિક્સના શેર્સમાં લેવાલી કરવાની ભલામણ કરી છે. એલજી ઈલેક્ટ્રોનિક્સના શેર્સનો વર્તમાન બજાર ભાવ રૂ. 1350થી રૂ. 1380ની રેન્જમાં છે. વીસ ટકાના વધારા સાથે તેનો ભાવ વધીને રૂ. 1630ને આંબી જાય તેવી સંભાવના છે. એલ.જી. ઇલેક્ટ્રોનિક્સ કન્ઝ્યુમર ડ્યૂરેબલ્સ અને ઇલેક્ટ્રોનિક્સ આઈટેમ્સના ઉદ્યોગ-ઉત્પાદન અને વેચાણ સાથે સંકળાયેલી કંપની છે. એક મજબૂત બ્રાન્ડ હોવાથી તેમાં અને તેનો પ્રોડક્ટ પોર્ટફોલિયો વિવિધતાસભર હોવાથી તેમાં લેવાલી કરવાનો સંકેત આપવામાં આવ્યો છે. તેના હોમ એપ્લાયન્સની ડિમાન્ડ ખાસ્સી વધારે છે. પરિણામે કંપનીના કામકાજમાં વધારો થવાની અને તેની સાથે માર્જિન સુધરતા જતાં હોવાથી નફામાં વધારો થવાની શક્યતા મજબૂત જણાઈ રહી છે. કંપનીનું ડિસ્ટ્રીબ્યુશન નેટવર્ક તેના પ્રોડક્ટ્સને નવા માર્કેટ સુધી લઈ જશે અને તેમની આવકમાં પણ વધારો કરશે. કંપની પોતાની કાર્યકુશળતા વધારીને માર્જિનને વધુ સંગીન બનાવવાનો પ્રયાસ કરી રહી છે. એલજી ઇલેક્ટ્રોનિક્સના પ્રોડક્ટ્સની ડિમાન્ડ સતત વધી રહી હોવાથી તેના શેર્સમાં લેવાલી કરવાની ભલામણ કરવામાં આવી રહી છે.

Public Sector bankના શેર્સમાં લેવાલી કરી શકાય છે. તદુપરાંત મેટલ કંપનીઓના શેર્સમાં પણ લેવાલી કરી શકાય છે. બેન્કિંગ શેર્સમાં વેલ્યુરોટેશનને કારણે સુધારો જોવા મળી રહ્યો હોવાનું નિષ્ણાતોનું માનવું છે. જાહેર ક્ષેત્રની બેન્કોની એસેટ ક્વોલિટી સ્થિર છે. લોન લેનારાઓની સંખ્યા સતત વધી રહી છે. તેથી બેન્કિંગ શેર્સમાં લેવાલી કરવાની ભલામણ કરવામાં આવી રહી છે. જાહેર ક્ષેત્રની બેન્કના ધિરાણો વધી રહ્યા છે. તેમનું મૂલ્ય અત્યારે કમ્ફર્ટેબલ ઝોનમાં છે. બેન્કિંગ શેર્સમાં સ્ટેટ બેન્ક ઓફ ઇન્ડિયાના શેર્સમાં લેવાલી કરી શકાય છે. સ્ટેટબેન્કના ફંડામેન્ટલ્સ મજબૂત છે. મેટલ શેર્સમાં હિન્દુસ્તાન ઝિન્ક, વેદાન્તા મજબૂત પરફોર્મન્સ આપે તેવી સંભાવના છે.

સોના-ચાંદી ઉપરાંત હવે તાંબાંમાં પણ તેજી જોવા મળી રહી હોવાથી ગોલ્ડીલૉક્સ ગ્લોબર રિસર્ચ મેટલ સ્ટોક્સમાં લેવાલી કરવાની ભલામણ કરી રહ્યા છે. મેટલ સ્ટોક્સમાં રોકાણ કરનારાઓને ઇન્ફોર્મેશન ટેક્નોલોજી અને એફએમસીજી સ્ટોક્સમાં રોકાણ કરવા પાછળના જોખમની તુલનાએ મળનારા સંભવિત વળતર-રિસ્ક રિવોર્ડમાં બેન્કિંગ અને મેટલ શેર્સ વધારા સારા ગણાય છે. મેટલ સ્ટોક્સનું રિવેલ્યુએશન થવાની સંભાવના છે. ધાતુઓના ભાવમાં થઈ રહેલા વધારાને કારણે તેની પસંદગી કરવામાં આવી રહી છે. કોમોડિટીની પ્રાઈસિંગ સાઈકલને કારણે ધાતુઓના ભાવ ઉપર જઈ રહ્યા હોવાથી મેટલ કંપનીઓના શેર્સમાં લેવાલી કરવાની ભલામણ કરવામાં આવી રહી છે.

હવે સોનીઓ પાસેથી તાંબાની એક કિલોની બ્રિક્સ ખરીદવાનો ટ્રેન્ડ જોવા મળી રહ્યો છે. સોના અને ચાંદી પછી મેટલમાં અને તેમાંય ખાસ કરીને તાંબામાં તેજી જોવા મળી રહી હોવાથી કેટલાક સોનીઓએ તાંબાની ઇંટ વેચવાનું શરૂ કર્યું છે. કેટલાક લોકો ટુકડે ટુકડે 50થી 100 ઇંટ ખરી ચૂક્યા છે. વાસ્તવમાં તાંબામાં રોકાણ કરવું છૂટક રોકાણકારો માટે હિતાવહ નથી. એક સામટું 5 કે 25 ટન ખરીદવાની ક્ષમતા ધરાવનારાઓને તેનો લાભ મળી શકે છે. પરંતુ માત્ર એક કિલોના વજનની ઇંટ ખરીદનારાઓને તેમાં કોઈ વળતર છૂટવાની સંભાવના નથી. તાંબામાં લિક્વિડિટી જ નથી. એક બે કિલો ખરીદનારાઓએ આખરે તે તાંબું ભંગારવાળાને વેચવાની નોબત આવી શકે તેમ હોવાનું ધાતુઓના બજારના અનુભવી પ્લેયર દિનેશ છાજેડનું કહેવું છે.

ટેકનિકલ ચાર્ટની દ્રષ્ટિએ ટૂંકા ગાળામાં તેજતર્રાર પરફોર્મન્સ આપવાની સંભાવના ધરાવતી સ્ક્રિપમાં ઓએનજીસી-Oil and Natural Gas Corporation, Biocon અને GICREનો સમાવેશ થાય છે. ઓએનજીસીના શેર્સનો ટાર્ગેટ ભાવ રૂ. 280નો, બાયોકોનના શેરનો ટાર્ગેટ ભાવ રૂ. 420 અને જીઆઈસીઆરઈના શેરનો ટાર્ગેટ ભાવ રૂ. 480 નક્કી કરવામાં આવ્યો છે. ટેકનિકલ ચાર્ટને આધારે આ ભલામણ કરવામાં આવી છે. આ ત્રણેય શેર્સ ઓવરસોલ્ડ ઝોનમાં હોવાનું જણાઈ રહ્યું છે. ઇન્ટ્રા ડેમાં તેમાં રિવર્સલ આવી શકે છે. તેમ જ નવેસરથી બ્રેકઆઉટ્સ જોવા મળી શકે છે.

Oil & Gas સેક્ટરની કંપની ONGC Ltd.-ONGCના શેર્સમાં ટૂંકા ગાળામાં જ લેણ કરવાના સંકેત મળી રહ્યા છે. સ્ક્રિપનો ટાર્ગેટ ભાવ રૂ. 280નો નક્કી કરવામાં આવ્યો છે. સ્ક્રિપનો વર્તમાન ભાવ રૂ. 268-270નો છે. રૂ. 260નો સ્ટોપલૉસ રાખીને તેમાં કામકાજ કરી શકાય છે. આ શેર અત્યારે ઓવરસોલ્ડ ઝોનમાં હોવાનું ટેકનિકલ ચાર્ટ બતાવે છે. હવે તેમાં સુધારા તરફી ટ્રેન્ડ જોવા મળે તેવું ચાર્ટ દર્શાવે છે. રૂ. 260ની સપાટીએ સ્ક્રિપ મજબૂત ટેકો ધરાવે છે. સ્ક્રિપમાં ઇન્ટ્રા ડેમાં જ આ ફેરફાર જોવા મળશે. ક્રૂડના ભાવમાં અફરાંતફરી મચી હોવાથી ઓઈલ એન્ડ ગેસ સેક્ટરની કંપનીઓના શેર્સના ભાવ સંવેદનશીલ બની ગયા છે. તેથી જ ઓએનસીજીના શેર્સમાં ટેકનિકલ ચાર્ટ અપવર્ડ મુવેમેન્ટનો નિર્દેશ આપી રહ્યા છે.

ટેકનિકલ ચાર્ટની દ્રષ્ટિએ લે-વેચ કરવા પાત્ર બીજો શેર Biocon Ltd. (Biocon)નો છે. રૂ. 400નો વર્તમાન બજાર ભાવ ધરાવતી આ સ્ક્રિપમાં રૂ.390નો સ્ટોપલૉસ રાખીને ટ્રેડિંગ કરી શકાય છે. ટાર્ગેટ ભાવ રૂ. 420નો થવાની સંભાવના ટેકનિકલ ચાર્ટને આધારે જણાઈ રહી છે. હેલ્થકેર સેક્ટરનો રિલેટીવ સ્ટ્રેન્ગ્થ ઇન્ડેક્સ મજબૂત હોવાનું જણાય છે. બાયોકોન હેલ્થકેરના સેક્ટરની જ કંપની છે.

આજે નિફ્ટી ફ્યુચરમાં શું કરી શકાય?

આજે નિફ્ટી ફ્યુચરમાં થોડી મંદીનો ટોન જોવા મળી શકે છે. તેથી ટ્રેડર્સે સાવધાની ભર્યો અભિગમ રાખવો જરૂરી છે, એમ ઇન્ડિયન માર્કેટ ટેકનિકલ આઉટલૂકમાં જણાવવામાં આવ્યું છે. નિફ્ટી ફ્યુચર આજે 25160થી 25,100ની રેન્જમા રમતો જોવા મળી શકે છે. ઘટીને 25000 કે 24,900ની સપાટીએ આવી શકે છે. નિફ્ટી ફ્યુચર 25,300 અને 25,400ની સપાટીએ પ્રતિકાર ધાવે છે. તેનાથી ઉપર 25,488 અને 25,585ની સપાટીએ તથા 25,743ની સપાટીએ મહત્વનો પ્રતિકાર જોવા મળી શકે છે. નિફ્ટી ફ્યુચર 25,400ની ઉપર ન જાય ત્યાં સુધી તેમાં મંદીનો ટોન જળવાઈ રહેવાની સંભાવના છે. જોકે 25,160ની સપાટીને પકડી રાખે તો ત્યાંથી ફરી છલાંગ લગાવીને ઉપરની તરફ જઈ શકે છે. પરંતુ 25,500ની ઉપર જાય તે પછી જ તેમાં તેજીની ચાલ જોવા મળી શકે છે. આ ચાલ ટૂકાંગાળા માટે રહેવાની સંભાવના છે 20મી જાન્યુઆરી પછીના ચાર્ટને આધારે 21મી જાન્યુઆરીના ટ્રેન્ડનો અંદાજ આપવામાં આવ્યો છે. અગાઉ શરત ચૂકથી ત્રણ દિવસ સુધી 16મી જાન્યુઆરીના ચાર્ટને આધારે જ ત્રણથી ચાર દિવસ સુધી નિફ્ટીના બજારની ચાલની વિગતો દર્શાવવામાં આવી હતી. .